Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan  |  Disiembre 2012

 Pamangkot sang mga Bumalasa . . .

Ngaa ang Iban Wala Nagasaulog sang Krismas?

Ngaa ang Iban Wala Nagasaulog sang Krismas?

Sa bilog nga kalibutan, mga duha ka bilyon ang nagasaulog sang Krismas kada Disiembre 25, samtang mga 200 milyones ang nagasaulog sang pagkabun-ag ni Jesucristo kada Enero 7. Pero minilyon man ang wala nagasaulog sang Krismas. Ngaa?

Ang isa ka rason amo nga indi sila Cristiano. Mahimo nga miembro sila sang relihion nga Judaismo, Hinduismo, ukon Shinto. Ang iban naman pareho sa mga atiesta, agnostiko, kag iban pa, nagapati nga ginhimuhimo lang ang Krismas.

Pero makapakibot nga madamo sang nagapati kay Jesus ang wala nagasaulog sang Krismas. Ngaa? Bangod sa apat ka rason.

Una, wala sila nagapati nga si Jesus nabun-ag sang Disiembre ukon sang Enero. Wala ginsambit sang Biblia ang petsa sang pagkabun-ag ni Jesus. Amo lang ini ang mabasa naton: “Sa amo nga duog may yara man mga manugbantay sang karnero nga nagapuyo sa latagon kag nagabantay sang ila mga panong sa bug-os nga gab-i. Kag hinali lang nga nagtindog malapit sa ila ang anghel ni Jehova, kag . . . ang anghel nagsiling sa ila: ‘. . . Natawo sa inyo karon ang isa ka Manluluwas, nga amo ang Cristo nga Ginuo.’”—Lucas 2:8-11.

Ginapakita sang mga ebidensia nga natawo si Jesus sang mga temprano nga bahin sang Oktubre, diin ang mga manugbantay kag ang ila panong mahimo magpabilin sa latagon bisan gab-i na. Ang bulan sang Disiembre kag Enero amo ang pinakamatugnaw nga tion sa Betlehem. Gani para indi matugnawan ang panong, ginapasulod sila sa toril.

Ikaduha nga rason: Ang ginsugo lamang ni Jesus nga saulugon sang iya mga sumulunod amo ang memoryal sang iya kamatayon, indi ang iya pagkabun-ag, kag dapat ini himuon paagi sa simple nga panihapon. (Lucas 22:19, 20) Talupangda man nga wala ginsambit sang mga Ebanghelyo nanday Marcos kag Juan ang parte sa pagkabun-ag ni Jesus.

Ang ginsugo lamang ni Jesus nga saulugon sang iya mga sumulunod amo ang memoryal sang iya kamatayon, indi ang iya pagkabun-ag

Ikatlo nga rason: Wala sing ebidensia nga ginsaulog sang mga Cristiano sang una ang pagkabun-ag sang Cristo. Pero ginsaulog nila ang iya kamatayon. (1 Corinto 11:23-26) Mga 300 ka tuig pa pagkatapos sang kamatayon ni Jesus antes ginsaulog sang Cristiandad ang Krismas kada Disiembre 25. Sang tungatunga sang ika-17 nga siglo, may layi nga nagadumili sang pagsaulog sang Krismas sa England. Sa Estados Unidos, amo man sini ang ginpatuman sang Massachusetts General Court. Ngaa? Ang libro nga The Battle for Christmas nagasiling: “Wala sing ebidensia sa Biblia ukon sa kasaysayan nga natawo si Jesus sang Disiembre 25.” Nagasiling pa ini nga para sa mga Puritano, “ang Krismas isa ka pagano nga kapiestahan nga ginhimo nga Cristiano nga selebrasyon.”

Ikap-at nga rason: Ang malain nga ginhalinan mismo sini nga selebrasyon. Ang Krismas naghalin sa kombinasyon sang mga kapiestahan sang pagano nga pungsod sang Roma nga nagapadungog sa dios sang panguma nga si Saturn kag sa dios sang adlaw nga si Sol Invictus, ukon Mithra. Ang mga antropologo nga sanday Christian Rätsch kag Claudia Müller-Ebeling, mga manunulat sang libro nga Pagan Christmas, nagsiling: “Pareho sa madamo nga kustombre kag pagpati antes sang panahon sang mga Cristiano, ang kapiestahan sadto bilang pagsaulog sang pagbalik sang adlaw kada tuig gingamit subong sa pagsaulog sang pagkabun-ag sang Cristo.”

Pagkatapos mabinagbinag ini nga mga rason, nahangpan mo na bala kon ngaa wala nagasaulog sang Krismas ang matuod nga mga Cristiano?