Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN DISIEMBRE 2012

 Tudlui ang Inyo Kabataan

Nagpabilin nga Matutom si Jotam Bisan Pa sang Kagamo sa Ila Puluy-an

Nagpabilin nga Matutom si Jotam Bisan Pa sang Kagamo sa Ila Puluy-an

KON mag-untat ang mga ginikanan sa pag-alagad sa matuod nga Dios nga si Jehova, mabudlay gid ini para sa isa ka bata. Istoryahan naton ang parte kay Jotam. Tun-an naton ang parte sa kabudlayan nga iya naatubang sa ila puluy-an samtang nagadaku sia.

Ang amay ni Jotam amo si Uzias nga hari sang Juda. Sia ang pinakagamhanan nga tawo sa ila pungsod. Nangin maayo nga hari si Uzias sa malawig nga tinuig, bisan sang wala pa matawo si Jotam. Pero sang ulihi, samtang bata pa si Jotam, nangin bugalon si Uzias kag wala niya gintuman ang Kasuguan sang Dios. Gani ginsilutan sia sang Dios sang aro. Nakahibalo ka bala kon ano ang ginhimo ni Jotam? *

Nagpadayon si Jotam sa pag-alagad kay Jehova. Mahimo ginbuligan sia sang iya iloy nga si Jerusa. Pero, mabudlay gihapon para kay Jotam nga magpabilin nga matutom kay Jehova bangod ang iya amay nga si Uzias nagtalikod kay Jehova.

Kamusta kon ang imo amay ukon iloy mag-untat sa pag-alagad kay Jehova? Mabudlayan ka gid, indi bala?— Pero indi sala nga pamensaron nga posible ina matabo. Makabulig sa aton ang pagbinagbinag sa ginsulat ni David sa Biblia.

Ang amay ni David nga si Jesse, isa ka maayo nga tawo. Nag-alagad sia kay Jehova, gani makasiguro kita nga palangga gid ni David ang iya amay. Pero mas ginhigugma ni David si Jehova sangsa iya amay. Paano naton nahibaluan ini?

 Palihug buksi ang imo Biblia sa Salmo 27:10. Si David nagsulat: “Kon magbiya sa akon ang akon amay kag akon iloy, niyan ang GINOO magasapopo sa akon.” Pamensara ini: Ginasiling sang Biblia nga kon mag-untat sa pag-alagad kay Jehova ang amay ni David nga si Jesse, ukon ang iya iloy, magapadayon gihapon si David sa pag-alagad sa Iya.

Kamusta sa imo bahin? Magapadayon ka bala sa pag-alagad kay Jehova bisan mag-untat ang imo amay ukon iloy?— Maayo nga ipamangkot ini sa imo kaugalingon. Ang rason may labot sa pinakaimportante nga sugo sa Biblia. Amo ini: “Higugmaon mo si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna.”

Ini nga sugo nagakahulugan nga dapat kita mangin matutom kay Jehova bisan mabudlay ini himuon. Sin-o sa banta mo ang gusto magpauntat sa aton sa pag-alagad kay Jehova?— Ang kaaway sang Dios nga si Satanas nga Yawa. Gintawag sia ni Jesus nga “ang manuggahom sini nga kalibutan.” Ang Biblia nagasiling man nga sia ang “dios sining sistema sang mga butang.” Dapat bala kita mahadlok kay Satanas?

Indi. Sa baylo, dapat naton dumdumon nga mas gamhanan si Jehova sangsa kay Satanas. Amligan kita ni Jehova kon magsalig kita sa iya. Basaha sa imo Biblia kon paano gin-amligan ni Jehova si David sa higante nga si Goliat. Amligan ka man ni Jehova kon magpabilin ka nga matutom sa iya.

^ par. 4 Kon ginabasa mo ini sa bata, magdulog ka kon makita mo ang dash (—) kag pasabta sia.