Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN OKTUBRE 2012

Ang Biblia Nagapabag-o sang Kabuhi

Ang Biblia Nagapabag-o sang Kabuhi

PAANO nangin malipayon kag maayo nga bana kag amay ang isa ka tawo nga may masubo nga inagihan? Ano ang nagpahulag sa isa ka babayi nga madamo sing bisyo nga tinluan ang iya kabuhi? Basaha kon ano ang ila ginsiling.

“Nagbatyag Ako nga Wala sing Pulos.”—VÍCTOR HUGO HERRERA

  • NATAWO: 1974
  • PUNGSOD: CHILE
  • KABUHI SANG UNA: PALAHUBOG

ANG AKON NAGLIGAD:

Natawo ako sa siudad sang Angol, sa matahom nga bagatnan sang Chile. Wala ko nakilala ang akon amay. Sang tres anyos pa lang ako, nagsaylo kami ni Nanay upod sang akon manghod nga lalaki sa Santiago, ang kapital sang Chile. Nag-istar kami sa hayubhayob. Pangpubliko nga kasilyas ang amon ginagamit, kag nagakuha kami sang tubig sa gripo para sa sunog.

Pagligad sang mga duha ka tuig, ginhatagan kami sang gobierno sang gamay nga balay. Pero ang malain kay ang mga kaingod namon mga adik, palahubog, kriminal, kag prostityut.

Isa ka adlaw, may nakilala si Nanay nga isa ka lalaki, kag sang ulihi nagpakasal sila. Palahubog ini kag ginasakit niya kami ni Nanay. Pirme ako nagahibi kon nagaisahanon, kag ginahandum ko nga tani may amay ako nga mag-amlig sa akon.

Bisan pa nagabakabaka si Nanay, tuman gihapon ka imol sa amon. Kon kaisa nga gutom na kami, gatas kag kalamay na lang ang amon ginakaon. Para makatan-aw sang TV, nagalingling kami sang akon manghod sa bintana sang amon kaingod. Pero isa ka adlaw nadakpan niya kami, kag indi na kami makatan-aw pa!

Kon indi hubog ang bana ni Nanay, nga talagsa lang gid matabo, ginabaklan niya kami sang akon manghod sang pagkaon. Isa ka bes, ginbaklan niya kami sang gamay nga TV. Isa ini sa pila lang ka tion nga nangin malipayon ako.

Dose anyos na ako nakatuon magbasa. Pagkasunod nga tuig, nag-untat ako eskwela kag nag-obra. Kada tapos sang akon obra, nagaupod ako sa mga adulto ko nga katrabaho sa mga party diin nagapahubog kami kag nagadroga. Sang ulihi, naadik ako.

Sang 20 anyos ako, nakilala ko si Cati, kag sang ulihi nagpakasal kami. Sang primero, maayo ang amon kahimtangan, pero nagbalik ako sa akon mga bisyo. Naglain pa gid ang akon batasan. Narealisar ko sang ulihi nga prisuhan ukon lulubngan lang ang madangatan ko. Mas malain pa, ginapaantos ko man ang akon bata nga si Victor sang kabudlayan nga naagihan ko sang bata pa ako. Nasubuan gid ako, naugot ako  sa akon kaugalingon, kag nagbatyag ako nga wala sing pulos.

Sang mga 2001, nagkadto sa amon balay ang duha ka Saksi ni Jehova, kag nagtuon sa Biblia si Cati upod sa ila. Ginasugid niya sa akon ang iya natun-an. Bangod sang akon pagkamausisaon, nagtuon man ako sa Biblia. Sang 2003, nabawtismuhan si Cati bilang isa sang mga Saksi ni Jehova.

KON PAANO GINBAG-O SANG BIBLIA ANG AKON KABUHI:

Isa ka adlaw, nabasahan ko ang Rut 2:12, nga nagasiling nga ginapadyaan ni Jehova ang mga nagatuo kag nagadangop sa iya. Narealisar ko nga kon magbag-o ako, mapahamut-an ko ang Dios kag padyaan niya ako. Natalupangdan ko nga pirme ginakondenar sang Biblia ang pagpahubog. Natandog gid ako sang ginasiling sang 2 Corinto 7:1. Ginapalig-on kita sini nga “tinluan naton ang aton kaugalingon gikan sa tanan nga dagta.” Gani ginbiyaan ko ang akon mga bisyo. Sang primero, mas nangin maakigon ako, pero padayon ako nga ginsuportahan ni Cati.

Sang ulihi naghalin ako sa akon obra kay kabudlay gid likawan ang pagpanigarilyo kag pagpahubog. Bisan diutay lang ang amon kuarta kay wala na ako sang obra, madamo naman ako sang tion nga magtuon sa Biblia. Sugod sadto nag-uswag na ako sa espirituwal. Kontento lang si Cati kon ano ang ara kag wala gid sia nagreklamo. Nalipay gid ako sa iya mahigugmaon nga suporta.

Amat-amat nga nagpakigsuod ako sa mga Saksi. Ginbuligan nila ako nga mahangpan nga bisan kulang ang akon ineskwelahan, ginapabaloran gid ni Jehova ang akon handum nga alagaron sia. Daku gid ang epekto sa amon pamilya sang gugma kag paghiusa nga nakita namon sa Cristiano nga kongregasyon. Diri lang namon nabatyagan ini nga kalinong. Sang Disiembre 2004, nabawtismuhan man ako.

MGA BENEPISYO:

Nangin matuod sa akon ang mga pulong ni Jehova sa Isaias 48:17 nga nagasiling: “Ako amo ang GINOO nga imo Dios, nga nagatudlo sa imo sa kapuslanan.” Nagdayaw gid si Nanay kag ang akon manghod sa akon pagbag-o amo nga nagatuon man sila subong sa Biblia. Bisan ang amon mga kaingod nalipay sa akon pagbag-o kag sa amon malipayon nga pamilya.

May asawa ako nga nagahigugma sa Dios kag nagakabig sa akon nga masaligan nga kaupod kag abyan. Bisan pa wala ko nakilala ang akon amay, gintudluan ako sang Biblia kon paano padakuon ang akon tatlo ka bata nga lalaki. Ginarespeto nila ako. Labaw sa tanan, ginakabig nila si Jehova nga isa gid ka matuod nga Persona, kag ginahigugma nila sia.

“Bisan pa wala ko nakilala ang akon amay, gintudluan ako sang Biblia kon paano padakuon ang akon tatlo ka bata nga lalaki”

Nagapasalamat gid ako nga bisan sa akon masubo nga inagihan sang bata pa ako, ginhatagan ako ni Jehova sang kahigayunan nga mangin malipayon nga tawo.

 “Maakigon Ako kag Masingki nga Pamatan-on.”—NABIHA LAZAROVA

  • NATAWO: 1974
  • PUNGSOD: BULGARIA
  • KABUHI SANG UNA: NAGABALIGYA SANG DROGA

ANG AKON NAGLIGAD:

Natawo ako sa Sofia, Bulgaria, sa isa ka may sarang nga pamilya. Ginbiyaan kami ni Tatay sang anom pa lang ako ka tuig. Naglalain ako kag nasakitan gid. Nagbatyag ako nga ginpabay-an kag wala sing pulos. Bangod sini, nangin rebelyuso ako samtang nagahamtong. Maakigon ako kag masingki nga pamatan-on.

Sang 14 anyos ako, naglayas ako sa una nga tion. Pirme ko ginakawat ang kuarta ni Nanay kag sang akon lolo kag lola. Sa eskwelahan pirme lang ako may kontra kay masingki ako, amo nga lima ka eskwelahan ang akon nasayluhan sa pila lang ka tuig. Tatlo ka tuig antes ako maggradweyt, nag-untat na ako. Nangin imoral ako, naadik sa sigarilyo kag marijuana, nagpahubog, kag pirme nagalakwatsa. Nagbaligya man ako sang droga. Nasubuan gid ako sa sining kalibutan diin ang mga tawo nagaantos kag nagakapatay. Gani nagakabuhi ako nga daw wala na sang buas.

Sang 1998, sang 24 anyos ako, gin-aresto ako sa erport sa São Paulo, Brazil samtang nagabaligya sang droga. Ginpriso ako sing apat ka tuig.

KON PAANO GINBAG-O SANG BIBLIA ANG AKON KABUHI:

Sang 2000, nagsugod sa pagbisita ang mga Saksi ni Jehova sa akon prisuhan kada semana. Ang isa ka Saksi nga si Marines maluluy-on gid sa akon, amo nga nangin interesado ako sa pagtuon sa Biblia. Ginpamangkot ko ang akon upod nga mga priso parte sa mga Saksi ni Jehova kay wala pa gid ako nakabati parte sa ila. Nakibot ako kay kalabanan sa ila nagapakalain sa mga Saksi. Ang isa ka priso nagsiling sa akon nga magsulod sa bisan ano nga relihion luwas lang sa mga Saksi ni Jehova. Ang iya ginsiling nagpahulag sa akon nga mangusisa kay gusto ko mahibaluan kon ngaa ginadumtan gid sila. Sa pagpati ko, ina bangod sila ang matuod nga relihion. Kay man ang Biblia nagasiling nga ang tanan nga gusto magsunod kay Jesus pagahingabuton.—2 Timoteo 3:12.

Sina nga tion, gin-asayn ako nga mag-obra sa opisina sang nagadumala sa prisuhan. Isa ka adlaw nakakita ako sang pila ka kahon nga may daan nga Lalantawan kag Magmata! nga mga magasin * sa bodega. Gindala ko ini sa akon selda kag ginbasa. Samtang nagadamo ang akon nabasahan, daw kaangay ako sang isa nga ara sa desyerto nga nakakita sang bubon. Bangod madamo ako sang bakante nga tion, gintun-an ko ang Biblia sing inoras kada adlaw.

Isa ka adlaw ginpatawag ako sa opisina. Abi ko paguaon na ako amo nga ginpanghimos ko ang akon diutay nga pagkabutang, nagpaalam sa mga priso, kag nagdalidali sa opisina. Pero pag-abot ko didto, nabal-an ko nga may bag-o nga kaso nga ginpasaka sa akon parte sa pagtago sang peke nga mga dokumento. Bangod  sini, nadugangan ang akon sentensia sing duha ka tuig.

Sang primero, naglalain gid ako. Pero pagligad sang pila ka adlaw, narealisar ko nga nangin pagpakamaayo pa gani ini sa akon. Bisan pa madamo na ako sang natun-an sa Biblia, handum ko gihapon nga padayunon ang akon pagkabuhi sang una kon makagua na ako sa prisuhan. Kinahanglan ko ang mas malawig pa nga tion para magbag-o.

Kon kaisa nagabatyag ako nga imposible nga batunon ako sang Dios. Pero ginpamensaran ko sing maayo ang ginasiling sang 1 Corinto 6:9-11. Ginapakita sina nga mga bersikulo nga sang una nga siglo C.E., ang pila ka Cristiano mga kawatan, palahubog, kag manugkilkil antes mag-alagad kay Jehova. Pero sa bulig niya, nagbag-o sila. Napalig-on gid ako sang ila halimbawa.

Mahapos lang dulaon ang pila ko ka bisyo, pareho sang pag-untat sa pagdroga. Pero nabudlayan ako nga untatan ang pagpanigarilyo. Sobra isa ka tuig kag nauntatan ko ini. Ang isa nga nakabulig sa akon amo ang pagtuon ko parte sa malain nga epekto sini sa lawas. Labaw sa tanan, nakabulig sa akon ang padayon nga pagpangamuyo kay Jehova.

“Nakilala ko ang pinakamaayo nga Amay—ang isa nga indi gid magbiya sa akon!”

Samtang nagasuod ako kay Jehova, amat-amat ko nga nadaug ang balatyagon nga ginsikway sugod sang ginbiyaan kami sang akon amay. Natandog gid ako sang ginasiling sa Salmo 27:10. Ini nagasiling: “Kon magbiya sa akon ang akon amay kag akon iloy, niyan ang GINOO magasapopo sa akon.” Narealisar ko nga nakilala ko ang pinakamaayo nga Amay—ang isa nga indi gid magbiya sa akon! May katuyuan na ang akon kabuhi subong. Sang Abril 2004, anom ka bulan sa tapos nga nakagua ako sa prisuhan, nabawtismuhan ako bilang isa sang mga Saksi ni Jehova.

MGA BENEPISYO:

Malipayon na ako. Mas maayo na ang akon panglawas kag emosyon sangsa sang bataon pa ako, bangod wala na ako sang mga bisyo. May bana na ako kag malipayon kami sa amon pag-asawahay. May suod man ako nga kaangtanan sa akon Amay sa langit, si Jehova. Madamo ako sang amay, iloy, kag mga utod sa tunga sang iya mga sumilimba. (Marcos 10:29, 30) Nagapasalamat gid ako nga nakita nila ang maayo sa akon—antes ko pa ini makita.

Kon kaisa, ginakonsiensia gid ako bangod sang akon mga ginhimo sang una. Pero naumpawan ako kay nahibaluan ko nga sa bag-o nga kalibutan nga ginpromisa sang Dios, “indi na pagdumdumon” ang malain nga mga nagligad. (Isaias 65:17) Samtang wala pa ina, ang akon mga inagihan nakabulig sa akon nga mangin maluluy-on sa mga tawo nga pareho man sang inagihan sa akon. Sa sina nga paagi, nangin bentaha ang akon nagligad. Halimbawa, kon nagawali ako, mahapos ko lang istoryahon ang mga adik, palahubog, ukon mga kriminal, kag wala ko sila ginalikawan. Nagasalig ako nga kon nasarangan ko magbag-o para pahamut-an si Jehova, mahimo man ini ni bisan sin-o!

^ par. 29 Ginhimo sang mga Saksi ni Jehova.