Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN OKTUBRE 2012

Korapsion Madula Na!

Korapsion Madula Na!

“Hulata ang GINOO, kag bantayi ang iya dalanon . . . kon ang malauton utdon makita mo ini.” —SALMO 37:34.

PAREHO sa madamo, nahadlok ka man bala nga indi malikawan kag indi na madula ang korapsion? Kon amo, normal lang ina. Halin pa sang una, gintilawan na sang mga tawo ang tanan nga sahi sang gobierno. Pero wala gid nila nadula sing bug-os ang korapsion. Maabot pa ayhan ang tion nga mangin bunayag na ang tanan nga tawo?

Huo, siling sang Biblia! Ginasugiran kita sini nga sa indi madugay dulaon na sang Dios ang korapsion sa duta. Paano? Paagi sa iya Ginharian, nga isa ka gobierno sa langit nga magabag-o sang aton duta. Ini man nga Ginharian ang gintudlo ni Jesus sa iya mga sumulunod nga ipangamuyo. Sa ginatawag kon kaisa nga Pangamuyo sang Ginuo ukon Amay Namon, si Jesus nagsiling: “Magkari ang imo Ginharian, matuman ang imo kabubot-on diri sa duta.”—Mateo 6:10, Maayong Balita nga Biblia.

 Parte sa Gumalahom sina nga Ginharian, si Jesucristo, ang Biblia nagatagna: “Magaluwas sia sang nawad-an kon magtuaw sia, sang imol nga wala sing manugtabang. Magakaawa sia sa imol kag sa nawad-an, kag luwason niya ang mga kalag sang nawad-an. Tubson niya ang ila kalag gikan sa pagpigus kag paglugus.” (Salmo 72:12-14) Talupangda nga nagaulikid si Jesus sa mga biktima sang korapsion, kag magapanghikot sia batok sa pagpigos! Indi bala makapalig-on gid ina?

Sa paggahom sinang maluluy-on kag gamhanan nga Gumalahom, dulaon sang Ginharian sang Dios ang korapsion sa duta. Paano? Paagi sa pagdula sang tatlo ka kabangdanan sang korapsion.

Ang Impluwensia sang Sala

Dapat pakigbatuan naton subong ang aton makasasala nga mga huyog, nga nagaimpluwensia sa aton nga mangin makagod. (Roma 7:21-23) Pero may mga tawo gihapon nga luyag maghimo sing maayo. Paagi sa kamatayon ni Jesucristo, nag-aman ang Dios sing paagi para mapatawad ang mga sala. * (1 Juan 1:7, 9) Ang mga nagatuo sa sini nga aman makabenepisyo sa labing daku nga gugma nga ginpakita sang Dios, suno sa mabasa naton sa Juan 3:16: “Ginhigugma gid sang Dios ang kalibutan amo nga ginhatag niya ang iya bugtong nga Anak, agod ang tagsatagsa nga nagatuo sa iya indi malaglag kundi makatigayon sang kabuhi nga walay katapusan.”

Para sa mga matutom, magahimo ang Dios sang makatilingala nga butang. Sa bag-ong kalibutan, dulaon niya ang tanan nga epekto sang sala, kag amat-amat nga himuon nga perpekto kag matarong ang katawhan. (Isaias 26:9; 2 Pedro 3:13) Indi na gid makaimpluwensia ang sala para mangin korap ang isa. Sa paggahom sang Ginharian sang Dios, ang mga matutom mahilway na sa pagkaulipon sa korapsion.

Ang Impluwensia sang Malaut nga Kalibutan nga Aton Ginaistaran

Makapasubo nga madamo subong ang hungod nga nagahalit sa iban. Ginadaugdaug nila ang mga makaluluoy kag imol, kag ginaimpluwensiahan nila ang iban nga mangin korap man. Ang Biblia nagalaygay sa ila: “Magbiya ang malauton sang iya dalanon, kag ang dimatarung nga tawo sang iya mga painoino.” Kon ini nga mga korap maghinulsol, nagapromisa ang Biblia nga ang Dios “magapatawad sing bugana.”—Isaias 55:7.

Pero laglagon gid sang Dios ang mga batinggilan. Paagi sa Ginharian sang Dios, ang promisa sang Biblia mangin matuod: “Hulata ang GINOO, kag bantayi ang iya dalanon . . . kon ang malauton utdon makita mo ini.” (Salmo 37:34) Kon wala na ang mga malauton, indi na mangin biktima sang korapsion ang matutom nga mga sumilimba sang Dios.

Ang Impluwensia ni Satanas nga Yawa

Ang nagapanguna sa mga makasasala amo si Satanas nga Yawa. Maayo lang kay sa indi madugay punggan na ni Jehova nga Dios si Satanas nga impluwensiahan ang mga tawo. Laglagon sang Dios si Satanas sa ulihi. Indi na gid sia makaimpluwensia sa mga tawo para mangin korap.

Ibutang ta nga ang ideya nga dulaon sang Dios ang kabangdanan sang korapsion daw dalamguhanon lamang. Mahimo ka mamangkot, ‘Masarangan gid bala sang Dios ini nga pagbag-o? Kon amo, ngaa nga wala pa niya ini ginhimo?’ Maayo ini nga mga pamangkot, kag may maayo nga mga sabat ang Biblia. * Ginaagda ka namon nga usisaon mismo ang ginatudlo sang Biblia parte sa palaabuton, kon madula na gid ang korapsion.

^ par. 8 Para sa dugang nga impormasyon kon paano ang kamatayon ni Jesus makapatawad sang mga sala, basaha ang kapitulo 5 sang libro nga Ano Gid ang Ginatudlo Sang Biblia? nga ginhimo sang mga Saksi ni Jehova.