Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN OKTUBRE 2012

 Magtuon sa Pulong sang Dios

Mabuhi Ka Bala sing Wala Katapusan?

Mabuhi Ka Bala sing Wala Katapusan?

Makita sa sini nga artikulo ang mga pamangkot nga mahimo ginapaligban mo kag kon diin sa Biblia mabasa ang mga sabat. Nalipay gid ang mga Saksi ni Jehova nga buligan ka sa pagbinagbinag sini.

1. Ngaa kalip-ot lang sang aton kabuhi?

Ang pila ka pawikan nagakabuhi sing 150 ka tuig kag ang pila ka kahoy 3,000 ka tuig. Kon ipaanggid sa ila, mas malip-ot ang kabuhi sang tawo. Pero mas may kahulugan ang aton kabuhi sangsa pawikan ukon kahoy. Gintuga ni Jehova nga Dios ang tawo nga may ikasarang sa pag-apresyar sang musika, sports, pagkaon, pagtuon, pagbiyahe, kag pagpakig-angot sa iban. Ginbutang sang Dios sa aton tagipusuon ang handum nga magkabuhi sing wala katapusan.—Basaha ang Manugwali 3:11.

2. Mabuhi gid bala kita sing wala katapusan?

Si Jehova wala sing katapusan. Indi sia mapatay. Sia ang Ginhalinan sang kabuhi, gani puede niya hatagan sing kabuhi nga wala sing katapusan ang iban. (Salmo 36:9; Habacuc 1:12) Dugang pa, nagpromisa sia nga hatagan sing kabuhi nga wala sing katapusan ang mga nagatuman sa iya. Dulaon niya ang pagtigulang.—Basaha ang Job 33:24, 25; Isaias 25:8; 33:24.

Ginpakita ni Jesus paagi sa iya gamhanan nga mga buhat nga makasalig kita sa promisa sang Dios nga kabuhi nga wala sing katapusan nga may perpekto nga panglawas. Gin-ayo ni Jesus ang madamo nga sahi sang balatian kag ginbanhaw ang mga patay.—Basaha ang Lucas 7:11-15, 18, 19, 22.

 3. San-o mangin matuod ang kabuhi nga wala sing katapusan?

Gusto sang Dios nga mabuhi kita sing wala katapusan, indi sa isa ka kalibutan nga puno sang pagpigos kag kasingki, kundi sa isa ka paraiso sa duta. Gusto niya nga hilway kita sa katalagman. (Salmo 37:9, 29; Isaias 65:21, 22) Kon mangin Paraiso na ang duta, pagabanhawon ang minilyon nga napatay. Mabuhi sing wala katapusan ang mga ginbanhaw nga nagpili nga simbahon kag tumanon ang Dios.—Basaha ang Lucas 23:42, 43; Juan 5:28, 29.

4. Paano naton matigayon ang kabuhi nga wala sing katapusan?

Ang Dios lamang ang makahatag sang kabuhi nga wala sing katapusan. Gani, dapat naton sia kilalahon para mangin suod kita sa iya. Ginpaanggid sang Biblia ang pagkuha sing ihibalo parte sa Dios sa pagkaon. (Mateo 4:4) Makalilipay ang pagkaon, pero ang pagtigayon kag pagpreparar sini nagakinahanglan sing panikasog. Sing kaanggid, ang pagkuha sing espirituwal nga pagkaon nagakinahanglan sing panikasog. Pero may mas maayo pa bala sangsa mangin suod sa Dios kag matigayon ang kabuhi nga wala sing katapusan?—Basaha ang Lucas 13:23, 24; Juan 6:27; 17:3.

 

Magtuon sing Dugang Pa

Ano ang Katuyuan sang Dios Para sa Duta?

Matuman bala ang katuyuan sang Dios nga mangin paraiso ang duta? Kon huo, san-o?