Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN SEPTIEMBRE 2012

 Mangin Suod sa Dios

“Makilala sang mga Pungsud nga Ako Amo ang GINOO”

“Makilala sang mga Pungsud nga Ako Amo ang GINOO”

ANO ang batyagon mo kon pasibangdan ka sang krimen nga wala mo nahimo? Kag ano abi kon ina nga krimen nagapaantos sing grabe sa iban, pati na sa mga inosente? Sigurado gid nga gusto mo tinluan ang imo ngalan! Nahibaluan mo bala nga amo man sina ang ginaatubang ni Jehova? Madamo subong ang nagabasol sa Dios sa inhustisya kag pag-antos sa kalibutan. Gusto bala niya nga matinluan ang iya ngalan? Huo gid! Binagbinaga ang ginasiling sang tulun-an sang Ezequiel.—Basaha ang Ezequiel 39:7.

“Indi ko na pag-itugut nga pasipalahan ang akon balaan nga ngalan,” siling ni Jehova. Kon ginabasol sia sang mga tawo bangod sang inhustisya, ginapasipalahan nila ang iya ngalan. Paano? Sa Biblia, ang “ngalan” masami nga nagapatuhoy sa reputasyon. Ang isa ka reperensia nagasiling nga ang ngalan sang Dios nagapatuhoy sa “kon ano ang nahibaluan parte sa iya—ang pagpakilala niya sang iya kaugalingon; nagarepresentar man ini sa iya kabantugan, kag sa iya dungog.” Ang ngalan ni Jehova nagalakip sang iya reputasyon. Ano ang nahibaluan kay Jehova kon parte sa inhustisya? Ginadumtan niya ini! Naluoy man sia sa mga biktima sini. * (Exodo 22:22-24) Kon pasibangdan sang mga tawo ang Dios nga amo ang responsable sa mga butang nga iya ginakaugtan, ginaguba nila ang iya reputasyon. Gani ‘ginapasipalahan nila ang iya ngalan.’—Salmo 74:10.

Talupangda nga makaduha gingamit ni Jehova ang ekspresyon nga “akon balaan nga ngalan.” (Bersikulo 7) Sa Biblia, madamo nga beses nga gin-angot ang ngalan ni Jehova sa mga termino nga “balaan” kag “pagkabalaan.” Ang tinaga nga “balaan” nagapahangop sang pagkanapain; nagakahulugan man ini sang katinlo kag kaputli. Ang ngalan ni Jehova balaan bangod ang Dios nga nagadala sini balaan—nga napain sing bug-os sa ano man nga makasasala kag di-matinlo. Naintiendihan mo bala kon ngaa ang mga nagabasol kay Jehova sa kalautan nagapasipala gid sa iya “balaan nga ngalan”?

Ang panguna nga tema sang Biblia amo ang katuyuan ni Jehova nga tinluan ang iya ngalan paagi sa iya Ginharian. Ina nga tema ginpadaku sa tulun-an sang Ezequiel, nga sulitsulit nga nagasambit nga “makakilala ang mga pungsud nga Ako amo ang GINOO.” (Ezequiel 36:23; 37:28; 38:23; 39:7) Talupangda nga ang mga pungsod indi magapili kon bala kilalahon nila si Jehova ukon indi. Sa baylo, dapat sila “makakilala.” Buot silingon, katuyuan ni Jehova nga manghikot para pahulagon ang mga pungsod sa duta nga kilalahon kon sin-o sia—si Jehova, ang Soberanong Ginuo, nga ang ngalan nagarepresentar sa tanan nga balaan, putli, kag matinlo.

Ang ginasulitsulit nga promisa nga “makakilala ang mga pungsud nga Ako amo ang GINOO” isa ka maayo nga balita para sa mga nagahandum nga madula na ang inhustisya kag pag-antos. Tumanon ni Jehova sa indi madugay ina nga promisa kag tinluan ang iya ngalan sa tanan nga pasipala. Dulaon niya ang kalautan kag ang nagahimo sini pero luwason niya ang mga nagakilala kag nagarespeto sa iya ngalan kag sa kahulugan sini. (Hulubaton 18:10) Napahulag ka bala nga magtuon kon paano mangin suod kay Jehova, ang balaan nga Dios, nga “nagahigugma sang katarungan”?—Salmo 37:9-11, 28.

Bahin sang Biblia nga mahimo basahon sa Septiembre:

Ezequiel 39-48Daniel 1-3

^ par. 4 Basaha ang artikulo nga “Mangin Suod sa Dios—Mahigugmaon sa Hustisya,” sa Nobiembre 1, 2008, nga gua sang Ang Lalantawan.