Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN SEPTIEMBRE 2012

 Magtuon sa Pulong sang Dios

Ano ang Matabo sa Adlaw sang Paghukom?

Ano ang Matabo sa Adlaw sang Paghukom?

Makita sa sini nga artikulo ang mga pamangkot nga mahimo ginapaligban mo kag kon diin sa Biblia mabasa ang mga sabat. Nalipay gid ang mga Saksi ni Jehova nga buligan ka sa pagbinagbinag sini.

1. Ano ang Adlaw sang Paghukom?

Pareho sa ginapakita sa piktyur sa tuo, ginaimadyin sang madamo nga sa Adlaw sang Paghukom binilyon ang hukman sa atubangan sang trono sang Dios base sa ila mga hinimuan sang una—ang pila padyaan sang kabuhi sa langit, samtang ang iban paantuson sa impierno. Pero ginapakita sang Biblia nga ang katuyuan sang Adlaw sang Paghukom amo ang pagluwas sa mga tawo gikan sa inhustisya. (Salmo 96:13) Gintangdo sang Dios si Jesus nga mangin Hukom nga magapasag-uli sang hustisya sa katawhan.—Basaha ang Isaias 11:1-5; Binuhatan 17:31.

2. Paano ipasag-uli ang hustisya sa Adlaw sang Paghukom?

Sang hungod nga nagrebelde sa Dios ang una nga tawo nga si Adan, ginpaidalom niya ang tanan niya nga kaliwat sa sala, pag-antos, kag kamatayon. (Roma 5:12) Para tadlungon ini, banhawon ni Jesus ang binilyon nga napatay. Ginapahayag sang tulun-an sang Bugna nga matabo ini sa tion sang isa ka libo ka tuig nga paggahom ni Cristo Jesus.—Basaha ang Bugna 20:4, 11, 12.

Pagahukman ang mga ginbanhaw, indi base sa ila nahimo antes sila napatay, kundi sa ila himuon kon mapahayag na ang kaundan sang “mga linukot” nga ginsambit sa Bugna kapitulo 20. (Roma 6:7) Lakip sa mga banhawon kag may kahigayunan nga makatuon parte sa Dios amo ang “mga matarong kag mga di-matarong,” siling ni apostol Pablo.—Basaha ang Binuhatan 24:15.

 3. Ano ang matuman sa Adlaw sang Paghukom?

Yadtong mga napatay nga wala nakakilala kag nakaalagad kay Jehova nga Dios may kahigayunan nga magbag-o kag maghimo sing maayo. Kon himuon nila ini, ang ila pagkabanhaw mangin “pagkabanhaw para sa kabuhi.” Pero ang pila nga ginbanhaw indi gusto magtuon sa mga dalanon ni Jehova. Ang ila pagkabanhaw mangin “pagkabanhaw para sa paghukom.”—Basaha ang Juan 5:28, 29; Isaias 26:10; 65:20.

Sa katapusan sang isa ka libo ka tuig nga Adlaw sang Paghukom, mapasag-uli na ni Jehova ang matinumanon nga mga tawo sa ila orihinal nga perpekto nga kahimtangan. (1 Corinto 15:24-28) Isa gid ini ka maayo nga palaabuton para sa mga matinumanon! Sa katapusan nga pagtilaw, buy-an sang Dios si Satanas nga Yawa halin sa kadadalman, nga ginpriso didto sing isa ka libo ka tuig. Tilawan niya liwat nga patalikdon ang mga tawo kay Jehova, pero ang indi magpadala kay Satanas magakabuhi sa duta sing wala katapusan.—Basaha ang Isaias 25:8; Bugna 20:7-9.

4. Ano pa nga adlaw sang paghukom ang magapakamaayo sa mga tawo?

Ginagamit man sang Biblia ang termino nga “adlaw sang paghukom” para patuhuyan ang hitabo nga magalaglag sa sistema sang mga butang subong. Ini nga adlaw sang paghukom magaabot sing hinali pareho sa Anaw sang adlaw ni Noe nga naglaglag sa tanan nga malaut sadto. Pero ang nagapakari nga kalaglagan sang “di-diosnon nga mga tawo” magabukas sang dalan para sa bag-o nga katilingban sa duta diin “magapuyo ang pagkamatarong.”—Basaha ang 2 Pedro 3:6, 7, 13.

 

Magtuon sing Dugang Pa

Adlaw sang Paghukom—Ano Ini?

Tun-i kon paano ang Adlaw sang Paghukom mangin pagpakamaayo sa tanan nga matutom nga tawo.