Magdiretso sa kaundan

Magdiretso sa listahan sang kaundan

 Mangin Suod sa Dios

Ginadumtan ni Jehova ang Inhustisya

Ginadumtan ni Jehova ang Inhustisya

“ANG isa ka tawo may gahum sa isa sa iya kasamaran.” (Manugwali 8:9) Ini nga mga pulong nga ginsulat mga 3,000 ka tuig na ang nagligad, sibu nga nagalaragway sa kalibutan nga ginaistaran naton. May huyog ang mga tawo nga abusuhan ang ila gahom, bisan sin-o man sia ukon diin man sia nagaistar. Masami ginabiktima nila ang mga maluya kag mga imol. Ano ang ginabatyag ni Jehova sa sining mga inhustisya? Makita naton ang sabat sa Ezequiel 22:6, 7, 31.—Basaha.

Sa iya Kasuguan sa Israel, gin-athag ni Jehova nga ang ara sa posisyon indi dapat mag-abuso sang ila gahom. Pakamaayuhon lamang niya ang pungsod kon ang mga lider sini magtratar sing mainayuhon sa mga kubos kag imol. (Deuteronomio 27:19; 28:15, 45) Pero sang panahon ni Ezequiel, gin-abusuhan sang mga pangulo sa Jerusalem kag Juda ang ila gahom. Ano ang natabo?

Ang mga pangulo naggamit sang ila ‘gahum sa pagpaagay sing dugo.’ (Bersikulo 6) Ang tinaga nga “gahum” nagarepresentar sa awtoridad. Paano magluntad ang hustisya kon ang mga lider nga amo dapat ang mag-amlig kag magpasanyog sang katarungan nagaabuso sang ila gahom kag nagapatay sang mga inosente?

Pagkatapos sini, gin-akusahan ni Ezequiel indi lamang ang mga lider kundi ang mga nagasunod man sa ila sa pagsupak sa Kasuguan ni Jehova. “Ang amay kag ang iloy gintamay,” siling ni Ezequiel. (Bersikulo 7) Paagi sa pagsikway sang katungdanan sang mga ginikanan, ginguba nila ang panguna nga pundasyon sang pungsod—ang pamilya.—Exodo 20:12.

Ginhingalitan sang malaut nga mga tawo ang mga makaluluoy. Sa kada tion nga supakon nila ang Kasuguan, ginapakita nila nga ginasikway nila ang mahigugmaon nga espiritu sa likod sang Kasuguan sang Dios sa Israel. Halimbawa, ang Kasuguan sang Dios nagsugo sa mga Israelinhon nga magpakita sing pinasahi nga konsiderasyon sa mga indi Israelinhon nga nagaistar sa tunga nila. (Exodo 22:21; 23:9; Levitico 19:33, 34) Pero “ginpigus [sang mga tawo] ang manlulugayaw.”—Bersikulo 7.

Ginmaltrato man sang mga tawo ang mga indi makapangapin—ang “ilo kag ang balong babayi.” (Bersikulo 7) Nagaulikid gid si Jehova sa mga namatyan sing ginikanan ukon tiayon. Ang Dios nagpromisa nga sia mismo magalaglag sang mga nagapigos sa makaluluoy nga bata ukon balo nga babayi.—Exodo 22:22-24.

Sa sini kag sa iban pa nga paagi, ang mga Israelinhon sang adlaw ni Ezequiel nagsupak sang Kasuguan sang Dios kag wala magrespeto sa sini. Ano ang himuon ni Jehova? ‘Iula ko ang akon kaalipungut sa ila,’ promisa niya. (Bersikulo 31) Nangin matuod ang iya pinamulong kay gintugutan niya ang mga Babilonianhon nga laglagon ang Jerusalem kag ginbihag ang iya katawhan sang 607 B.C.E.

Ang mga pinamulong ni Ezequiel nagatudlo sa aton sang duha ka leksion parte kay Jehova kag sa inhustisya: Una, ginadumtan niya ini; ikaduha, naluoy sia sa inosente nga mga biktima. Wala nagbag-o ang Dios. (Malaquias 3:6) Nagpromisa sia nga dulaon niya sa indi madugay ang inhustisya kag ang mga nagahimo sini. (Hulubaton 2:21, 22) Ngaa indi mo pagtun-an ang parte sa Dios nga “nagahigugma sang katarungan” kag kon paano ka mangin suod pa sa iya?—Salmo 37:28.

Bahin sang Biblia nga Mahimo basahon sa Agosto:

Ezequiel 21-38

[Blurb sa pahina 27]

Gin-athag ni Jehova nga ang ara sa posisyon indi dapat mag-abuso sang ila gahom