Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

ANG LALANTAWAN HUNYO 2012

 Tudlui ang Inyo Kabataan

Tig-a Ulo Sia Pero Nagtuman Man sang Ulihi

Tig-a Ulo Sia Pero Nagtuman Man sang Ulihi

TIG-A ulo ka man bala kag wala nagapati? * Basi nagalantaw ka sang palaguaon sa TV nga ginsiling ni Nanay kag ni Tatay mo nga indi pagtan-awon. Basi napensaran mo ini sang ulihi kag naghinulsol ka kay wala ka nagpati. Ang ngalan sang isa ka tawo nga wala nagpati sang primero amo si Naaman. Tan-awon naton kon paano sia ginbuligan nga indi na mangin tig-a ulo.

Imadyina nga nagakabuhi kita mga 3,000 ka tuig ang nagligad. Si Naaman isa ka kilala nga kumander sang militar sa Siria. Naanad sia nga mandaran ang iya mga soldado, kag nagapati sila sa iya. Pero gintubuan sia sang aro. Bangod sini, makaluluoy sia tan-awon kag mahimo nasakitan gid sia.

Ang asawa ni Naaman may isa ka suluguon nga bata nga taga-Israel. Isa ka adlaw, ginsugiran sang bata ang iya ama parte sa isa ka tawo nga si Eliseo didto sa ila pungsod. Nagsiling ang bata nga maayo ni Eliseo si Naaman. Sang nabatian ini ni Naaman, gusto niya kadtuan dayon si Eliseo. Nagdala sia sang madamo nga regalo kag nagkadto sa Israel upod sa iya mga soldado. Nagkadto sia sa hari sang Israel para pahibal-on ini kon ngaa ari sia.

Nahibaluan ni Eliseo ang parte sa sini kag nagpadala sang mensahe para sa hari nga pakadtuon si Naaman sa iya. Sang nag-abot si Naaman sa balay ni Eliseo, may ginsugo lang sia nga hambalon si Naaman nga maligo lang sing pito ka beses sa Suba Jordan. Nagsiling si  Eliseo nga paagi sini magaayo sia. Ano sa banta mo ang ginbatyag ni Naaman?

Naakig sia. Nangin tig-a ulo sia kag wala nagtuman sa propeta sang Dios. Ginsilingan niya ang iya mga soldado: ‘Madamo sang mas maayo nga suba nga paliguan sa aton.’ Nagbiya sia dayon. Pero kabalo ka bala kon ano ang ginpamangkot sang iya mga soldado?— ‘Kon mabudlay ang ipahimo sa imo sang manalagna, indi mo bala ini paghimuon? Gani, ngaa indi mo pagtumanon ining mahapos nga butang nga ginasugo niya sa imo?’

Namati si Naaman kag gintuman ang ginsiling sang iya mga soldado. Anom ka beses sia nga naligo sa suba. Sang pagbutwa niya sang ikapito nga tion, nakibot sia kay wala na ang iya aro! Maayo na sia. Nagkadto sia dayon sa balay ni Eliseo nga mga 48 kilometros ang kalayuon para pasalamatan ini. Gusto niya hatagan si Eliseo sang malahalon nga mga regalo, pero indi magbaton ang propeta.

Gani may ginpangabay si Naaman kay Eliseo. Nahibaluan mo bala kon ano?— ‘Hatagi ako sing duta nga makarga sang duha ka mula.’ Nahibaluan mo bala kon ngaa nangayo sia sini?— Nagsiling si Naaman nga gusto niya maghalad sa Dios sa duta halin sa pungsod sang katawhan sang Dios, ang Israel. Dayon, nagpromisa si Naaman nga indi na gid sia magsimba sa iban nga dios luwas kay Jehova! Indi na sia tig-a ulo kundi handa magtuman sa matuod nga Dios.

Paano mo mailog si Naaman?— Kon tig-a ulo ka pareho sa iya, puede ka man magbag-o. Magpabulig ka kag indi na mangin matig-a sing ulo.

Basaha sa imo Biblia

^ par. 3 Kon ginabasa mo ini sa bata, magdulog ka kon makita mo ang dash kag pasabta sia.