Magdiretso sa kaundan

Magdiretso sa listahan sang kaundan

 Pamangkot sang mga Bumalasa . . .

Ngaa Nagawali sa mga Balay ang mga Saksi ni Jehova?

Ngaa Nagawali sa mga Balay ang mga Saksi ni Jehova?

▪ Sa Biblia, mabasa naton ini nga sugo ni Jesus sa iya mga sumulunod: “Busa lakat kamo kag maghimo sang mga disipulo sa mga tawo sang tanan nga pungsod, . . . nga nagapanudlo sa ila.” (Mateo 28:19, 20) Para bala ini sa tanan nga Cristiano? Amo sini ang pag-intiende sang mga disipulo sadto ni Jesus. Halimbawa, si apostol Pedro nagsiling: “Ginsugo niya [Jesus] kami nga magbantala sa mga tawo kag magpanaksi sing maid-id.” (Binuhatan 10:42) Kag si apostol Pablo nagsulat: “Kinahanglan nga himuon ko ini. Sa pagkamatuod, kailo ako kon indi ko pag-ipahayag ang maayong balita!”—1 Corinto 9:16.

Indi lamang sanday Pablo kag Pedro ang nagtuman sang sugo ni Jesus kundi ang mga Cristiano man sang unang siglo. Pinakaimportante para sa ila ang pagwali. (Binuhatan 5:28-32, 41, 42) Amo man sini ang ginahimo sang mga Saksi ni Jehova subong. Ang ila ginawali pareho man sa mensahe ni Jesus, “ang ginharian sang langit.”—Mateo 10:7.

Sin-o ang dapat walihan sang mensahe sang Ginharian? Ginpakita ni Jesus nga dapat ini iwali sa tanan nga tawo. Ginsilingan niya ang iya mga disipulo: “Mangin saksi ko kamo . . . tubtob sa ukbong sang duta.” (Binuhatan 1:8) Gintagna pa gani niya nga antes mag-abot ang katapusan sini nga sistema, “ining maayong balita sang ginharian ibantala sa bug-os napuy-an nga duta subong panaksi.” (Mateo 24:14) Gani gintinguhaan sang mga Cristiano sang unang siglo nga walihan ang tanan nga tawo, indi lamang ang ila mga kilala ukon ang mga tawo nga wala sing relihion. (Colosas 1:23; 1 Timoteo 2:3, 4) Ginatinguhaan man sang mga Saksi ni Jehova subong nga walihan ang tanan. *

Ano ang pinakaepektibo nga paagi sa pagwali sang mensahe sang Ginharian? Si Jesus, nga nakahibalo kon paano lab-uton ang pinakamadamo nga tawo, nagpadala sang iya mga disipulo sa mga siudad, minuro, kag sa mga balay. (Mateo 10:7, 11, 12) Sa tapos mabanhaw si Jesus, ginpadayon sang iya mga disipulo ang pagbantala “sa mga balay.” (Binuhatan 5:42) Pareho kay Jesus, nagwali man sila bisan diin nila masumalang ang mga tawo. (Juan 4:7-26; 18:20; Binuhatan 17:17) Amo man sini ang ginahimo sang mga Saksi ni Jehova subong.

Ginpakita ni Jesus nga indi tanan mamati. (Mateo 10:14; 24:37-39) Magapugong bala ini sa mga Cristiano sa pagwali? Binagbinaga ini nga pagpaanggid: Kon miembro ka sang rescue team pagkatapos sang mabaskog nga linog, mauntat ka na bala sa pagpangita kay diutay lang ang imo naluwas? Indi, kundi magapadayon ka asta may posibilidad nga may maluwas ka pa. Ginsugo ni Jesus ang iya mga disipulo nga magpadayon asta may posibilidad pa nga makakita sang mga mamati sa maayong balita sang Ginharian sang Dios. (Mateo 10:23; 1 Timoteo 4:16) Paagi sa pagwali sa mga balay, ginapakita sang mga Saksi ni Jehova ang ila gugma sa Dios kag sa ila isigkatawo, nga mahimo maluwas kon mamati sila sa mensahe sang Ginharian kag batunon ini.—Mateo 22:37-39; 2 Tesalonica 1:8.

Ang magasin nga imo ginabasa nagasugid sang mensahe sang Biblia. Para sa dugang nga impormasyon, istoryaha ang mga Saksi ni Jehova kon magbisita sila sa imo, ukon magsulat sa manugbalhag sini nga magasin.

[Nota]

^ par. 5 Ang mga Saksi ni Jehova nagawali subong sa 236 ka pungsod. Sang nagligad nga tuig, 1.7 bilyones ka oras ang gingamit nila sa pagwali kag 8.5 milyones ka tawo ang ila ginatun-an sa Biblia sa bilog nga kalibutan.