Kon Paano Mangin Debotado kag Responsable nga Pumuluyo

ANO ang duha ka katuyuan sang ministeryo ni Jesus? Una, gusto ni Jesus nga bag-uhon ang tagipusuon sang tawo, indi ang pulitika. Halimbawa, talupangda ang ginpadaku ni Jesus sa iya Sermon sa Bukid. Antes niya sambiton ang kinahanglanon nga mangin kaangay sang asin kag kapawa, ginsilingan niya ang iya mga tagpalamati nga ang matuod nga kalipay yara sa mga “mahunahunaon sang ila espirituwal nga kinahanglanon.” Nagsiling pa sia: “Malipayon ang mga malulo, . . . ang mga putli sing tagipusuon, . . . ang mga makihidaiton.” (Mateo 5:1-11) Ginpahangop ni Jesus sa iya mga sumulunod nga importante nga ipasibu ang ila panghunahuna kag ginabatyag sa mga prinsipio sang Dios sa kon ano ang maayo kag malain kag alagaron ang Dios sing bug-os tagipusuon.

Ikaduha, sang nakita ni Jesus ang pag-antos sang mga tawo, napahulag sia sang iya kaluoy nga pahaganhaganon ang ila ginabatyag. Pero wala niya gintuyo nga dulaon ang tanan nga pag-antos. (Mateo 20:30-34) Gin-ayo niya ang mga tawo, pero wala madula ang mga balatian. (Lucas 6:17-19) Ginpaumpawan niya ang mga ginpigos, pero padayon gihapon ang inhustisya. Ginpakaon niya ang mga gutom, pero may tiggulutom gihapon.—Marcos 6:41-44.

Pagbag-o sang Tagipusuon kag Pagpahaganhagan sang Pag-antos

Ngaa nagpokus si Jesus sa pagbag-o sang tagipusuon kag pagpahaganhagan sang pag-antos sa baylo nga bag-uhon ang pulitika ukon dulaon ang mga problema? Nahibaluan niya nga katuyuan sang Dios nga gamiton ang Iya Ginharian sa palaabuton para dulaon ang tanan nga gobierno kag ang mga kabangdanan sang tanan nga pag-antos. (Lucas 4:43; 8:1) Gani, sang isa ka bes nga ginpangabay sia sang iya mga disipulo nga ayuhon pa ang mga masakiton, ginsilingan niya sila: “Makadto kita sa iban nga duog, sa malapit nga mga banwa, agod makabantala man ako didto, kay sa sini nga katuyuan nagkari ako.” (Marcos 1:32-38) Ginpahaganhagan ni Jesus ang pag-antos sang madamo, pero mas importante sa iya ang pagwali kag pagtudlo sang pulong sang Dios.

Sa ila pagwali subong, ginailog sang mga Saksi ni Jehova si Jesus. Napahulag sila nga pahaganhaganon ang pag-antos paagi sa pagbulig sa mga bululigan. Pero wala nila ginatinguhaan nga dulaon ang inhustisya. Nagapati sila nga ang Ginharian sang Dios ang magadula sang mga kabangdanan sang tanan nga pag-antos. (Mateo 6:10) Pareho kay Jesus, gusto nila bag-uhon ang tagipusuon, indi ang pulitika. Realistiko gid ina, kay ang gamot sang problema indi ang pulitika, kundi ang moral.

Responsable nga mga Pumuluyo

Nagapati man ang mga Saksi ni Jehova nga responsibilidad nila bilang mga Cristiano nga mangin maayo nga mga pumuluyo. Gani, ginatahod nila ang gobierno. Paagi sa ila mga balasahon kag pagwali, ginapalig-on nila ang iban nga magsunod sa layi. Pero kon may ipatuman ang gobierno nga supak sa sugo sang Dios, wala nila ini ginasunod. ‘Ginatuman nila ang Dios subong manuggahom sa baylo  sang mga tawo.’—Binuhatan 5:29; Roma 13:1-7.

Ginatanyagan sang libre nga pagtuon sa Biblia sang mga Saksi ni Jehova ang mga tawo sa ila komunidad. Gani, minilyon ka tagipusuon ang nabag-o. Kada tuig, linibo ang nabuligan nga mauntatan ang pagpanigarilyo, pagpahubog, pagdroga, pagpanahor, kag imoralidad. Nangin responsable sila nga mga pumuluyo bangod gin-aplikar nila ang mga prinsipio sa Biblia.—Basaha ang artikulo nga “Ang Biblia Nagapabag-o sang Kabuhi,” sa pahina 18 sini nga magasin.

Dugang pa, ang pagtuon sa Biblia makabulig sa pamilya nga tahuron ang isa kag isa kag pauswagon ang komunikasyon sa tunga sang mag-asawa, ginikanan kag kabataan, kag mag-ulutod. Nagabulig ini nga maglig-on ang pamilya. Kon malig-on ang pamilya, malig-on man ang komunidad.

Sa tapos mausisa ang mga punto sa sini nga mga artikulo, ano sa banta mo: Ginakahamut-an bala sang Biblia ang mga tawo nga nagasimpon sang relihion kag pulitika? Maathag ang sabat; wala. Pero dapat bala mangin responsable nga mga pumuluyo ang matuod nga mga Cristiano? Dapat lang. Paano? Paagi sa pagtuman sa ginsiling ni Jesus nga mangin kaangay sang asin kag kapawa sa kalibutan.

Ang mga nagatinguha nga iaplikar ini nga mga panudlo sang Cristo makatigayon sang mga pagpakamaayo, pati na ang ila pamilya kag komunidad. Nalipay ang mga Saksi ni Jehova sa inyo lugar nga buligan ka sa pagtuon sa Biblia. *

[Nota]

^ par. 12 Kon gusto mo, mahimo mo man kontakon ang mga Saksi ni Jehova sa www.watchtower.org

[Blurb sa pahina 10]

Gusto ni Jesus nga bag-uhon ang tagipusuon sang tawo, indi ang pulitika

[Blurb sa pahina 11]

Nagapati ang mga Saksi ni Jehova nga responsibilidad nila nga mangin maayo nga mga pumuluyo