Ang Biblia Nagapabag-o sang Kabuhi

ANO ang nasapwan sang isa ka tawo nga taga-Scotland nga mas maayo pa sangsa matin-ad nga negosyo? Ano ang nakabulig sa isa ka tawo nga taga-Brazil nga bag-uhon ang iya imoral nga pagkabuhi kag untatan ang pagdroga? Paano nauntatan sang isa ka tawo nga taga-Slovenia ang pagpahubog? Basaha kon ano ang ila ginsiling.

“Daw Kanami Lang sang Akon Kabuhi.”—JOHN RICKETTS

NATAWO: 1958

PUNGSOD: SCOTLAND

KABUHI SANG UNA: MADINALAG-ON NGA NEGOSYANTE

ANG AKON NAGLIGAD: Nagdaku ako nga may masulhay nga pagkabuhi. Ang akon amay isa ka opisyal sang British army, gani pirme kami nagasaylosaylo. Luwas sa Scotland, nakaistar man kami sa England, Germany, Kenya, Malaysia, Ireland, kag Cyprus. Sugod sang otso anyos ako, nag-eskwela ako sa mga boarding school sa Scotland. Sang ulihi, nakagradweyt ako sa Cambridge University.

Sang 20 anyos ako, ginsugdan ko ang walo ka tuig nga negosyo sa langis. Sang primero, didto sa South America, dayon sa Aprika, kag sang ulihi sa Western Australia. Sang nagsaylo ako sa Australia, nagtukod ako sang investment firm nga ginbaligya ko man sang ulihi.

Daku nga kantidad ang nakuha ko sa sini, amo nga sa edad nga 40 nagretiro na ako. Madamo na ako sang tion sa pagbiyahe. Duha ka beses ko nga nalibot ang Australia sakay sa motorsiklo. Nakabiyahe man ako sa bilog nga kalibutan. Daw kanami lang sang akon kabuhi.

KON PAANO GINBAG-O SANG BIBLIA ANG AKON KABUHI: Antes pa ako magretiro, nagapangita na ako sang paagi nga mapasalamatan ang Dios sa akon malipayon nga kabuhi. Nagsimba ako sa Anglican Church nga amo ang akon namat-an. Pero ang kalabanan nga panudlo sini wala naghalin sa Biblia. Gani nagtuon ako sa mga Mormon, pero nadulaan man ako sang interes kay wala sila nagagamit sang Biblia.

Isa ka adlaw, ginbisitahan ako sang mga Saksi ni Jehova. Nakita ko dayon nga ginabase gid nila ang ila mga panudlo sa Biblia. Ginbasa nila sa akon ang 1 Timoteo 2:3, 4. Nagasiling ini nga kabubut-on sang Dios nga “ang tanan nga sahi sang mga tawo maluwas kag makadangat sa sibu nga ihibalo tuhoy sa kamatuoran.” Nagdayaw gid ako kay ginpadaku nila indi lamang ang ihibalo kundi ang sibu nga ihibalo base sa Biblia.

Natigayon ko inang sibu nga ihibalo paagi sa pagtuon sa Biblia sa mga Saksi ni Jehova. Halimbawa, natun-an ko nga ang Dios kag si Jesus indi  gali bahin sang Trinidad kundi magkatuhay nga persona. (Juan 14:28; 1 Corinto 11:3) Nalipay gid ako nga mahibaluan ini. Naugot man ako kay gin-uyangan ko lang ang akon tion sang una nga intiendihon ang butig nga doktrina sang Trinidad!

Nagtambong ako gilayon sa mga pagtilipon sang mga Saksi ni Jehova. Nagdayaw gid ako sa ila pagkamainabyanon kag sang ila mataas nga prinsipio sa moral—daw mga santo sila. Ang ila matuod nga gugma nagkumbinsi sa akon nga nasapwan ko na ang matuod nga relihion.—Juan 13:35.

MGA BENEPISYO: Sa tapos ako nabawtismuhan, nakilala ko ang matahom nga dalaga nga si Diane. Nagdaku sia nga Saksi ni Jehova, kag madamo sia sing maayo nga kinaiya nga nanamian ko gid. Sang ulihi, nagpakasal kami. Ang iya pagpakig-abyan kag suporta isa gid ka pagpakamaayo halin kay Jehova.

Gusto gid namon magsaylo sa lugar diin mas daku ang kinahanglan nga manugwali sang maayong balita sa Biblia. Sang 2010, nagsaylo kami sa Belize, Central America. Ginwalihan namon diri ang mga tawo nga nagahigugma sa Dios kag ginauhaw gid sa ihibalo parte sa Biblia.

May kalinong na ako sa hunahuna kay nahibaluan ko na ang kamatuoran parte sa Dios kag sa iya Pulong, ang Biblia. Nalipay ako kay daku nga tion ang akon ginagamit sa pagtudlo sa iban parte sa Biblia. Wala na sing mas maayo pa sangsa makita mo nga ginabag-o sang kamatuoran sa Biblia ang kabuhi sang isa—pareho sang natabo sa akon. Nasapwan ko gid man ang pinakamaayo nga paagi nga pasalamatan ang Dios sa akon malipayon nga pagkabuhi.

“Maayo Gid Sila sa Akon.”—MAURÍCIO ARAÚJO

NATAWO: 1967

PUNGSOD: BRAZIL

KABUHI SANG UNA: IMORAL

ANG AKON NAGLIGAD: Nagdaku ako sa Avaré, isa ka gamay nga banwa sa São Paulo. Ang kalabanan nga nagaistar diri may trabaho.

Napatay si Tatay sang ginabusong pa lang ako. Sang bata pa ako, ginasuksok ko ang bayo ni Nanay kon wala sia. Nangin babayin-on ako, kag gintawag ako sang mga tawo nga agi. Sang ulihi, nag-sex na ako sa iban nga lalaki.

Sang manugbeinte na ako, nagapangita ako sang maka-sex (lalaki man ukon babayi) bisan diin—sa mga bar, klab, kag bisan sa mga simbahan. Kon karnabal, nagasuksok ako sang pangbabayi kag nagasaot sa parada sang samba. Nangin bantog gid ako.

Mga agi, prostityut, kag adik ang akon mga abyan. Ang iban sa ila nag-impluwensia sa akon nga tilawan ang crack cocaine, kag sang ulihi naadik ako. Kon kaisa, bilog nga gab-i kami nga nagasuyop. May mga tion man gani nga nagapabukot ako kag nagasuyop bilog nga adlaw. Nagniwang gid ako kag ginbatibati nga may AIDS.

KON PAANO GINBAG-O SANG BIBLIA ANG AKON KABUHI: Sina man nga tion, nakilala  ko ang mga Saksi ni Jehova. Maayo gid sila sa akon. Ang isa sa mga teksto nga ginbasa nila sa akon amo ang Roma 10:13 nga nagasiling: “Ang tagsatagsa nga nagatawag sa ngalan ni Jehova maluwas.” Natun-an ko nga importante gali nga gamiton ang ngalan ni Jehova. Madamo nga tion nga sa tapos ako makasuyop sa bilog nga gab-i, ginabuksan ko ang bintana, nagatangla sa langit, kag nagapangamuyo kay Jehova nga nagahibi, kag nagapakitluoy nga buligan niya ako.

Naluoy gid ako kay Nanay bangod nasubuan sia nga makita nga ginaguba ko ang akon kabuhi paagi sa droga. Gani nagdesisyon ako nga untatan ini. Pagkatapos sina, nagtuon ako sa Biblia upod sa mga Saksi. Ginpasalig nila ako nga ang pagtuon makabulig sa akon nga mauntatan ang pagdroga. Kag amo gid sina ang natabo!

Samtang nagatuon ako, narealisar ko nga dapat ko bag-uhon ang akon pagkabuhi. Mabudlay gid untatan ang ginahimo sang isa ka agi, kay amo na ako sini halin sang bata pa. Pero nakabulig gid sa akon ang pagbag-o sang akon kaupdanan. Ginbiyaan ko ang mga abyan ko sadto kag wala na ako nagkadto sa mga bar kag klab.

Bisan pa mabudlay ini himuon, makapaumpaw mahibaluan nga nagakabalaka si Jehova sa akon kag naintiendihan niya ang akon kabudlayan. (1 Juan 3:19, 20) Sang 2002, nauntatan ko ang tanan nga ginahimo sang agi, kag sina nga tuig nabawtismuhan ako bilang Saksi ni Jehova.

MGA BENEPISYO: Nalipay gid si Nanay sa mga pagbag-o nga ginhimo ko, gani nagtuon man sia sa Biblia. Sing makapasubo, naistrok sia. Pero padayon nga nag-uswag ang iya gugma kay Jehova kag sa kamatuoran sa Biblia.

Walo ka tuig na nga gingamit ko ang akon daku nga tion sa pagtudlo sa iban parte sa Biblia. Kon kaisa, ginapakigbatuan ko gihapon ang akon indi husto nga balatyagon. Pero ginadumdom ko nga kon mabatuan ko ini, malipay si Jehova sa akon.

Nagdugang ang akon pagtahod sa kaugalingon kay nangin suod ako kay Jehova kag nagkabuhi sa paagi nga nagapahalipay sa iya. Subong, isa na ako ka malipayon nga lalaki.

“Daw Busluton Ako nga Dram.”—LUKA ŠUC

NATAWO: 1975

PUNGSOD: SLOVENIA

KABUHI SANG UNA: PALAHUBOG

ANG AKON NAGLIGAD: Natawo ako sa Ljubljana, ang kapital sang Slovenia. Masadya ang akon kabuhi sang bata pa ako. Pero sang apat ka tuig na ako, naghikog si Tatay. Gani dapat magbakabaka si Nanay para saguron kami nga duha sang akon magulang nga lalaki.

Sang 15 anyos na ako, nagsaylo ako kay Lola. Nanamian ako mag-istar didto kay madamo ako sang abyan sa ila lugar. Makapagusto man ako didto  sangsa balay. Sang 16 anyos na ako, nakig-upod ako sa mga tawo nga nagainom kon Sabado kag Domingo. Ginpalaba ko ang akon buhok, rebelyuso ang akon pamayo, kag sang ulihi nanigarilyo ako.

Bisan pa gintilawan ko ang lainlain nga droga, wala ko gin-untatan ang pag-inom kay mas nanamian ako sini. Sang primero, pila lang ka baso ang akon ginainom pero sang ulihi binotelya na. Indi mabal-an sang iban nga hubog na ako kay sagad ako magtago. Mabal-an lang nila nga nakainom ako kon mapanimahuan nila nga baho ako ilimnon. Pero wala sila nakahibalo nga pila na gali ka litro ang naubos ko nga alak ukon beer nga nasimbugan sing vodka!

Ako pa gani pirme ang nagaagubay sa akon mga abyan kon magpauli kami halin sa diskohan, bisan pa doble ang akon nainom sangsa ila. Isa ka adlaw, nabatian ko ang isa ko ka abyan nga nagsiling nga daw busluton ako nga dram—isa ka makahuluya nga termino sa Slovenia para sa isa nga mas madamo sang nainom sangsa iban. Nasakitan gid ako sa sini.

Ginpamensaran ko kon ano ang ginahimo ko sa akon kabuhi. Nagbatyag ako nga wala sing pulos. Daw wala ako sing nahimo nga maayo.

KON PAANO GINBAG-O SANG BIBLIA ANG AKON KABUHI: Sina man nga tion, nakita ko ang pagbag-o sang isa ko ka klasmeyt. Nangin mabuot na sia. Bangod natingala ako sa iya pagbag-o, ginhagad ko sia sa restawran. Nagsiling sia nga nagatuon sia sa Biblia upod sa mga Saksi ni Jehova. Ginsugid niya sa akon ang pila sang iya natun-an nga subong ko pa lang gid nahibaluan kay wala gid ako natudluan parte sa relihion. Nagtambong ako dayon sa mga pagtilipon sang mga Saksi kag nagtuon sa Biblia upod sa ila.

Nabuksan ang akon mga mata sa kamatuoran paagi sa pagtuon sa Biblia. Halimbawa, natun-an ko nga nagakabuhi na kita subong sa ginatawag sang Biblia nga “katapusan nga mga adlaw.” (2 Timoteo 3:1-5) Natun-an ko man nga malapit na lang dulaon sang Dios ang malain nga mga tawo kag ang mga maayo paistaron niya sing wala katapusan sa Paraiso sa duta. (Salmo 37:29) Gusto ko gid nga tinluan ang akon kabuhi para malakip ako sa maayo nga mga tawo.

Ginsugiran ko ang akon mga abyan sang kamatuoran sa Biblia nga akon natun-an. Kalabanan sa ila nagpakalain sa akon, pero nangin pagpakamaayo pa gani ini. Narealisar ko nga indi sila matuod nga mga abyan kag sila ang kabangdanan sang akon problema sa pag-inom. Kada semana, nagadali sila nga mag-Sabado kag Domingo para makapahubog naman sila.

Wala na ako nakig-abyan sa ila. Nakig-upod na ako sa mga Saksi ni Jehova. Napalig-on gid ako mag-upod sa ila kay ginahigugma nila ang Dios kag ginasunod ang iya mga prinsipio. Sang ulihi, nauntatan ko gid man ang pagpahubog.

MGA BENEPISYO: Nagapasalamat ako kay Jehova kay indi ko na kinahanglan mag-inom para mangin malipayon. Ambot kon ano na ayhan ang natabo sa akon kon wala ko gin-untatan ang akon bisyo. Pero kumbinsido ako nga mas maayo na ang akon kabuhi subong.

Pito ka tuig na ako nga nagaalagad sa sanga talatapan sang mga Saksi ni Jehova sa Slovenia. May kahulugan na ang akon kabuhi kay nakilala ko si Jehova kag ginaalagad sia.