Pagpangita sang mga Sabat

“Halos tanan nga tawo may ideya kon sin-o [si Jesus]. Mabakod man ukon maluya ang aton pagtuo, tanan kita nagapamangkot, ‘Sin-o ini nga tawo?’”—STAN GUTHRIE, ISA KA AWTOR.

INTERESADO gid ang mga tawo kay Jesus. Bantog gid ang mga libro kag mga pelikula parte sa iya. Pero madamo gihapon sang pamangkot parte kay Jesus kag may lainlain nga opinyon kon sin-o gid sia.

Sang nagligad nga mga tinuig, gin-agda sang duha ka dyurnalista ang mga tawo nga sabton ang pamangkot sa Internet nga “Sin-o si Jesus?” Ari ang pila sa ila mga sabat:

● “Para sa akon, isa sia ka rabbi (manunudlo) nga nangin huwaran sang kaayo.”

● “Ordinaryo lang sia nga tawo, pero pinasahi ang iya kabuhi.”

● “Wala sing ebidensia nga nagluntad si Jesus.”

● “Si Jesus Anak sang Dios nga natawo, napatay, kag nabanhaw para luwason kita sa aton mga sala. Nagakabuhi Sia subong, kag mabalik Sia liwat sa duta.”

● “Nagapati ako nga si Jesucristo bugtong nga anak sang Dios. Isa sia ka tawo kag isa man ka dios.”

● “Ginhimuhimo lang ang istorya parte kay Jesus, nga ginapatihan sang mga hamtong.”

Maathag nga ining lainlain nga opinyon indi tanan eksakto. Kon amo, may makahatag bala sing husto nga sabat sa aton mga pamangkot parte kay Jesus? Ang naghimo sini nga magasin nagapati nga ang Biblia amo ang Pulong sang Dios kag ini lamang ang nagasugid sang kamatuoran parte kay Jesus. *2 Timoteo 3:16.

Sa masunod nga artikulo, binagbinagon naton ang mga sabat sang Biblia sa pila ka pamangkot parte kay Jesus. Sia mismo nagsiling nga ang dalan padulong sa kaluwasan bukas sa “tagsatagsa nga nagatuo sa iya.” (Juan 3:16) Palihug usisaa ang mga sabat kag binagbinaga kon bala dapat mo dugangan ang imo nahibaluan parte kay Jesus kag kon paano mo ipakita ang pagtuo sa iya.

[Nota]

^ par. 11 Para sa dugang nga impormasyon, basaha ang kapitulo 2, “Ang Biblia—Isa ka Libro Gikan sa Dios,” sang libro nga Ano Gid ang Ginatudlo Sang Biblia? nga ginhimo sang mga Saksi ni Jehova.