Magdiretso sa kaundan

Magdiretso sa listahan sang kaundan

“Ining Maayong Balita sang Ginharian Ibantala”

“Ining Maayong Balita sang Ginharian Ibantala”

 “Ining Maayong Balita sang Ginharian Ibantala”

“Ining maayong balita sang ginharian ibantala sa bug-os napuy-an nga duta subong panaksi sa tanan nga pungsod; kag nian magaabot ang katapusan.”—MATEO 24:14.

Ano ang Buot Silingon Sini? Ang manunulat sang Ebanghelyo nga si Lucas nagsiling nga “naglibot [si Jesus] sa mga siudad kag mga minuro, nga nagabantala kag nagapahayag sang maayong balita sang ginharian sang Dios.” (Lucas 8:1) Si Jesus mismo nagsiling: “Dapat ko ibantala ang maayong balita sang ginharian sang Dios, kay tungod sini ginpadala ako.” (Lucas 4:43) Ginpadala niya ang iya mga disipulo sa pagbantala sing maayong balita sa mga banwa kag mga minuro, kag sang ulihi ginsugo niya sila: “Mangin saksi ko kamo . . . tubtob sa ukbong sang duta.”—Binuhatan 1:8; Lucas 10:1.

Paano Ini Ginpakita sang mga Cristiano sang Una? Ginsunod dayon sang mga disipulo ni Jesus ang iya sugo. “Adlaw-adlaw sa templo kag sa mga balay padayon sila nga wala nagauntat sa pagpanudlo kag sa pagbantala sing maayong balita tuhoy sa Cristo.” (Binuhatan 5:42) Ang pagbantala ginahimo sang tanan sa kongregasyon. Suno sa historian nga si Neander, “ginhikayan ni Celsus, nga una nga manunulat batok sa Cristianismo, ang mga nagahabol sing delana, manughimo sapatos, nagaproseso sing panit, kag ang ordinaryo kag indi edukado nga mga tawo, kay mapisan sila nga mga manugbantala sang ebanghelyo.” Sa iya libro nga The Early Centuries of the Church, si Jean Bernardi nagsulat: “[Ang mga Cristiano] dapat maggua kag magbantala bisan diin kag kay bisan sin-o. Sa mga dalan kag mga siudad, sa mga plasa kag mga balay. Ginabaton man sila ukon wala. . . . Asta sa bilog nga kalibutan.”

Sin-o ang Nagapakita Sini Subong? “Ang pagbalewala sang simbahan sa pagbantala kag pagtudlo isa ka rason kon ngaa madamo ang wala  sing interes sa pag-alagad sa Dios,” sulat sang Anglikano nga pari nga si David Watson. Sa iya libro nga Why Are the Catholics Leaving?, si José Luis Pérez Guadalupe nagsulat parte sa hilikuton sang mga Evangelical, Adventist, kag sang iban pa kag nagsiling nga “wala sila nagakadto sa mga balay.” Parte sa mga Saksi ni Jehova, nagsulat sia: “Organisado sila sa pagkadto sa mga balay.”

Sa Cato Supreme Court Review, 2001-2002, mabasa ang makapainteres nga obserbasyon ni Jonathan Turley: “Basta gani Saksi ni Jehova ang hambalan, madumduman dayon sang mga tawo ang mga manugbantala nga nagakadto sa mga balay sa indi kombeniente nga mga oras. Para sa mga Saksi ni Jehova, ang pagwali sa mga balay indi lamang pagsugid sang ila pagtuo kundi importante ini sa ila pagtuo.”

[Kahon sa pahina 9]

Sin-o ang Nagapakita Sini nga mga Tanda?

Base sa nabinagbinag na naton sa Biblia sa sini nga mga artikulo, sin-o sa banta mo subong ang nagapakita sang mga tanda sang matuod nga mga Cristiano? Bisan pa linibo ka grupo kag sekta ang nagapangangkon nga Cristiano, dumduma ang ginsiling ni Jesus sa iya mga sumulunod: “Indi ang tagsatagsa nga nagasiling sa akon, ‘Ginuo, Ginuo,’ makasulod sa ginharian sang langit, kundi ang isa nga nagahimo sang kabubut-on sang akon Amay nga yara sa langit.” (Mateo 7:21) Kon kilalahon mo ang mga tawo nga nagahimo sang kabubut-on sang Amay—nga nagapakita sang mga tanda sang matuod nga mga Cristiano—kag makig-upod sa ila, matigayon mo ang wala sing katapusan nga mga pagpakamaayo sang Ginharian sang Dios. Ginaagda ka namon nga pangabayon ang mga Saksi ni Jehova, nga naghatag sa imo sini nga magasin, para sa dugang nga impormasyon parte sa Ginharian sang Dios kag sa mga pagpakamaayo nga dalhon sini.—Lucas 4:43.