Armagedon—Ano Ini Siling sang Iban?

“Kag gintipon nila sila sing tingob sa duog nga ginatawag sa Hebreo Armagedon.”—BUGNA 16:16, Ang Biblia, PBS.

ANO ang mapensaran mo kon mabatian mo ang tinaga nga “Armagedon”? Siguro maimadyin mo ang grabe nga kapahamakan. Bisan pa ini nga tinaga makaisa lang mabasa sa Biblia, pirme ini ginasambit sa mga balita kag sang mga lider sang relihion.

Ang pagpati bala sang kalabanan parte sa Armagedon nagasanto sa ginatudlo sang Biblia? Importante gid nga mahibaluan mo ang kamatuoran parte sini bangod makadula ini sang imo kahadlok, makapasanag sang imo paglaum sa palaabuton, kag makaimpluwensia sang imo pagtamod sa Dios.

Binagbinaga ang tatlo ka masunod nga pamangkot, kag ipaanggid ang pagpati sang kalabanan parte sa Armagedon sa ginatudlo sang Biblia.

  1. ANG ARMAGEDON BALA KALAMIDAD NGA GINHIMO SANG TAWO?

Ang tinaga nga “Armagedon” pirme ginapatuhoy sang mga manunulat kag mga researcher sa mga kalamidad nga ginhimo sang tawo. Halimbawa, ang Bug-os Kalibutan nga Inaway I kag II gintawag nga Armagedon. Pagkatapos sadto, nabalaka ang mga tawo nga basi magbombahanay ang Estados Unidos kag Unyon Sobyet. Gintawag ini sang media nga “thermonuclear Armageddon.” Sa karon, ang pila ka researcher nahadlok nga magabag-o ang klima bangod sa polusyon, kag gintawag nila ini nga “climate Armageddon.”

Ano ang ginapakita sang ila ginsiling? Kontrolado sang tawo ang palaabuton sang duta kag ang tanan nga nagakabuhi diri. Kon indi maayo ang pagdumala sang mga gobierno, mahalitan sing permanente ang duta.

Ano ang ginatudlo sang Biblia? Indi pagtugutan sang Dios nga gub-on sang mga tawo ang duta. Suno sa Biblia, wala gintuga ni Jehova * ang duta sing “walay pulus.” Gintuga niya ini para ‘puy-an.’ (Isaias 45:18) Indi pagtugutan sang Dios nga gub-on sang mga tawo ang duta, sa baylo ‘laglagon niya ang mga nagalaglag sang duta.’—Bugna 11:18.

2. ANG ARMAGEDON BALA NATURAL NGA KALAMIDAD?

Kon kaisa, ang “Armagedon” ginapatuhoy sang mga manunulat sa natural nga mga kalamidad. Halimbawa, sang 2010, ginsambit sang isa ka report ang “‘Armagedon’ sa Haiti.” Ginpatuhuyan sini ang pag-antos, kahalitan, kag kamatayon bangod sa mabaskog nga linog sa sina nga pungsod. Ini nga tinaga gingamit man sang mga reporter kag sang mga manughimo sing pelikula sa mga butang nga matabo pa. Halimbawa, gintawag nila nga “Armagedon” ang epekto sang asteroid nga magatupa sa duta.

Ano ang ginapakita sang ila ginsiling? Ang Armagedon amo ang mga hitabo nga magapatay sa bisan sin-o. Gamay lang ang tsansa mo nga makaluwas sa sini.

Ano ang ginatudlo sang Biblia? Ang Armagedon indi mga hitabo nga magapatay sa bisan sin-o lang. Sa baylo, mga malauton lamang ang malaglag sa Armagedon. Ang Biblia nagapromisa nga sa indi madugay “ang malauton wala na; bisan talupangdon mo sing makugihon ang iya duug, wala na sia didto.”—Salmo 37:10.

3. LAGLAGON BALA SANG DIOS ANG DUTA SA ARMAGEDON?

Madamo nga relihioso nga tawo ang nagapati nga malaglag ang kalibutan sa katapusan nga pag-engkuentrohanay sang maayo kag malain. Suno sa isa ka surbe sa Estados Unidos sang Princeton Survey Research Associates, 40 porsiento sang mga adulto ang nagapati nga malaglag ang kalibutan sa “inaway sa Armagedon.”

Ano ang ginapakita sang ila panudlo? Ang mga tawo wala gintuga nga mabuhi sing wala  katapusan. Wala man ginhimo ang duta nga magpabilin asta san-o. May gintalana nga tion ang Dios nga mapatay ang tanan nga tawo.

Ano ang ginatudlo sang Biblia? Maathag nga ginasiling sang Biblia nga ‘ginpasad sang Dios ang mga sadsaran sang duta, agud nga ini indi mationg sa gihapon.’ (Salmo 104:5) Parte sa mga pumuluyo sini, ang Biblia nagasiling: “Ang mga matarung magapanubli sang duta, kag magapuyo dira sa gihapon.”—Salmo 37:29.

Maathag nga wala nagasanto sa Biblia ang madamo nga pagpati parte sa Armagedon. Kon amo, ano ang kamatuoran parte sini?

[Nota]

^ par. 9 Si Jehova ang ngalan sang Dios sa Biblia. Sa Maayong Balita nga Biblia, ang footnote sang Genesis 2:4 nagasiling: “Ang GINOO sa Hebreo nga teksto Yahweh. Sa iban nga pagbadbad ginagamit ang Jehova.”