Sin-o si Abraham?

PILA lamang ka tawo ang may daku nga impluwensia sa mga relihion sa kalibutan. Ang isa sini amo si Abraham, * nga ginpadunggan sang mga Judiyo, Muslim, kag mga Cristiano. Ginkabig sia nga “importante gid sa Kasulatan,” kag “maayo nga halimbawa sang pagtuo.” Gintawag sia sang Biblia nga ‘amay sang tanan nga may pagtuo.’—Roma 4:11.

Ngaa ginapadunggan gid si Abraham? Bangod si Abraham lamang ang direkta nga ginapatuhuyan sang Biblia nga abyan sang Dios, kag tatlo ka beses ini nga ginsambit!—2 Cronica 20:7; Isaias 41:8; Santiago 2:23.

Pero si Abraham ordinaryo lang nga tawo pareho naton. Nakaagi man sia sang mga kabudlayan, kag nabatas niya ini tanan. Gusto mo bala mahibaluan kon paano niya ini nahimo? Binagbinaga ang ginasiling sang Biblia parte sa iya.

Ang Iya Ginhalinan

Si Abraham natawo sang 2018 B.C.E. sa duta sang Ur. (Genesis 11:27-31) Ang Ur isa ka daku kag manggaranon nga siudad. Lapnag man diri ang pagsimba sa mga diosdios, kag mahimo nga ang amay ni Abraham nga si Tera, nagasimba sa lainlain nga dios. (Josue 24:2) Pero si Abraham nagsimba lamang kay Jehova * indi sa wala kabuhi nga mga dios.

Ngaa? Si Abraham natawo mga 150 ka tuig antes napatay ang anak ni Noe nga si Sem. Kon nakig-upod sia kay Sem nga mas magulang sa iya, paano ini nakaapektar sa iya? Mahimo ginsugiran sia ni Sem kon paano sila naluwas sang natabo ang Anaw sa bilog nga kalibutan. Mahimo gintudluan man sia nga importante gid ang pagsimba kay Jehova, ang Dios nga nagluwas kay Sem kag sa iya pamilya sa Anaw.

Indi mapat-od kon kay Sem ukon sa iban nga paagi nakatuon si Abraham. Pero ginbaton ni Abraham ang iya natun-an parte sa matuod nga Dios. Nakita ni Jehova, nga “nagatilaw sang mga tagiposoon,” ang kaayo ni Abraham, kag ginbuligan niya sia nga mangin mas maayo pa nga tawo.—Hulubaton 17:3; 2 Cronica 16:9.

Ang Iya Kabuhi

Madamo sang inagihan si Abraham, nga sa masami mabudlay pero may katuyuan. Binagbinaga ang pila sa sini.

Sang nagaistar si Abraham sa Ur, ginsilingan sia sang Dios nga magsaylo sa lugar nga ipakita Niya sa iya. Bisan pa wala nahibaluan nanday Abraham kag Sara kon diin sila makadto kag kon ngaa ginsilingan sila sang Dios nga maghalin, nagtuman sila. Sang ulihi, nag-istar sila sa mga tolda sa duta sang Canaan, bilang mga pangayaw sa sini nga lugar sa bilog nila nga kabuhi.—Binuhatan 7:2, 3; Hebreo 11:8, 9, 13.

Sang wala pa gihapon bata sanday Abraham kag Sara, si Jehova nagpromisa nga magahimo sia sing daku nga pungsod paagi kay Abraham. Nagsiling man si Jehova nga ang tanan nga panimalay sang duta pakamaayuhon paagi kay Abraham. (Genesis 11:30; 12:1-3) Sang ulihi, ginsulit ni Jehova ini nga promisa. Ginsilingan niya si Abraham nga ang iya kaanakan magadamo, pareho sang mga bituon.—Genesis 15:5, 6.

 Sang 99 anyos na si Abraham kag mga 90 anyos si Sara, nagpromisa si Jehova nga makaangkon sila sang anak nga lalaki. Daw imposible ini kon sa tawo lang, pero natun-an sang ulihi nanday Abraham kag Sara nga wala sing “tama kabudlay para sa GINOO.” (Genesis 18:14, Maayong Balita nga Biblia, HPV) Isa ka tuig sang ulihi, sa edad nga 100, si Abraham nangin amay sang bata nga ginhingalanan, Isaac. (Genesis 17:21; 21:1-5) Nagpromisa ang Dios nga paagi kay Isaac, pakamaayuhon ang tanan nga tawo.

Pila ka tuig sang ulihi, may pinasahi nga sugo si Jehova kay Abraham: Ginsilingan niya si Abraham nga ihalad ang iya pinalangga nga anak nga si Isaac, nga pamatan-on pa kag wala sing asawa kag kabataan. * Masakit gid para kay Abraham nga mapatay ang iya anak, pero handa sia nga tumanon ang sugo ni Jehova nga ihalad si Isaac. Nagapati gid si Abraham nga may gahom ang Dios sa pagbanhaw kay Isaac para matuman ang Iya mga promisa. (Hebreo 11:19) Sang ihalad na ni Abraham ang iya anak, nagpasilabot ang Dios para maluwas si Isaac. Gindayaw ni Jehova si Abraham bangod sa iya pagkamatinumanon. Dayon, ginsulit ni Jehova ang iya mga promisa kay Abraham.—Genesis 22:1-18.

Napatay si Abraham sa edad nga 175. Suno sa Biblia, ‘napatay sia sa maayo nga katigulangon’ kag “busug sang pagkabuhi.” (Genesis 25:7, 8) Gani, naeksperiensiahan ni Abraham ang katumanan sang isa pa ka saad sang Dios, nga magakabuhi sia sing malawig antes sia mapatay nga may kalinong.—Genesis 15:15.

Ang Iya Ginbilin

Si Abraham indi lamang isa ka tawo nga kilala sa relihion ukon kasaysayan. Asta subong, ang istorya sang iya kabuhi nagapabilin kag nagahatag sing maayo nga halimbawa para sa aton. (Hebreo 11:8-10, 17-19) Binagbinagon naton ang apat ka maayo nga kinaiya ni Abraham. Unahon naton ang kinaiya diin nakilala gid sia—ang pagtuo.

[Mga Nota]

^ par. 2 Sang primero, si Abraham gintawag nga Abram kag ang iya asawa gintawag nga Sarai. Pero gin-islan sang Dios ang ngalan ni Abram sing Abraham nga nagakahulugan, “Amay sang Kadam-an,” kag ang ngalan ni Sarai sing Sara nga nagakahulugan, “Prinsesa.” (Genesis 17:5, 15) Gamiton namon sa sini nga mga artikulo ang Abraham kag Sara.

^ par. 6 Si Jehova ang ngalan sang Dios sa Biblia. Sa Maayong Balita nga Biblia, ang footnote sang Genesis 2:4 nagasiling: “Ang GINOO sa Hebreo nga teksto Yahweh. Sa iban nga pagbadbad ginagamit ang Jehova.”

[Kahon sa pahina 4]

Importante nga Karakter sa Kasaysayan sang Biblia

Sa una nga pulo ka kapitulo sa tulun-an sang Genesis sa Biblia, mabasa ang kabuhi sang matutom nga mga tawo, pareho nanday Abel, Enoc, kag Noe. Pero sa masunod nga 15 ka kapitulo sini, mabasa ang kabuhi sang isa ka tawo—si Abraham.

Sa kasaysayan man ni Abraham una nga ginsambit ang pila ka importante nga panudlo sang Biblia. Halimbawa, sa iya kasaysayan . . .

▪ una nga ginpatuhuyan ang Dios bilang Taming, ukon Manug-amlig, sang iya mga alagad.—Genesis 15:1; tan-awa ang Deuteronomio 33:29; Salmo 115:9; Hulubaton 30:5.

▪ una nga ginsambit ang pagtuo sa Dios.Genesis 15:6.

▪ una nga mabasa ang tinaga nga manalagna ukon propeta.—Genesis 20:7.

▪ una nga ginpakita ang gugma sang ginikanan.—Genesis 22:2.