Ang Biblia Nagapabag-o sang Kabuhi

PAANO natigayon sang isa ka pamatan-on nga babayi ang katuyuan sang kabuhi bisan pa ginmaltratar sia sang bata pa sia? Ngaa nangin ministro sang relihion ang isa ka mapintas nga rebelde sa gobierno? Basaha ang ila kasaysayan.

“Gusto ko nga may Nagapalangga sa Akon.”—INNA LEZHNINA

NATAWO: 1981

PUNGSOD: RUSYA

KABUHI SANG UNA: GINMALTRATAR SANG BATA PA

ANG AKON NAGLIGAD: Natawo ako nga apa, kag apa man ang akon mga ginikanan. Malipayon gid ako. Pero sang seis anyos ako, nagbulagay ang akon mga ginikanan. Bisan bata pa ako sadto, naintiendihan ko na kon ano ang pagbulagay, gani nasakitan gid ako. Si Tatay kag ang akon magulang nga lalaki nag-istar sa Troitsk, kag kami naman ni Nanay sa Chelyabinsk. Sang ulihi, namana liwat si Nanay, pero palahubog ang iya bana kag pirme niya kami ginasakit.

Sang 1993, nalumos ang akon magulang. Grabe gid ang epekto sini sa amon pamilya. Nagpahubog si Nanay, kag duha na sila sang iya bana nga nagasakit sa akon. Ginhandum ko ang maayo nga kabuhi. Gusto ko nga may nagapalangga sa akon. Ginpangita ko ini sa lainlain nga relihion, pero napaslawan lang ako.

KON PAANO GINBAG-O SANG BIBLIA ANG AKON KABUHI: Sang 13 anyos ako, ginsugiran ako sang akon klasmeyt nga Saksi ni Jehova sang mga istorya sa Biblia. Nanamian gid ako sang mga istorya sang kabuhi nanday Noe kag Job, nga nag-alagad sa Dios bisan pa may mga kabudlayan. Sang ulihi, nagtuon ako sang Biblia sa mga Saksi kag nagtambong sa ila mga pagtilipon.

Madamo ako sing natun-an nga mga kamatuoran sa Biblia. Natandog ako sang natun-an ko nga may ngalan ang Dios. (Salmo 83:18) Nagdayaw ako kay nagakatuman gid ang mga tagna sang Biblia parte sa “katapusan nga mga adlaw.” (2 Timoteo 3:1-5) Nalipay man ako sa paglaum nga pagkabanhaw, kay makita ko na liwat ang akon utod!—Juan 5:28, 29.

Pero indi tanan nalipay sa akon bag-o nga pagpati. Wala nanamian si Nanay kag ang iya bana sa mga Saksi ni Jehova. Ginpilit nila ako  nga untatan ang pagtuon sa Biblia. Pero nanamian ako sa akon natun-an kag indi ko gusto nga mag-untat.

Indi mahapos atubangon ang pagpamatok sang akon pamilya. Naglalain pa gid ako sang ang akon manghod nga lalaki, nga nagaupod sa akon sa mga pagtilipon sang mga Saksi ni Jehova, nalumos man. Pero wala ako ginpabay-an sang mga Saksi. Sa ila ko nabatyagan ang pagpalangga nga madugay ko na nga ginapangita. Amo gid ini ang matuod nga relihion. Sang 1996, ginbawtismuhan ako bilang isa sa mga Saksi ni Jehova.

MGA BENEPISYO: Subong, anom ka tuig na nga napamana ko ang mabuot nga lalaki nga si Dmitry. Nagaalagad kami sa branch office sang mga Saksi ni Jehova sa St. Petersburg. Sang ulihi, wala na ginapamatukan sang akon mga ginikanan ang akon pagtuluuhan.

Nagapasalamat gid ako nga nakilala ko si Jehova! Sang gin-alagad ko sia, may katuyuan na ang akon kabuhi.

‘Madamo ako sing ginpaligban nga pamangkot.’—RAUDEL RODRÍGUEZ RODRÍGUEZ

NATAWO: 1959

PUNGSOD: CUBA

KABUHI SANG UNA: REBELDE SA GOBIERNO

ANG AKON NAGLIGAD: Natawo ako sa Havana, Cuba. Imol ang amon lugar kag pirme lang may inaway sa kalye. Sang ulihi, nangin interesado ako sa judo kag iban pa nga combat sports.

Maalam ako nga estudyante, gani ginpaeskwela ako sang akon mga ginikanan sa unibersidad. Didto ko nabatyagan nga kinahanglan bag-uhon ang gobierno sang amon pungsod. Gani nagrebelde  ako. Ginkastigo namon sang akon klasmeyt ang isa ka pulis, kay tuyo namon nga agawon ang iya pusil. Bangod sini, nakaangkon sing grabe nga pilas sa ulo ang pulis. Ginpriso kami sang akon klasmeyt kag ginsentensiahan sing firing squad. Beinte anyos lang ako sadto, pero patyon na ako!

Sa sulod sang prisuhan, ginhanda ko ang akon kaugalingon antes ako patyon. Indi ko gusto ipakita nga nahadlok ako. Pero madamo man ako sing ginpaligban nga pamangkot: ‘Ngaa kadamo sang inhustisya sa kalibutan? Amo lang bala sini ang kabuhi?’

KON PAANO GINBAG-O SANG BIBLIA ANG AKON KABUHI: Ang amon sentensia nga kamatayon ginpanubo sa 30 ka tuig nga pagkabilanggo. Sini nga tion, nakilala ko ang pila ka Saksi ni Jehova nga ginpriso bangod sa ila pagtuluuhan. Nagdayaw ako kay ang mga Saksi ni Jehova maisog pero mahidaiton. Bisan pa napriso sila nga wala sing sala, wala sila naakig ukon nagadumot.

Gintudluan ako sang mga Saksi nga may katuyuan ang Dios para sa mga tawo. Ginpakita nila sa akon sa Biblia nga himuon sang Dios ang duta nga paraiso, diin wala na sing krimen ukon inhustisya. Gintudluan nila ako nga ang duta istaran sang maayo nga mga tawo, kag may kahigayunan sila nga mabuhi sing wala katapusan sa perpekto nga kahimtangan.—Salmo 37:29.

Nanamian ako sa akon natun-an sa mga Saksi, pero nabudlayan ako nga ilugon sila. Daw imposible para sa akon nga magpaumod ukon indi mag-entra sa pulitika. Gani ginbasa ko ang Biblia. Sang natapos ko ini basa, narealisar ko nga ang mga Saksi ni Jehova lamang ang nagagawi pareho sang mga Cristiano sang una.

Sa akon pagtuon sa Biblia, nahibaluan ko nga kadamo sang dapat ko bag-uhon. Halimbawa, dapat ko untatan ang pagpamuyayaw, pagpanigarilyo, kag pag-entra sa mga isyu sa pulitika. Indi ini mahapos himuon, pero sa bulig ni Jehova, amat-amat ako nga nagbag-o.

Ang mabudlay gid himuon amo ang pagkontrol sa akon kaakig. Padayon ako nga nagapangamuyo para mahimo ko ini. Nakabulig gid sa akon ang mga bersikulo sa Biblia pareho sang Hulubaton 16:32, nga nagasiling: “Ang makuli sa pagpangakig maayo pa sa gamhanan, kag ang nagagahum sang iya espiritu sang sa nagaagaw sing banwa.”

Sang 1991, ginbawtismuhan ako bilang isa sa mga Saksi ni Jehova. Ginhimo ini sa isa ka dram sang tubig sa sulod sang prisuhan. Pagkadason nga tuig, nalakip ako sa pila ka priso nga ginpagua kag gindala sa Espanya. Pag-abot sa Espanya, nagtambong ako dayon sa pagtilipon sang mga Saksi ni Jehova. Gin-abiabi ako sang mga Saksi didto kag daw madugay na nila ako nga kilala. Ginbuligan nila ako nga sugdan ang akon bag-o nga kabuhi.

MGA BENEPISYO: Malipayon ako sa pag-alagad sa Dios upod sa akon asawa kag duha ka bata. Ginagamit ko ang akon daku nga tion sa pagbulig sa iban nga makatuon sa Biblia. Madumduman ko pa ang tion nga malapit na lang ako patyon, kag sugod sadto naapresyar ko kon paano ako ginpakamaayo. Indi lamang nga buhi ako, kundi may paglaum pa. Ginapaabot ko gid ang ginpromisa nga Paraiso, diin magaluntad na ang hustisya kag “wala na sing kamatayon.”—Bugna 21:3, 4.

[Blurb sa pahina 19]

“Natandog ako sang natun-an ko nga may ngalan ang Dios”

[Retrato sa pahina 20]

Nalipay kami sang akon bana nga ipakita sa apa ang sign-language nga mga publikasyon