Abraham—Tawo nga May Pagtuo

Sa isa ka malinong nga gab-i, samtang nagatangla si Abraham sa mga bituon, ginahunahuna niya ang promisa sang Dios nga ang iya kaanakan mangin pareho kadamo sa mga bituon. (Genesis 15:5) Ang mga bituon nagapahanumdom kay Abraham nga tumanon ni Jehova ang iya promisa. Kay man, kon may gahom si Jehova sa pagtuga sang uniberso kag sang tanan nga butang sa sini, masarangan man niya hatagan sing anak sanday Abraham kag Sara. Amo sini kabakod ang pagtuo ni Abraham.

ANO ANG PAGTUO? Sa Biblia, ang tinaga nga “pagtuo” nagapatuhoy sa malig-on nga pagpati sa mga butang nga indi makita. Ina nga pagpati nabase sa mabakod nga ebidensia. Ang isa nga may pagtuo sa Dios nagasalig nga matuman gid ang mga promisa ni Jehova.

PAANO SI ABRAHAM NAGPAKITA SING PAGTUO? Nagpati si Abraham sa mga promisa sang Dios. Bangod sa pagtuo, ginbiyaan niya ang iya dutang natawhan kag nagsalig nga tumanon ni Jehova ang Iya promisa nga dalhon sia sa lain nga lugar. Bangod sa pagtuo, nagpanglugayawan si Abraham sa Canaan kag nagapati nga sa ulihi ini nga lugar mapanag-iyahan sang iya kaanakan. Kag bangod sa pagtuo, handa niya nga ihalad si Isaac kag nagsalig nga masarangan banhawon ni Jehova si Isaac.—Hebreo 11:8, 9, 17-19.

Nagkonsentrar si Abraham sa palaabuton indi sa nagligad. Bisan pa mas masulhay ang pagkabuhi nanday Abraham kag Sara sa Ur sangsa Canaan, “wala na nila pagdumduma ang lugar nga ila ginhalinan.” (Hebreo 11:15, Ang Pulong sang Dios, APD) Nagkonsentrar sila kon paano ang Dios magapakamaayo sa ila kag sa ila kaanakan sa palaabuton.—Hebreo 11:16.

 May rason gid si Abraham nga magtuo sa Dios. Gintuman ni Jehova ang tanan niya nga promisa kay Abraham. Nagdamo ang kaanakan ni Abraham kag nangin pungsod nga gintawag Israel. Sang ulihi, nag-istar ang mga Israelinhon sa Canaan, ang lugar nga ginpromisa ni Jehova kay Abraham.—Josue 11:23.

ANO ANG MATUN-AN NATON? Makasalig kita nga tumanon ni Jehova ang iya mga promisa. Bisan pa ang pila sa sini daw imposible kon sa tawo lang, nagasalig kita nga “sa Dios ang tanan nga butang posible.”—Mateo 19:26.

Ang halimbawa ni Abraham nagatudlo man sa aton nga magkonsentrar indi sa kon ano ang nagligad, kundi sa palaabuton. Natun-an ini ni Jason. Nag-antos sia sang malala nga balatian nga nagparalisar sa bilog niya nga lawas. “Kon kaisa, ginapamensar ko ang nagligad,” siling ni Jason. Nagsiling pa sia: “Ginakahidlawan ko gid bisan ang simple nga mga butang, pareho sa paghakos sa akon asawa nga si Amanda.”

Bisan pa sini, nagatuo gid si Jason nga tumanon ni Jehova ang iya mga promisa, lakip ang promisa nga sa indi madugay ang duta mangin paraiso kag ang matutom nga mga tawo magakabuhi sing wala katapusan kag maayo na ang panglawas. * (Salmo 37:10, 11, 29; Isaias 35:5, 6; Bugna 21:3, 4) “Ginapensar ko pirme nga ang maayo nga mga kahimtangan matabo sa palaabuton,” siling ni Jason. Nagsiling pa sia: “Sa indi madugay, wala na sing kabudlayan, kabalaka, kasubo, kag kasal-anan.” Maayo gid ini nga halimbawa sang pagtuo pareho ni Abraham!

[Nota]

^ par. 9 Para sa dugang nga impormasyon parte sa paraiso nga duta, basaha ang kapitulo 3, 7, kag 8 sang libro nga Ano Gid ang Ginatudlo Sang Biblia? nga ginhimo sang mga Saksi ni Jehova.