Ang Biblia Nagapabag-o sang Kabuhi

ANO ang nakabulig sa isa ka sugarol kag kawatan nga untatan ang iya mga bisyo kag magbag-o? Basaha ang iya ginsiling.

“Nanamian Ako sa Karera sang Kabayo.”—RICHARD STEWART

NATAWO: 1965

PUNGSOD: JAMAICA

KABUHI SANG UNA: SUGAROL KAG KRIMINAL

ANG AKON NAGLIGAD: Nagdaku ako sa imol kag gutok nga lugar sa Kingston, ang kapital sang Jamaica. Madamo diri ang wala sing obra kag lapnag ang krimen. Nahadlok ang mga tawo sa mga gang. Halos kada adlaw, may linupok sang mga pusil.

Mapisan gid ang akon iloy kag ginhimo niya ang tanan para maatipan kami nga mag-ulutod. Gintinguhaan niya nga mapaeskwela kami sing maayo. Wala ako sing gana mag-eskwela, pero nanamian ako sa karera sang kabayo. Nagaligoy ako para magtan-aw sang karera. Nagasakay pa gani ako sa kabayo.

Sang ulihi, nagapusta na ako sa mga karera sang kabayo. Nangin babayidor ako, nagsuyop sang marijuana, kag nangawat para may isuporta sa akon mga bisyo. Madamo ako sang pusil, pero maayo lang kay wala ako nakapatay sa madamo nga bes nga nag-upod ako sa pagpangawat.

Sang ulihi, nadakpan ako sang mga pulis kag ginpriso. Sang nahilway na ako, naghimo naman ako sang krimen. Ang matuod, naglain pa gid ako. Bisan pa daw inosente ako tulukon, maisog ako, iritable, kag mapintas. Wala ako sing labot sa iban.

KON PAANO GINBAG-O SANG BIBLIA ANG AKON KABUHI: Sadtong magamo nga tion sang akon kabuhi, nagtuon sa Biblia si Nanay kag nangin Saksi ni Jehova. Nakita ko nga nagbag-o ang iya personalidad kag gusto ko hibaluon kon ngaa. Gani, nagtuon man ako sang Biblia upod sa mga Saksi.

Natun-an ko nga ang mga panudlo sang mga Saksi ni Jehova lain sa iban nga relihion kag ginabase nila sa Biblia ang tanan nila nga ginasiling. Sila lamang ang relihion nga nagawali sa mga balay, pareho sa ginhimo sang mga Cristiano sang una. (Mateo 28:19; Binuhatan 20:20) Nakumbinsi ako nga nakita ko na ang matuod nga relihion bangod sa tunay nga gugma nga ginapakita nila sa isa kag isa.—Juan 13:35.

Natun-an ko sa Biblia nga kinahanglan ko gid bag-uhon ang akon kabuhi. Nahibaluan ko nga ginadumtan ni Jehova nga Dios ang pagpakighilawas kag kon gusto ko nga pahamut-an sia, dapat ko untatan ang mga buhat nga nagahigko sa akon lawas. (2 Corinto 7:1; Hebreo 13:4) Natandog gid ako sang natun-an ko nga si Jehova may balatyagon kag mahimo sia masakitan ukon malipay sa akon ginahimo. (Hulubaton 27:11) Gani, gin-untatan ko ang pagsuyop  sang marijuana, paggamit sang pusil, kag ginbag-o ko ang akon batasan. Ang mabudlay gid untatan amo ang imoralidad kag pagsugal.

Sang primero, indi ko gusto nga mahibaluan sang akon mga abyan nga nagatuon ako sa Biblia sa mga Saksi ni Jehova. Pero nagbag-o ini sang nabasahan ko ang ginsiling ni Jesus sa Mateo 10:33: “Ang bisan sin-o nga magpanghiwala sa akon sa atubangan sang mga tawo, ipanghiwala ko man sia sa atubangan sang akon Amay nga yara sa langit.” Bangod sini, ginsugid ko sa akon kaupdanan nga nagatuon ako sa mga Saksi. Nakibot gid sila. Indi sila makapati nga gusto ko mangin Cristiano. Pero ginsilingan ko sila nga gusto ko na bayaan ang akon daan nga pagkabuhi.

MGA BENEPISYO: Nalipay gid ang akon iloy sang nakita niya nga ginasunod ko ang mga prinsipio sang Biblia. Wala na sia nabalaka nga basi maghimo ako sang malain. Ginaistoryahan namon pirme ang parte sa amon gugma kay Jehova. Kon kaisa, kon madumduman ko ang akon nagligad, daw indi ako makapati nga mabag-o ko ang akon kabuhi sa bulig sang Dios. Wala ko na ginahandum ang imoral kag materyalistiko nga pagkabuhi.

Kon wala ko ginsunod ang Biblia, basi patay na ako ukon napriso. Pero subong, malipayon ako upod sa akon pamilya. Nalipay gid ako sa pag-alagad kay Jehova nga Dios upod sa akon mabinuligon nga asawa kag matinumanon nga bata. Nagapasalamat gid ako kay Jehova nga nangin bahin ako sang iya mahigugmaon nga organisasyon. Daku man ang akon pagpasalamat nga may isa nga nangabudlay nga tudluan ako sing kamatuoran sa Biblia. Nalipay man ako nga buligan ang iban nga makatuon sa Biblia. Labaw sa tanan, nagapasalamat ako sa gugma ni Jehova nga Dios nga nagbulig sa akon nga magsuod sa iya.

[Blurb sa pahina 11]

“Natun-an ko nga si Jehova may balatyagon kag mahimo sia masakitan ukon malipay sa akon ginahimo”

[Retrato sa pahina 11]

Nakita ko nga nagbag-o ang personalidad ni Nanay

[Retrato sa pahina 11]

Upod sa akon asawa kag bata