Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

ANG LALANTAWAN OKTUBRE 2011

 Tudlui ang Inyo Kabataan

San-o Kita Indi Dapat Magtulog?

San-o Kita Indi Dapat Magtulog?

MAHIMO nagaugyon ka nga indi ka dapat magtulog sa eskwelahan. Madamo ang ginatuyo sa ila klase, pero para makatuon ka, indi ka dapat magtulog. Mahimo nagatambong ka man sa mga pagtilipon para magtuon sang Biblia.

Ano ang himuon mo para indi ka pagtuyhon? * Magtulog sing temprano sa gab-i. Makabulig man ang pagpiyongpiyong sa udto. Usisaon naton kon ano ang aton matun-an sa isa ka pamatan-on nga natulugan sang gab-i nga nagpamulongpulong si apostol Pablo. Basaha ang Binuhatan kapitulo 20, bersikulo 7 asta 12, para mahibaluan mo ang natabo.

Si Pablo nagabisita sa kongregasyon sa pantalan nga siudad sang Troas. Ang Biblia nagasiling nga “malakat na [si Pablo] sa masunod nga adlaw,” gani “ginpalawig niya ang iya pamulongpulong tubtob sa tungang-gab-i.” Mabasa pa naton: “May isa ka pamatan-on nga si Eutico nga nagalingkod sa bintana, kag natulugan sia sing hamuok samtang padayon nga nagapamulongpulong si Pablo.” Ano dayon ang natabo?

Si Eutico nahulog sa bintana “gikan sa ikatlo nga panalgan.” Dalidali nga nanaug si Pablo kag ang iban pa. Pero pag-abot nila, patay na si Eutico! Maimadyin mo bala ang ila kasubo?— Ang Biblia nagsiling nga ginhakos ni Pablo si Eutico. Dayon nagsiling si Pablo: ‘Indi kamo magkabalaka, buhi sia!’ Ginbuhi sang Dios si Eutico!

Ano ang matun-an naton parte sa Dios sa natabo kay Eutico?— Masarangan ni Jehova,  nga aton Amay sa langit, nga buhion ang mga patay, lakip ang mga bata. Naintiendihan ka kag palangga ni Jehova labaw pa sa ginahimo sang imo mga ginikanan. Sang ari si Jesus sa duta, ginpakita niya kon ano nga sahi sang Amay si Jehova sang ginhakos niya kag ginpakamaayo ang mga bata. May ginbanhaw man sia nga kabataan, lakip ang 12 anyos nga bata nga babayi.

Ano ang nabatyagan mo kay palangga ka ni Jehova?— Dapat man naton higugmaon si Jehova kag sundon ang Iya mga ginasiling. Paano naton mapakita nga ginahigugma naton Sia?— Ang isa ka paagi amo ang pagsiling nga ginahigugma naton Sia. Si Jesus nagsiling: “Ginahigugma ko ang Amay.” Pero wala lang nagsiling si Jesus nga ginahigugma niya ang Dios. Ginpakita man niya ini sa iya mga ginhimo.

Gintuman ni Jesus ang Dios. “Pirme ko ginahimo ang mga butang nga kalahamut-an sa iya,” siling niya. Gani para malipay si Jehova kag ang iya Anak nga si Jesus, indi kita dapat magtulog sa eskwelahan kag sa Cristianong pagtilipon.

^ par. 4 Kon ginabasa mo ini sa bata, magdulog ka kon makita mo ang dash (—) kag pasabta sia.