Ang Kamatuoran Makapabag-o sang Imo Kabuhi

MAHIMO nabatian mo ukon gintudlo sa imo ang isa sa mga kabutigan parte sa Dios nga ginbuyagyag sa sini nga mga artikulo. Pero mahimo nagaduhaduha ka nga bag-uhon ang imo mga pagpati, ilabi na kon namat-an mo na ini.

Natural lang ina. Indi gusto sang pila ka relihion nga ikomparar ang ila panudlo sa ginasiling sang Biblia. Para depensahan ang kabutigan, ang iban nagsiling nga ang Biblia komplikado kag indi maintiendihan sang tanan. Pero bisan ang kalabanan nga disipulo ni Jesus ordinaryo lang nga mga tawo kag wala sing mataas nga tinun-an, naintiendihan nila ang iya gintudlo.—Binuhatan 4:13.

Mahimo nagaduhaduha ka nga usisaon ang imo mga pagpati kay basi ginapakita sini nga kulang ang imo pagtuo. Pero maakig bala ang Dios sa imo kon usisaon mo ang Biblia, nga iya mensahe sa mga tawo, para mahibaluan mo ang iya ginapatuman? Indi gid. Gusto sang Dios nga usisaon mo ang Biblia kag ‘pamatud-an sa imo kaugalingon ang maayo kag kalahamut-an kag himpit nga kabubut-on sang Dios.’—Roma 12:2.

Ang pagtuon sing kamatuoran parte sa Dios indi lamang makahatag sa imo sing ihibalo, kundi makapabag-o ini sang imo kabuhi. (Juan 8:32) Si Deanne nga ginsambit sa una nga artikulo, may pagtuo na nga nabase sa Biblia. Nagsiling sia: “Nag-athag sa akon ang Biblia sang gintun-an ko ini. Nakilala ko si Jehova subong mainulikdon nga Dios kag mapinalanggaon nga Amay sa langit. May katuyuan na ang akon kabuhi.”

Mahimo nagtuon ka na sadto sa Biblia pero pamatyag mo daw wala ka sing naintiendihan. Padayuna ang pagtuon. Matuod, mabudlay maintiendihan ang Biblia kon gintudluan ka sang kabutigan parte sa Dios. Mapaanggid ini sa pagkadto sa isa ka lugar nga sala nga direksion ang ginhatag sa imo. Sang primero daw wala man sing problema, pero sang ulihi natalupangdan mo nga nagtalang ka. Gani para makalab-ot ka sa imo kadtuan, dapat nga mag-agi ka sa husto nga dalan kag magsunod sa husto nga direksion.

Gusto mo bala mahibaluan ang kamatuoran parte sa Dios? Palihug kontaka ang mga Saksi ni Jehova sa inyo lugar ukon magsulat sa adres sa pahina 4 sini nga magasin para sa wala sing bayad nga pagtuon sa Biblia sa inyo balay.

[Blurb sa pahina 9]

‘Pamatud-i sa imo kaugalingon ang maayo kag kalahamut-an kag himpit nga kabubut-on sang Dios.’—ROMA 12:2