May Isa Bala nga Ginhalinan sang Tanan nga Kalautan?

“GINKAMUSTA ko ang yawa,” siling sang isa ka kumander sang mga soldado sang United Nations sa Rwanda, parte sa ila kapaslawan nga pauntaton ang pagpinatyanay sang rasa sa sina nga pungsod sang 1994. Ang isa nga nakakita sining grabe nga hitabo, nagsiling: “Kon indi ka magpati nga may Satanas, kit-anay kita sa lulubngan sang mga ginpamatay sa Rwanda.” Ini bala nga mga kalautan ginhimo gid sang Yawa?

Ang kalabanan nga tawo wala nagapati nga ang grabe nga pagpamatay kag pagpamintas ginhimo sang isa ka malauton nga espiritu nga tinuga. Madamo ang nagahunahuna nga resulta ini sang malain nga huyog nga duna sa mga tawo. Ang iban nagapati nga may grupo sang manggaranon kag impluwensiado nga mga tawo sa bilog nga kalibutan nga madugay na nga nagakontrol sa mga tawo para gamhan ang kalibutan. Ginabasol naman sang iban ang mga gobierno kag mga manuggahom bangod sa mga inhustisya kag pag-antos nga nagakatabo.

Ano sa banta mo? Ngaa grabe gid subong ang kalautan, kapintas, kag pag-antos sa bilog nga kalibutan sa pihak sang mga pagtinguha nga mapahaganhagan ini? Ngaa padayon nga nagahimo sing kalainan ang mga tawo, bisan pa nahibaluan nila ang indi maayo nga mga resulta sini? May isa bala nga ginhalinan sini tanan? Sin-o gid ang nagagahom sa kalibutan? Mahimo makibot ka sa sabat.