Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN AGOSTO 2011

Ang Biblia Nagapabag-o sang Kabuhi

Ang Biblia Nagapabag-o sang Kabuhi

NGAA nagdesisyon nga mangin Saksi ni Jehova ang isa ka tawo nga madamo sing asawa kag manughingabot sa mga Saksi? Ngaa ginbag-o sang isa ka pastor sang Pentecostal Church ang iya pagtuluuhan? Paano nangin suod sa Dios ang isa ka babayi nga nangil-ad sadto sa iya kaugalingon? Ngaa nangin ministro sang relihion ang isa ka tawo nga mahilig anay sa heavy-metal nga mga musika? Basaha ang ila mga eksperiensia.

“Nangin Maayo Ako nga Bana.”—RIGOBERT HOUETO

  • NATAWO: 1941

  • PUNGSOD: BENIN

  • KABUHI SANG UNA: MADAMO SING ASAWA, MANUGHINGABOT SA MGA SAKSI NI JEHOVA

ANG AKON NAGLIGAD:

Taga-Cotonou ako, isa ka daku nga siudad sa Benin. Ginpadaku ako nga Katoliko pero talagsa lang ako nagasimba. Bangod legal pa ang poligamya, madamo nga Katoliko sa amon lugar ang madamo sing asawa. Gani, apat ang akon ginpangasawa.

Sang 1970, nagsugod ang rebolusyon. Abi ko makahatag ini sing kaayuhan sa amon pungsod. Ginsuportahan ko ini kag nag-entra ako sa pulitika. Wala nanamian ang mga rebolusyonaryo sa mga Saksi ni Jehova kay wala sila nagaentra sa pulitika. Isa ako sa mga naghingabot sa ila. Sang 1976, ginpagua sa pungsod ang mga Saksi nga misyonero kag nagpensar ako nga indi na sila magbalik.

KON PAANO GINBAG-O SANG BIBLIA ANG AKON KABUHI:

Sang 1990, natapos ang rebolusyon. Nakibot gid ako sang nagbalik ang mga Saksi nga misyonero. Sa pensar ko, ginasuportahan gid sila sang Dios. Sina nga tion, nagsaylo ako sing ulubrahan. Saksi ang isa ko ka upod sa trabaho kag ginsugiran niya ako dayon sang iya mga pagpati. Ginpabasa niya sa akon ang ginasiling sang Biblia nga si Jehova mapinalanggaon kag makatarunganon nga Dios. (Deuteronomio 32:4; 1 Juan 4:8) Naganyat gid ako sa sini nga mga kinaiya. Gusto ko magtuon pa parte kay Jehova, gani nagpa-Bible study ako.

Sang ulihi, nagtambong ako sa mga pagtilipon sang mga Saksi ni Jehova. Nanamian ako sa ila bangod may matuod sila nga gugma kag wala sila sing ginapasulabi nga rasa ukon tindog sa komunidad. Napamatud-an ko sa padayon ko nga pag-upod sa ila nga sila ang matuod nga mga sumulunod ni Jesus.—Juan 13:35.

Narealisar ko nga dapat ako maghalin sa Katoliko kon gusto ko alagaron si Jehova. Indi ini mahapos kay nahadlok ako sa mahimo pensaron sang iban sa akon. Pero sang ulihi, sa bulig ni Jehova, natigayon ko ang kaisog nga maghalin.

May dapat pa ako bag-uhon. Natun-an ko sa Biblia nga ginadumilian sang Dios ang pagpangasawa  sing madamo. (Genesis 2:18-24; Mateo 19:4-6) Sa pagtamod sang Dios, ang una ko lang nga asawa ang legal. Gani ginparehistro ko ang amon pag-asawahay. Ginbiyaan ko ang iban ko nga asawa, pero ginsuportahan ko sila sa pinansial. Sang ulihi, ang duha ko anay ka asawa nangin Saksi ni Jehova.

MGA BENEPISYO:

Bisan Katoliko gihapon ang akon asawa, ginarespeto niya ang akon desisyon nga mag-alagad kay Jehova. Nabatyagan ko kag sang akon asawa nga nangin maayo ako nga bana.

Abi ko sadto, kon mag-entra ako sa pulitika mabuligan ko ang amon komunidad, pero wala pulos yadto nga mga panikasog. Ang Ginharian sang Dios lamang ang makasolbar sa mga problema sang mga tawo. (Mateo 6:9, 10) Nagapasalamat gid ako kay Jehova kay ginbuligan niya ako nga mangin malipayon ang akon kabuhi.

“Indi Mahapos Maghimo sing mga Pagbag-o.”—ALEX LEMOS SILVA

  • NATAWO: 1977

  • PUNGSOD: BRAZIL

  • KABUHI SANG UNA: PASTOR SANG PENTECOSTAL

ANG AKON NAGLIGAD:

Nagdaku ako sa Itu, sa São Paulo State. Kilala ini nga lugar bangod sa madamo nga krimen.

Mapintas ako katama kag imoral. Nagabaligya man ako sang droga. Pero gin-untatan ko ini kay narealisar ko nga prisuhan lang ukon sementeryo ang matup-an ko. Dayon, nangin miembro ako sang Pentecostal, kag nangin pastor sang ulihi.

Bilang pastor, nagapati ako nga mabuligan ko gid ang mga tawo. May relihioso ako nga programa sa radyo, gani nangin bantog ako sa amon lugar. Pero amat-amat ko nga napamatud-an nga ang simbahan, sa kabilugan, wala nagaulikid sa kaayuhan sang ila mga miembro. Ang mas malain pa, indi sila interesado sa pagdayaw sa Dios. Narealisar ko nga kuarta lang ang ila ginalagas. Gani, nagdesisyon ako nga maghalin sa simbahan.

KON PAANO GINBAG-O SANG BIBLIA ANG AKON KABUHI:

Sang nagtuon ako sa Biblia sa mga Saksi ni Jehova, natalupangdan ko dayon nga lain sila sa iban nga relihion. Duha ka butang ang nanamian ko sa ila. Una, wala lamang sila nagahambal nga higugmaon ang Dios kag ang isigkatawo, kundi ginapakita nila ini. Ikaduha, wala sila nagaentra sa pulitika ukon inaway. (Isaias 2:4) Ining duha ka butang nagkumbinsi sa akon nga nakita ko na ang matuod nga relihion—ang mabudlay nga dalan padulong sa kabuhi.—Mateo 7:13, 14.

Narealisar ko nga dapat gid ako maghimo sing mga pagbag-o para mapahamut-an ang Dios. Dapat ko hatagan sing dugang nga atension ang akon pamilya. Dapat man nga mangin mapainubuson pa ako. Indi mahapos maghimo sing mga pagbag-o,  pero sa bulig ni Jehova, nahimo ko ini. Nalipay sa sini ang akon asawa. Una sia nga nagtuon sa Biblia, kag madasig gid ang iya pag-uswag. Sang ulihi, nagdesisyon kami nga mag-asawa nga mangin Saksi ni Jehova kag dungan kami nga ginbawtismuhan.

MGA BENEPISYO:

Nalipay kami nga buligan ang amon tatlo ka kabataan nga mangin suod kay Jehova. Malipayon gid ang amon pamilya. Nagapasalamat ako kay Jehova kay nasapwan ko ang kamatuoran nga makita sa iya Pulong, ang Biblia. Nagapabag-o gid ini sang kabuhi! Ako ang isa ka pamatuod sini.

“Malipayon na Ako kag Wala na Nangil-ad sa Akon Kaugalingon.”—VICTORIA TONG

  • NATAWO: 1957

  • PUNGSOD: AUSTRALIA

  • KABUHI SANG UNA: INDI MAAYO ANG GINDAK-AN

ANG AKON NAGLIGAD:

Nagdaku ako sa Newcastle, New South Wales. Subang ako sa pito ka mag-utod. Palahubog si Tatay kag mapintas si Nanay. Ginasakit ako ni Nanay kag ginapakalain. Pirme niya ako ginahambalan nga malain kag makadto ako sa impierno. Nahadlok gid ako sa iya ginsiling.

Absent ako pirme sa eskwelahan bangod sa pagsakit sa akon ni Nanay. Sang 11 anyos ako, ginkuha ako sa poder nila kag ginpaistar sa isa ka institusyon sang gobierno, kag sang ulihi, sa kombento. Sang 14 anyos na ako, naglayas ako sa kombento. Indi ko gusto magbalik sa balay, gani nag-istar ako sa mga kalye sang Kings Cross, sa Sydney.

Samtang nagaistar sa kalye, nagdroga ako, nag-inom, naganyat sa pornograpiya, kag nag-entra sa prostitusyon. Nag-istar ako sa apartment sang tag-iya sang isa ka nightclub. Isa ka gab-i, may duha ka lalaki nga nakigkita sa iya. Gani ginpasulod niya ako sa kuarto, pero mabatian ko ang ila pag-istoryahanay. Kinulbaan gid ako sang mabatian ko nga gusto niya ako ibaligya sa duha ka lalaki. Pasakyon nila ako sa barko pakadto sa Japan para mag-obra sa isa ka bar. Bangod sa kakulba, naglumpat ako sa balkonahe kag nalagyo para mangayo sing bulig.

Nakilala ko ang isa ka lalaki nga nagabisita sa Sydney. Ginsugid ko sa iya ang akon sitwasyon, kay nagalaum ako nga hatagan niya ako sing kuarta. Pero gindala niya ako sa iya ginadayunan para makapaligo kag makakaon. Wala na ako naghalin didto. Pagligad sang isa ka tuig, nagpakasal kami.

KON PAANO GINBAG-O SANG BIBLIA ANG AKON KABUHI:

Sang nagtuon ako sa Biblia sa mga Saksi ni Jehova, lainlain ang akon nabatyagan. Gintudluan ako sadto nga ang Dios ang nagapaantos sa aton. Pero naugot gid ako kay naghalin gali kay Satanas ang kalautan. Nalugpayan gid ako sang natun-an ko nga wala ginasilutan sang Dios ang mga tawo sa impierno, ang panudlo nga madugay ko na ginakahadlukan.

 Nagdayaw gid ako sa mga Saksi kay ginabase nila sa mga prinsipio sang Biblia ang ila mga desisyon. Ginatuman nila ang ila natun-an. Mabudlay ako pakig-angutan, pero palangga nila ako kag ginarespeto bisan lain ang akon ginahimo ukon ginahambal.

Ang nabudlayan ko gid amo ang pagbatyag nga wala sing pulos. Nangil-ad gid ako sa akon kaugalingon, kag madugay pa ini nadula bisan sang nabawtismuhan na ako bilang isa sa mga Saksi ni Jehova. Ginahigugma ko si Jehova, pero indi ako kumbinsido nga ginahigugma niya ako.

Pero nagbag-o ini pagligad sang 15 ka tuig sa tapos ako mabawtismuhan. Sa isa ka pamulongpulong sa Kingdom Hall sang mga Saksi ni Jehova, ginsambit sang humalambal ang Santiago 1:23, 24. Ginapakita sini nga mga bersikulo nga ang Biblia pareho sang espiho, diin mahibaluan naton kon paano kita ginatamod ni Jehova. Nagpensar ako nga basi ang pagtamod ko sa akon kaugalingon lain sangsa pagtamod ni Jehova. Pero ginbalewala ko ini kay daw imposible gid nga higugmaon ako ni Jehova.

Pagligad sang pila ka adlaw, nabasa ko ang bersikulo nga nagpabag-o sang akon kabuhi. Si Jehova nagsiling sa Isaias 1:18 (APD): “Dali kamo, husayon naton ini. Bisan ano kahigko sang inyo mga sala, limpyuhan ko ina agod mangin matinlo kamo.” Daw pareho lang nga ginsilingan ako ni Jehova: “Vicky, husayon naton ini. Kilala ko ikaw, nahibaluan ko ang imo mga sala, kag nabasa ko ang imo tagipusuon, pero palangga ko ikaw.”

Indi ako makatulog sadto nga gab-i. Daw indi ako gihapon magpati nga ginahigugma ako ni Jehova. Pero gindumdom ko nga gintubos ni Jesus ang akon mga sala. Narealisar ko dayon nga palangga gid ako ni Jehova kay madugay na nga mapinasensiahon sia sa akon. Pero nagsiling ako sa iya: “Indi ako nagakabagay sa imo pagpalangga. Indi madula sang pagtubos sang imo Anak ang akon mga sala.” Daw pareho lang nga ginbalik ko kay Jehova ang pagtubos ni Jesus. Pero bangod ginpamalandungan ko ini nga regalo sang Dios, nabatyagan ko nga palangga ako ni Jehova.

MGA BENEPISYO:

Malipayon na ako kag wala na nangil-ad sa akon kaugalingon. Nangin maayo ang amon relasyon nga mag-asawa. Nalipay man ako nga paagi sa akon eksperiensia, mabuligan ko ang iban. Nangin suod pa gid ako kay Jehova.

“Amo na Ini ang Sabat sa Akon Pangamuyo.”—SERGEY BOTANKIN

  • NATAWO: 1974

  • PUNGSOD: RUSYA

  • KABUHI SANG UNA: MAHILIG SA HEAVY-METAL NGA MUSIKA

ANG AKON NAGLIGAD:

Natawo ako sa Votkinsk. Diri natawo ang bantog nga kompositor nga si Pyotr Ilich Tchaikovsky. Pigado ang amon pamilya. Ang akon amay madamo sing maayo nga kinaiya, pero palahubog sia, gani pirme lang may ginamo sa balay.

Mahina ako sa amon klase, kag samtang nagaligad ang tinuig, nagbatyag ako nga kubos sangsa iban. Nangin hipuson ako kag nadulaan sing pagsalig sa mga tawo.  Nabudlayan gid ako sa eskwelahan. Halimbawa, kon may report ako, indi ko mapaathag bisan ang mahapos nga mga ideya nga mapaathag ko man sa iban nga tion. Sang naggradweyt ako sa ikawalo nga grado, mabasa sa akon kard: “Limitado ang bokabularyo, indi makapabutyag sang iya ideya.” Naluyahan gid ako sa sini kag nagnubo na gid ang pagtan-aw ko sa akon kaugalingon. Ginpaligban ko kon ano ang katuyuan sang akon kabuhi.

Sang tin-edyer ako, nagsugod ako sa pag-inom. Sang primero, maayo ang pamatyag ko. Pero kon matam-an ako inom, ginakonsiensia ako. Daw wala sing pulos ang akon kabuhi. Labi ako nga na-depress, kag kon kaisa, inadlaw ako nga nagapabukot sa balay. Nagpensar ako nga maghikog na lang.

Sang 20 anyos ako, nawili ako sa heavy-metal nga mga musika. Nalipay ako mamati sini kag gusto ko mag-upod sa mga mahilig man sini. Ginpalaba ko ang akon buhok, nagpang-aritos, kag gin-ilog ang pamayo sang ginaidolo ko nga mga musikero. Nangin agresibo ako kag harasharas, gani pirme kami nagaaway sang akon pamilya.

Abi ko mangin malipayon ako sa pagpamati sang heavy-metal nga musika, pero baliskad ang natabo. Naglain pa gid ang akon batasan! Kag sang nahibaluan ko nga may malain nga ginahimo ang ginaidolo ko nga mga musikero, pamatyag ko gintonto lang ako.

Nagplano ako liwat nga maghikog na gid. Pero sa pensar ko, ‘Ano na lang ang batyagon ni Nanay kon himuon ko ini?’ Palangga gid niya ako, kag ginhimo niya ang tanan para sa akon. Indi ko mahibaluan kon ano ang akon himuon. Gusto ko na nga maghikog, pero daw indi ko man ini mahimo.

Para magkadto sa iban nga butang ang akon pensar, nagbasa ako sing Russian nga balasahon. Nabasa ko ang sugilanon parte sa isa ka baganihan nga nagserbisyo sa simbahan. Daw nabatyagan ko dayon nga gusto ko man mag-alagad sa Dios kag sa iban. Nangamuyo ako sa Dios, kag sa una nga tion ginpabutyag ko sa iya ang akon ginabatyag. Ginpangabay ko sia nga buligan ako nga mahibaluan ang katuyuan sang akon kabuhi. Nalugpayan ako sina nga tion, labi na gid sang masunod nga natabo. Mga duha ka oras lang ang nagligad, may Saksi ni Jehova nga nanuktok kag nagtanyag sing pagtuon sa Biblia. Nagapati ako nga amo na ini ang sabat sa akon pangamuyo. Umpisa na yadto sang akon bag-o nga kabuhi.

KON PAANO GINBAG-O SANG BIBLIA ANG AKON KABUHI:

Bisan mabudlay, ginpanghaboy ko ang tanan nga butang parte sa heavy-metal nga musika. Pero, ini nga mga musika nagapabilin gihapon sa akon pensar. Kon makalabay ako sa mga lugar nga nagapatokar sini, madumduman ko dayon ang akon malain nga nagligad. Indi ko gusto nga dumdumon pa ini kay amat-amat ko na nga naapresyar ang maayo nga mga butang nga akon natun-an. Gani, wala na ako nagaagi sa sina nga mga lugar. Kon madumduman ko ang akon nagligad, nagapangamuyo ako. Bangod sini, nabatyagan ko “ang paghidait sang Dios nga nagalabaw sa tanan nga panghunahuna.”—Filipos 4:7.

Natun-an ko sa Biblia nga obligasyon sang mga Cristiano nga isugid sa iban ang ila ginapatihan. (Mateo 28:19, 20) Nagpensar ako nga indi ko gid ini mahimo. Pero ang mga butang nga akon natun-an, naghatag sa akon sing daku nga kalipay kag kalinong. Narealisar ko nga dapat man matun-an sang iban ini nga mga kamatuoran. Gani bisan nakulbaan ako, ginsugid ko ini sa ila. Bilang resulta, nagbaskog ang akon kompiansa sa kaugalingon kag naapresyar ko pa gid ang akon mga natun-an.

MGA BENEPISYO:

Subong, may asawa na ako kag malipayon kami. Madamo man ako sing nabuligan nga makatuon sa Biblia, lakip na si Nanay kag ang akon manghod nga babayi. Ang pag-alagad sa Dios kag pagbulig sa iban nga makatuon parte sa iya naghatag sang katuyuan sa akon kabuhi.