Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN AGOSTO 2011

 Tudlui ang Inyo Kabataan

Ngaa Ginpalangga si Dorcas?

Ngaa Ginpalangga si Dorcas?

GUSTO naton nga palanggaon kita sang mga tawo. Amo man bala sini ang ginabatyag mo? * Ang Biblia nagasugid parte kay Dorcas, nga ginpalangga gid sang madamo.

Si Dorcas nagaistar sa Joppe, isa ka siudad nga malapit sa Dagat Mediteraneo. Ang Jerusalem mga 56 kilometros lamang halin sa Joppe. Si Dorcas isa sa una nga mga disipulo ni Jesus.

Sa banta mo, ngaa ginpalangga gid si Dorcas?— Suno sa Biblia, madamo sia sing nahimo nga maayo kag nahatag nga mga regalo. Naghimo sia sing manami nga mga bayo para sa mga balo, ukon mga babayi nga patay na ang ila bana. Ginpakilala man niya ang matuod nga Dios, si Jehova, pareho sa ginhimo ni Jesus.

Nahibaluan mo bala kon ano ang natabo kay Dorcas?— Nagmasakit sia kag napatay.  Nasubuan ang tanan niya nga abyan. Gani nagpadala sila sing mga lalaki nga maglakbay sing mga 16 kilometros para pahibal-on si apostol Pedro. Ginsilingan nila sia nga magkadto dayon. Pag-abot ni Pedro, nagsaka sia sa kuarto ni Dorcas. Nagahinibi ang mga babayi, kag ginpakita nila sa iya ang mga bayo nga ginhimo ni Dorcas para sa ila.

Ginsilingan ni Pedro ang tanan nga maghalin sa kuarto. Nakahimo na sing mga milagro si Pedro kag ang iban nga apostol, pero wala pa sila nakabanhaw sang patay. Ano sa banta mo ang ginhimo ni Pedro?

Nagluhod si Pedro malapit sa bangkay kag nangamuyo kay Jehova. Dayon ginsilingan niya si Dorcas nga magbangon. Nagbangon si Dorcas! Ginpatindog sia ni Pedro kag ginpatawag ang mga balo kag ang iban pa para makita nila si Dorcas. Maimadyin mo bala ang ila kalipay?

Ano ang imo matun-an sa sini nga istorya parte sa pagkabanhaw ni Dorcas? Ginapakita sini nga kon buligan mo ang iban, palanggaon ka man nila. Labaw sa tanan, dumdumon ka kag higugmaon sang Dios. Indi gid niya pagkalimtan ang imo maayo nga ginhimo para sa iban. Hatagan ka niya sing kabuhi nga wala sing katapusan sa iya matarong nga bag-ong kalibutan.

Basaha sa Imo Biblia

^ par. 3 Kon ginabasa mo ini sa bata, magdulog ka kon makita mo ang dash kag pasabta sia.