Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN AGOSTO 2011

 Pamangkot sang mga Bumalasa . . .

Ang Dios Bala Nagaistar sa Isa Lang ka Lugar?

Ang Dios Bala Nagaistar sa Isa Lang ka Lugar?

Ginatudlo sang lainlain nga relihion nga ang Dios ara sa tanan nga lugar sa tanan nga tion. Halimbawa, suno sa New Catholic Encyclopedia, ang Dios “ara bisan diin kag sa bisan ano nga butang.” Si John Wesley, nga nagtukod sang Methodist Church, nagsulat man sing sermon nga natig-uluhan “On the Omnipresence of God” diin nagsiling sia nga ang Dios ara sa tanan nga butang.

Ano ang ginatudlo sang Biblia? Ang Dios bala ara bisan diin, sa langit, sa duta, kag sa mga tawo pa gani sa tanan nga tion?

Matuod, ang Biblia nagsiling nga ang Dios may puluy-an—ang langit. Sa pangamuyo ni Hari Solomon, nagsiling sia sa Dios: “Pamati ka sa langit nga imo puluy-an.” (1 Hari 8:43) Sang gintudluan ni Jesucristo ang iya mga disipulo kon paano mangamuyo, ginsilingan niya sila nga ipatuhoy ini sa ‘Amay nga yara sa langit.’ (Mateo 6:9) Sang nabanhaw si Jesus, nagsulod sia “sa langit mismo, agod mag-atubang sa Dios,” siling sang Biblia.—Hebreo 9:24.

Maathag nga ginapakita sini nga mga bersikulo nga si Jehova nga Dios wala nagapuyo bisan diin, kundi sa langit lamang. Siempre, “ang langit” nga ginsambit sa sini nga mga bersikulo wala nagapatuhoy sa atmospera ukon sa kahawaan. Ang Manunuga sang uniberso indi makaigo sa pisikal nga langit. (1 Hari 8:27) Ginasugid sang Biblia nga “ang Dios Espiritu.” (Juan 4:24) Nagaistar sia sa lugar sang mga espiritu, nga indi bahin sang pisikal nga uniberso.—1 Corinto 15:44.

Pero, ngaa may mga bersikulo sa Biblia nga daw nagasiling nga ang Dios ara bisan diin? Halimbawa, sa Salmo 139:7-10, si David nagsiling parte sa Dios: “Sa diin bala ako makadto palayo sa imo Espiritu? Ukon diin bala ako malagyo gikan sa imo atubangan? Kon magsaka ako sa langit, yadto ka didto! Kon maghigda ako sa Sheol, yadto ka didto! Kon gamiton ko ang mga pakpak sang kaagahon kag magpuyo sa kaukbungan gid sang dagat, bisan pa didto tuytuyan ako sang imo kamut.” Ginapakita bala sini nga mga bersikulo nga ang Dios ara sa tanan nga lugar nga ginsambit?

Talupangda nga sa umpisa, namangkot si David: “Sa diin bala ako makadto palayo sa imo Espiritu?” * Paagi sa iya balaan nga espiritu, makita sang Dios ang tanan kag magamit ang iya gahom bisan diin, nga indi na kinahanglan magkadto ukon mag-istar sa isa ka lugar. Sa pag-ilustrar: Sang nagligad nga mga tinuig, nausisa sang mga sientipiko ang duta sa planeta nga Mars, nga minilyon ka kilometro halin sa Duta. Paano? Wala sila nagkadto didto, kundi gintun-an nila ang mga piktyur kag iban pa nga impormasyon nga ginpadala sa Duta sang mga spacecraft nga ginpakadto sa Mars.

Sing kaanggid, indi kinahanglan nga si Jehova nga Dios ara sa tanan nga lugar para mahibaluan niya ang nagakatabo sa tanan nga bahin sang uniberso. Ang Pulong sang Dios nagasiling: “Wala sing tinuga nga indi dayag sa iya itululok.” (Hebreo 4:13) Huo, ang gamhanan nga puersa ni Jehova, ukon balaan nga espiritu, makalab-ot bisan diin. Gani, makita niya ang tanan kag matuman ang iya katuyuan halin sa iya nahamtangan, sa iya ‘balaan nga puluy-an’ sa langit.—Deuteronomio 26:15.

^ par. 8 Ang Hebreo nga tinaga diri nga ginbadbad “espiritu” nagapatuhoy sa aktibo nga puersa sang Dios, ang gahom nga ginagamit niya para matuman ang iya kabubut-on.