Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN AGOSTO 2011

Sin-o ang Dapat Magtudlo sa Kabataan Parte sa Dios?

Sin-o ang Dapat Magtudlo sa Kabataan Parte sa Dios?

 Sin-o ang Dapat Magtudlo sa Kabataan Parte sa Dios?

“Ang estudyante indi labaw sa iya manunudlo, apang ang tagsatagsa nga natudluan sing himpit mangin subong sang iya manunudlo.”—LUCAS 6:40.

ANG pila ka ginikanan nagabatyag nga indi nila masarangan ang pagtudlo sa ila kabataan parte sa Dios. Nagahunahuna sila nga kulang ang ila natun-an ukon ihibalo parte sa relihion. Bangod sini, mahimo nila itugyan ini nga responsibilidad sa ila paryente ukon sa lider sang relihion.

Gani, sin-o gid ang dapat magtudlo sa kabataan sing husto nga moral kag mga kamatuoran parte sa Dios? Binagbinaga ang ginasiling sang Biblia parte sa sini kag ang nadiskobrehan sang mga researcher.

Ano ang Papel sang Amay?

Ang ginatudlo sang Biblia: “Mga amay, dili ninyo pagpaakiga ang inyo mga anak, kondi sagura sila sa disiplina kag sa pagtudlo sang Ginoo.”—Efeso 6:4, Ang Biblia, PBS.

Ang nadiskobrehan sang mga researcher: Ano nga kaayuhan ang matigayon sang mga amay kon may mabakod sila nga pagtuluuhan? Ang artikulo nga Fathers’ Religious Involvement and Early Childhood Behavior, nga ginpagua sang 2009, nagsiling: “Ang pag-entra sa isa ka relihion makabulig  sa mga lalaki nga mangin maayo nga mga amay. Ang relihion nagahatag sing suporta kag giya sa kada indibiduwal kag subong man mga panudlo kag prinsipio kon paano magkabuhi.”

Suno sa Biblia, importante gid ang papel sang amay sa pagpadaku kag pagtudlo sa kabataan. (Hulubaton 4:1; Colosas 3:21; Hebreo 12:9) Pero mapuslanon bala gihapon ini nga laygay? Sang 2009, ang University of Florida nagpagua sing artikulo parte sa impluwensia sang mga amay sa ila kabataan. Nadiskobrehan sang mga researcher nga ang kabataan nga ginaatipan sing maayo sang ila mga amay mas maluluy-on kag mas may kompiansa sa kaugalingon. Ang mga bata nga lalaki indi gawa salawayon, kag ang mga bata nga babayi mas maalam. Gani, mapuslanon gihapon ang laygay sang Biblia.

Importante Bala ang Papel sang Iloy?

Ang ginatudlo sang Biblia: “Indi pagbayai ang kasogoan sang imo iloy.”—Hulubaton 1:8.

Ang nadiskobrehan sang mga researcher: Ang Handbook of Child Psychology sang 2006, nagsiling: “Parte sa pag-istorya kag pagpakig-upod sa kabataan, mas malawig sing mga 65% asta 80% ang tion nga ginahinguyang sang mga iloy sangsa mga amay, kag matuod man ini sa madamo nga pungsod.” Gani, ang ginahambal, ginahimo, kag paggawi sang mga iloy may daku nga epekto sa pagdaku sang isa ka bata.

Kon ginatudluan sang mga ginikanan ang ila kabataan sing kamatuoran parte sa Dios, ginahatagan nila sila sing duha ka bilidhon nga regalo. Una, may kahigayunan ang kabataan nga makig-abyan sa ila Amay sa langit, nga makahatag sing kaayuhan sa bilog nila nga kabuhi. Ikaduha, makatuon ang kabataan kon paano dapat magbuligay ang amay kag iloy sa pagtuman sang katungdanan. (Colosas 3:18-20) Bisan pa mahimo buligan sang iban ang mga ginikanan, responsibilidad nila gihapon nga tudluan ang ila kabataan parte sa Dios kag sa kon ano ang gusto sang Dios nga himuon sang isa ka pamilya.

Pero paano dapat tudluan sang mga ginikanan ang ila kabataan? Ano nga pamaagi ang pinakaepektibo?