Magdiretso sa kaundan

Magdiretso sa secondary menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan  |  Agosto 2011

Ginadumdom Niya nga “Kita Yab-ok”

Ginadumdom Niya nga “Kita Yab-ok”

 Mangin Suod sa Dios

Ginadumdom Niya nga “Kita Yab-ok”

“ABI ko sadto, indi gid ako mapatawad ni Jehova, kag tublagon ako sang akon konsiensia asta san-o,” sulat sang isa ka Cristiano nga babayi parte sa iya mga sala sang una. Matuod, mabudlay gid kon ginatublag ka sang imo konsiensia. Pero, ang Biblia nagahatag sing lugpay sa mga mahinulsulon. Binagbinaga ang ginsiling ni salmista David sa Salmo 103:8-14.

Nahibaluan ni David nga “si Jehova maluluy-on” kag wala ‘nagadumdum sing dayon sang aton mga kasaypanan.’ (Bersikulo 8-10, NW) Maluluy-on gid ang Dios sa mga mahinulsulon. Si David, nga isa ka maayo nga mamalaybay, naggamit sing tatlo ka pagpaanggid para ipakita kon daw ano ka maluluy-on ang Dios.

“Subong nga ang mga langit mataas labaw sa duta, amo kadaku ang iya malig-on nga paghigugma ayon sa mga nagakahadluk sa iya.” (Bersikulo 11) Kon magtangla kita sa langit kon gab-i, indi naton maimadyin ang kalayuon sang mga bituon sa duta. Gani, ginapakita diri ni David nga si Jehova maluluy-on katama, nga isa ka aspekto sang iya gugma. Ini nga kaluoy para lamang “sa mga nagakahadluk” sa Dios ukon sa mga “mapainubuson kag tinagipusuon nga nagatahod sa iya awtoridad,” siling sang isa ka iskolar.

“Subong sa kalayo sang sidlangan sa katundan, amo kalayo ang iya pagpahilayo sa aton sang aton mga paglalis.” (Bersikulo 12) Daw ano kalayo ang sidlangan sa katundan? Asta sa kalayuon nga mahanduraw naton. Suno sa isa ka reperensia sa Biblia, kon padayon kita nga maglakbay pasidlangan, labi nga magalayo ang aton distansia sa katundan. Ginapakita diri ni David nga kon napatawad na kita sang Dios, wala na niya ginadumdom ang aton mga sala.

“Kaangay sang amay nga nagakaawa sa iya mga anak, sa amo ang GINOO nagakaawa sa mga nagakahadluk sa iya.” (Bersikulo 13) Nahibaluan ni David, nga isa man ka amay, ang balatyagon sang isa ka mahigugmaon nga amay nga naluoy sa iya mga anak, labi na kon nagaantos sila. Ginapasalig kita ni David nga ang aton mahigugmaon nga Amay sa langit maluluy-on sa iya mga anak sa duta, ilabi na kon sila ‘nagakalisod kag nagahinulsol’ bangod sa ila mga sala.—Salmo 51:17, NW.

Pagkatapos sining tatlo ka pagpaanggid, ginpakita ni David kon ngaa maluluy-on si Jehova sa indi perpekto nga mga tawo: “Nakilala niya ang aton kahimtangan; nagadumdum sia nga kita yab-ok.” (Bersikulo 14) Nahibaluan ni Jehova nga ginhimo kita sa yab-ok, gani may mga kaluyahon kita kag mga limitasyon. Bangod sini, si Jehova “handa sa pagpatawad” kon mahinulsulon gid kita.—Salmo 86:5.

Natandog ka bala sa ginsiling ni David parte sa kaluoy ni Jehova? Gintun-an sang babayi nga ginsambit sa umpisa ang ginasiling sang Biblia nga si Jehova handa magpatawad. Nagsiling sia: “Nabatyagan ko nga nagsuod pa gid ako kay Jehova, kag wala na ako ginatublag sang akon konsiensia.” * Mabatyagan mo man ini kon tun-an mo ang parte sa kaluoy sang Dios kag kon paano mo matigayon ini.

Bahin sang Biblia nga Mahimo Basahon sa Agosto:

Salmo 87-118

[Nota]

^ par. 9 Basaha ang “Isa ka Dios nga ‘Handa Magpatawad’” sa kapitulo 26 sang libro nga Mangin Suod kay Jehova, nga ginhimo sang mga Saksi ni Jehova.

[Blurb sa pahina 13]

“Nabatyagan ko nga nagsuod pa gid ako kay Jehova, kag wala na ako ginatublag sang akon konsiensia”