Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN AGOSTO 2011

Ang Papa Bala sa Roma “Salili ni San Pedro”?

Ang Papa Bala sa Roma “Salili ni San Pedro”?

 Ang Papa Bala sa Roma “Salili ni San Pedro”?

SANG 2002, si Pope John Paul II nagsulat sa obispo sang Limburg, Germany, diin ginbag-o niya ang desisyon sang obispo parte sa aborsion. Sa iya sulat, nagsiling sia nga salabton niya ang “kaayuhan kag paghiusa sang tanan nga simbahan suno sa kabubut-on ni Jesucristo.” Suno sa iya, may awtoridad sia nga bag-uhon ang desisyon sang obispo, kay bilang papa, sia ang “salili ni San Pedro.”

Suno sa mga Romano Katoliko, “ginpili ni Cristo si Pedro nga mangin pangulo sang tanan nga apostoles.” Ginpahayag man sang Iglesia Katolika nga “nagsiling si Cristo nga dapat may mga salili si Pedro sa sini nga posisyon; kag ini nga mga salili amo ang Romano nga mga obispo.”—New Catholic Encyclopedia (2003), Tomo 11, pahina 495-496.

Nausisa mo na bala kon matuod ini nga mga pangangkon? Binagbinaga ang mga sabat sa tatlo ka pamangkot: (1) Ano ang ginasiling sang Biblia parte sa pangangkon nga si Pedro ang una nga papa? (2) Ano ginasiling sang kasaysayan parte sa ginhalinan sang posisyon sang mga papa? (3) Ginapakita bala sang ginahimo kag ginatudlo sang mga papa nga sila ang salili ni Pedro?

Si Pedro Bala ang Una nga Papa?

Para pamatud-an nga si Pedro ang pundasyon sang simbahan, madugay na nga ginagamit sang mga Katoliko ang ginsiling ni Jesus sa Mateo 16:18: “Ikaw si Pedro, kag sa sini nga igang tukuron ko ang akon kongregasyon.” Ini nga bersikulo nasulat sa Latin sa atop sang St. Peter’s Basilica sa Roma.

Si Augustine, nga ginarespeto nga Amay sang Simbahan, nagapati anay nga si Pedro ang pundasyon sang kongregasyon. Pero sang ulihi, nagbag-o ang iya pagtamod sa ginsiling ni Jesus. Sa sinulatan nga ginatawag Retractations, nagsiling si Augustine nga ang pundasyon sang simbahan, ukon Cristianong kongregasyon, amo si Jesus, indi si Pedro. *

Matuod, pirme ginasambit si Pedro sa mga Ebanghelyo. Ang tatlo lang ka apostoles nga sanday Juan, Santiago, kag Pedro, ang gin-upod ni Jesus sa pila ka pinasahi nga okasyon. (Marcos 5:37, 38; 9:2; 14:33) Gintugyan ni Jesus kay Pedro “ang mga yabi sang ginharian sang langit,” nga gingamit ni Pedro para buksan ang dalan sang Ginharian, una sa mga Judiyo kag sa mga proselita, dayon sa mga Samaritano, kag sang ulihi sa mga Gentil. (Mateo 16:19; Binuhatan 2:5, 41; 8:14-17; 10:45) Bangod indi mahuluy-on si Pedro, nangin humalambal sia sang mga apostoles. (Binuhatan 1:15; 2:14) Pero ginapakita bala sini nga si Pedro ang ulo sang kongregasyon sang una?

Nagsulat si Pablo nga gintugyan kay Pedro ang “pagkaapostol para sa mga natuli.” (Galacia 2:8) Pero, wala sing mabasa nga nagsiling sia nga ginpangunahan ni Pedro ang kongregasyon. Sa baylo, ginpatuhuyan niya ang papel ni Pedro sa pagwali sa mga Judiyo.

Bisan pa ginhatagan sing daku nga responsibilidad si Pedro, wala kita sing mabasa sa Biblia nga nagsiling sia nga sia ang ulo sang kongregasyon,  kag naghimo sing mga desisyon para sa mga disipulo. Sa iya sulat, gintawag lamang niya ang iya kaugalingon nga “apostol” kag ‘isa ka gulang.’—1 Pedro 1:1; 5:1.

Ano ang Ginhalinan sang Posisyon sang mga Papa?

San-o kag paano nagsugod ang ideya parte sa posisyon sang mga papa? Ang ideya nga wala sing malain sa isa ka tawo nga maghandum nga mangin mas mataas sa pareho niya nga sumilimba nagsugod sang panahon sang mga apostoles. Paano ini gintamod sang mga apostoles?

Ginsilingan ni Pedro ang mga lalaki nga nagapanguna sa kongregasyon nga indi ‘magpakaginuo sa mga palanublion gikan sa Dios’; dapat wagkusan nila ang ila kaugalingon sang pagpaubos sang hunahuna sa pagpakig-angot sa isa kag isa. (1 Pedro 5:1-5) Nagpaandam si apostol Pablo nga may mga tawo sa sulod sang kongregasyon nga “magahambal sang tiko nga mga butang agod ipahilayo ang mga disipulo kag pasundon sa ila.” (Binuhatan 20:30) Sang katapusan nga bahin sang unang siglo C.E., ginpakamalaut ni apostol Juan sa iya sulat ang isa ka disipulo nga si Diotrefes. Ngaa? Bangod ‘luyag sini magpulupangulo’ sa kongregasyon. (3 Juan 9) Bangod sini nga laygay sang mga apostoles, napunggan sing makadali ang handum sang mga gusto mangin prominente.—2 Tesalonica 2:3-8.

Wala madugay sa tapos mapatay ang katapusan nga apostol, nangin prominente ang pila ka tawo. Ang The Cambridge History of Christianity nagsiling: “Mahimo nga wala sing obispo nga may mataas nga awtoridad sa Roma sang tungatunga sang ikaduha nga siglo.” Sang mga ikatlo nga siglo, ginhimo sang obispo sang Roma ang iya kaugalingon bilang mataas nga awtoridad sa pila ka simbahan. * Para suportahan ang pangangkon nga ang obispo sang Roma may mataas nga awtoridad, ang pila naghimo sing listahan sang mga salili ni Pedro.

Pero, daw wala man sing nabulig ini nga listahan. Ngaa? Ang pila ka ngalan indi mapat-od. Luwas sini, may diperensia na sa umpisa pa lang sang listahan. Paano? Bisan pa nagwali si Pedro sa Roma, subong sang ginapakita sang pila ka literatura sang nahauna kag ikaduha nga siglo, wala sing ebidensia nga sia ang ulo sang kongregasyon didto.

Ang isa ka pamatuod nga si Pedro indi ang ulo sang kongregasyon sa Roma amo ang sulat ni apostol Pablo sa mga taga-Roma. Ginsambit niya ang madamo nga Cristiano didto, pero wala niya ginsambit si Pedro. (Roma 16:1-23)  Kon si Pedro ang ulo sang kongregasyon, malimtan sia ayhan ukon balewalaon ni Pablo?

Talupangda man, nga sang ginhimo ni Pedro ang iya una nga sulat, ginhimo man ni Pablo ang iya ikaduha nga sulat para kay Timoteo. Sa sina nga sulat, ginsambit ni Pablo ang Roma. Ang matuod, sa anom ka sulat nga ginhimo ni Pablo sa Roma, wala gid niya nasambit si Pedro.

Mga 30 ka tuig sa tapos ginhimo ni Pablo ang iya mga sulat, ginhimo man ni apostol Juan ang iya tatlo ka sulat kag ang Bugna. Sa sini nga mga sinulatan, wala nagsiling si Juan nga ang kongregasyon sa Roma amo ang pinakaprominente, ukon may lider sang simbahan nga nakabaton sing pinakamataas nga posisyon subong salili ni Pedro. Wala man sing ebidensia sa Biblia ukon sa kasaysayan nga ginhimo ni Pedro ang iya kaugalingon bilang una nga obispo sang kongregasyon sa Roma.

Ginasuportahan Bala sang Ginahimo kag Ginatudlo sang mga Papa ang ila Pangangkon?

Ginapaabot naton nga ilugon sang mga nagapangangkon nga “salili ni San Pedro” kag “Tiglawas ni Cristo” ang ginhimo kag gintudlo ni Pedro kag ni Jesus. Halimbawa, ginbaton bala ni Pedro ang espesyal nga pagtratar sa iya sang pareho niya nga mga sumilimba? Wala. Indi niya gusto nga simbahon sia. (Binuhatan 10:25, 26) Ano naman ang ginhimo ni Jesus? Nagsiling sia nga nagkari sia para mag-alagad, indi para alagdon. (Mateo 20:28) Pero ano ang ginahimo sang mga papa? Ginalikawan bala nila nga mangin prominente, maggamit sing mga titulo, ukon magpakitakita sang manggad kag gahom?

Sanday Pedro kag Jesus matarong nga mga tawo nga nagasakdag sang paghidait. Pero ang Katoliko nga ensiklopedia nga Lexikon für Theologie und Kirche (Lexicon for Theology and Church) nagsiling parte kay Pope Leo X: “Bangod nadalahig sia sa pulitika, nepotismo, kag sobra nga pagpangalipay, napabay-an ni Leo X ang iya importante nga hilikuton parte sa Dios.” Si Karl Amon, isa ka pari sang Katoliko kag propesor sang kasaysayan sang simbahan, nagsiling nga ang masaligan nga mga report parte kay Pope Alexander VI nagapakita nga nadalahig sia sa “grabe nga korapsion, pag-abuso sa awtoridad, pagbakal ukon pagbaligya sang mga pagkabutang sang simbahan, kag imoralidad.”

Ano naman ang ginatudlo sang mga papa kon ikomparar sa panudlo ni Pedro kag ni Jesus? Wala nagapati si Pedro nga mapalangit ang tanan nga maayo nga tawo. Nagsiling sia parte kay Hari David: “Si David wala magkayab sa langit.” (Binuhatan 2:34) Wala man nagtudlo si Pedro nga bunyagan, ukon bawtismuhan, ang mga lapsag. Sa baylo, gintudlo niya nga ang bawtismo isa ka tikang nga ginahimo sang isa ka tumuluo sa tapos niya ini mapamensaran sing maayo.—1 Pedro 3:21.

Gintudlo ni Jesus sa iya mga disipulo nga indi sila dapat maghandum nga mangin prominente. “Kon luyag sang bisan sin-o nga mangin nahauna,” siling ni Jesus, “dapat sia mangin ulihi sa tanan kag mangin alagad sang tanan.” (Marcos 9:35) Antes mapatay si Jesus, ginhatag niya ini nga sugo sa iya mga sumulunod: “Indi kamo magpatawag nga Rabbi, kay isa lamang ang inyo manunudlo, kag tanan kamo mag-ulutod. Dugang pa, indi kamo magtawag nga amay kay bisan sin-o sa duta, kay isa lamang ang inyo Amay, ang Isa nga langitnon. Indi man kamo magpatawag nga ‘mga lider,’ kay isa lamang ang inyo Lider, ang Cristo.” (Mateo 23:1, 8-10) Sa banta mo ginasunod bala sang mga papa ang mga panudlo nanday Pedro kag Jesus?

Para sa iban, dapat magpabilin ang papa sa iya posisyon bisan pa wala niya ginasunod ang Cristiano nga mga prinsipio. Husto bala ini nga pagtamod? Nagsiling si Jesus: “Ang tagsa ka maayo nga kahoy nagapatubas sang maayo nga bunga, apang ang tagsa ka malain nga kahoy nagapatubas sang wala pulos nga bunga; ang maayo nga kahoy indi makapamunga sang wala pulos nga bunga, ukon ang malain nga kahoy makapamunga sang maayo nga bunga.” Base sa mga ebidensia, magustuhan ayhan nanday Pedro kag Jesus ang mga bunga nga ginapakita sang mga papa?—Mateo 7:17, 18, 21-23.

[Mga Nota]

^ par. 7 Ang gin-istoryahan ni Jesus kag ni Pedro nasentro sa Cristo kag sa papel sini, indi sa papel ni Pedro. (Mateo 16:13-17) Nagsiling sang ulihi si Pedro nga si Jesus amo ang bato diin gintukod ang kongregasyon. (1 Pedro 2:4-8) Nagsiling man si Pablo nga ang “sadsaran nga pamusod nga bato” sang Cristianong kongregasyon amo si Jesus, indi si Pedro.—Efeso 2:20.

^ par. 14 Nagpaandam si Jesus kag ang mga apostoles nga ang Cristianong kongregasyon maimpluwensiahan sang mga tawo nga nagatudlo sang apostasya. (Mateo 13:24-30, 36-43; 2 Timoteo 4:3; 2 Pedro 2:1; 1 Juan 2:18) Natabo ini sang ikaduha nga siglo sang ginbaton sang simbahan, ukon Cristianong kongregasyon, ang pagano nga mga tradisyon kag ginsimpunan nila sang Griego nga mga pilosopiya ang panudlo sang Biblia.

[Mga Retrato sa pahina 25]

Ginapakita bala sang mga ebidensia nga ginailog sang mga papa ang halimbawa ni Pedro?