Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN HUNYO 2011

 Tudlui ang Inyo Kabataan

Nagabatyag Ka Bala nga Daw Lain Ka sa Iban?

Nagabatyag Ka Bala nga Daw Lain Ka sa Iban?

ANG isa makabatyag nga daw lain sia sa iban bangod sang iya kolor, pungsod, ukon lenguahe. Nakabatyag ka man bala sini? *

Istoryahan naton ang isa nga nakabatyag sini. Sia amo si Mefiboset. Kilalahon naton sia kag hibaluon kon ngaa nakabatyag sia sini. Kon nakabatyag ka nga daw lain ka sa iban, madamo ka sing matun-an kay Mefiboset.

Si Mefiboset bata ni Jonatan, nga amigo gid ni David. Antes mapatay si Jonatan sa inaway, nagsiling sia kay David: ‘Pakitai sing kaayo ang akon kabataan.’ Nangin hari si David. Pagligad sang pila ka tuig, gindumdom niya ang ginsiling ni Jonatan, kag buhi pa si Mefiboset. Naaksidente sia sang gamay pa sia kag napiang. Naintiendihan mo bala kon ngaa nagbatyag sia nga daw lain sia sa iban?

Gusto ni David nga pakitaan sing kaayo ang bata ni Jonatan. Gani ginpaistar niya si Mefiboset malapit sa iya balay sa Jerusalem, kag magakaon upod niya sa iya lamesa. Ginhatagan man niya si Mefiboset sing mga alagad—si Ziba kag ang iya mga anak kag mga alagad sini. Maayo gid ang pagtratar ni David sa bata ni Jonatan! Nahibaluan mo bala ang masunod nga natabo?

May gamo nga natabo sa balay ni David. Gintraidoran sia sang isa niya ka anak, nga si Absalom, kay gusto sini nga mangin hari. Kinahanglan nga malagyo si David. Madamo ang nag-upod sa iya kag gusto man tani ni  Mefiboset. Nahibaluan nila nga si David ang nagakabagay nga hari. Pero indi makaupod si Mefiboset kay nabudlayan sia maglakat.

Ginsilingan ni Ziba si David nga wala mag-upod si Mefiboset kay gusto sini nga mangin hari. Nagpati si David sa sini nga binutig! Gani ginhatag niya kay Ziba ang tanan nga pagkabutang ni Mefiboset. Nagdaug si David batok kay Absalom kag nagpuli sia sa Jerusalem. Ginpamatian niya ang paathag ni Mefiboset kag nagdesisyon nga tungaon ni Mefiboset kag ni Ziba ang pagkabutang. Ano sa banta mo ang ginhimo ni Mefiboset?

Wala sia nagreklamo sa desisyon ni David. Indi niya gusto nga hatagan pa sing problema ang hari kay maapektuhan ang trabaho sini. Gani nagsiling sia nga ihatag na lang kay Ziba ang tanan nga pagkabutang. Ang mas importante kay Mefiboset amo nga nakabalik sa Jerusalem bilang hari ang alagad ni Jehova nga si David.

Madamo sing kabudlayan si Mefiboset. Pirme sia nagabatyag nga daw lain sia sa iban. Pero ginpalangga sia kag gin-atipan ni Jehova. Ano ang aton matun-an sa sini?— Bisan pa nagahimo kita sing eksakto, ang iban mahimo maghambal sing binutig parte sa aton. Si Jesus nagsiling: “Kon ang kalibutan nagadumot sa inyo, nahibaluan ninyo nga nagdumot ini sa akon antes ini nagdumot sa inyo.” Ginpatay pa gani sang mga tawo si Jesus! Makasalig kita nga kon himuon naton ang eksakto, palanggaon kita sang matuod nga Dios, nga si Jehova, kag sang iya Anak, nga si Jesus.

^ par. 3 Kon ginabasa mo ini sa bata, magdulog ka kon makita mo ang dash kag pasabta sia.