Magdiretso sa kaundan

Magdiretso sa listahan sang kaundan

Ang Dios Bala May Organisasyon?

Ang Dios Bala May Organisasyon?

 Ang Dios Bala May Organisasyon?

ANG tanan nga tinuga sang Dios organisado. Luwas sa pisikal nga mga tinuga, ginapakita sang Biblia nga ang mga anghel sa langit naorganisar sing maayo sa pagtuman sa katuyuan sang Manunuga. Sa isa ka palanan-awon, nakita ni propeta Daniel ang tuman kadamo nga anghel sa trono sang Dios sa langit: “Ang mga linibo sang mga linibo nag-alagad sa iya, kag linaksa sa mga linaksa nagtilindug sa atubangan niya.” (Daniel 7:9, 10) Hunahunaa ang pagkaorganisado sinang tuman kadamo nga anghel, nga sobra sa isa ka gatos ka milyon, kag nagatuman sa sugo sang Dios para sa iya mga alagad sa duta!—Salmo 91:11.

Bisan pa ang Manunuga, nga si Jehova nga Dios, amo ang pinakamaayo nga Organisador, indi sia sobra ka estrikto. Sa baylo, mahigugmaon sia kag malipayon nga Dios nga nagaulikid sa tanan niya nga tinuga. (1 Timoteo 1:11; 1 Pedro 5:7) Makita ini sa iya pagpakig-angot sa Israel sang una kag sa mga Cristiano sang unang siglo.

Ang Israel sang Una Naorganisar sing Maayo

Gingamit ni Jehova nga Dios si Moises para organisahon ang mga Israelinhon sa matuod nga pagsimba. Binagbinaga ang kahimusan sa pagkampo sang ara sila sa kamingawan sang Sinai. Sigurado nga nagkinagamo sila kon pasugtan lang ang kada pamilya nga magpatindog sang tolda bisan diin. Naghatag si Jehova sing espesipiko nga sugo kon diin makampo ang tagsa ka tribo. (Numeros 2:1-34) Makita man sa Kasuguan ni Moises ang espesipiko nga mga sugo parte sa ikaayong lawas kag katinlo—halimbawa, kon ano ang himuon sang isa kon mamus-on sia.—Deuteronomio 23:12, 13.

Sang nagsulod ang Israel sa Ginsaad nga Duta, naorganisar sila sing maayo sa madamo nga paagi. Gintunga sila sa 12 ka tribo, nga ang kada isa may ginapanag-iyahan nga duta. Ang Kasuguan nga ginhatag ni Jehova paagi kay Moises nagaapektar sa tanan nga aspekto sang ila kabuhi—sa pagsimba, pag-asawahay, pamilya, edukasyon, negosyo, pagkaon, pagpanguma, pagsagod sang sapat, kag iban pa. * Bisan pa ang pila ka kasuguan espesipiko kag detalyado, tanan ini pamatuod sang pag-ulikid ni Jehova sa iya katawhan kag naghatag sa ila sing kalipay. Paagi sini, matigayon sang mga Israelinhon ang pagpakamaayo ni Jehova.—Salmo 147:19, 20.

Matuod, si Moises isa ka maayo nga lider, pero ang ila kadalag-an wala nagadepende sa iya ikasarang sa pagdumala, kundi sa iya katutom sa kahimusan sang Dios. Halimbawa, paano nahibaluan ni Moises ang husto nga alagyan sa kamingawan? Gingiyahan sila ni Jehova paagi sa haligi nga panganod sa adlaw kag haligi nga kalayo sa gab-i. (Exodo 13:21, 22) Bisan gingamit ni Jehova ang mga tawo, sia gihapon ang nagaorganisar kag nagagiya sa iya katawhan. Amo man sini ang iya ginhimo sang unang siglo.

 Ang mga Cristiano sang Unang Siglo Naorganisar sing Maayo

Bangod sa mapisan nga pagwali sang mga apostoles kag sang mga disipulo, ang Cristianong mga kongregasyon natukod sa madamo nga lugar sa Asia kag Europa sang unang siglo. Bisan pa ini nga mga kongregasyon ara sa lainlain nga lugar, indi sila independiente nga mga grupo. Sa baylo, naorganisar sila sing maayo kag mahigugmaon nga ginatatap sang mga apostoles. Halimbawa, si Tito ginpadala ni apostol Pablo sa Creta para “makaayo ang kinahanglan kaayuhon” didto. (Tito 1:5, Biblia sang Katilingban sang mga Kristiano, BKK) Nagsulat man si Pablo sa kongregasyon sang Corinto nga ang pila ka kauturan may “ikasarang sa pagpanguna,” ukon “mga manugdumala.” (1 Corinto 12:28; BKK) Pero sin-o ang naghimo sina nga kahimusan? Suno kay Pablo, “gintingob sang Dios,” ukon “gin-organisar,” ang kongregasyon.—1 Corinto 12:24; The Riverside New Testament.

Ang gintangdo nga mga manugtatap sang Cristianong kongregasyon indi labaw sa ila masigkatumuluo. Sa baylo, mga “masigkamanugpangabudlay” sila nga nagapagiya sa espiritu sang Dios, kag dapat mangin “mga halimbawa sa panong.” (2 Corinto 1:24; 1 Pedro 5:2, 3) Ang ginbanhaw nga si Jesucristo, indi ang bisan sin-o nga indibiduwal ukon grupo sang indi perpekto nga mga tawo, ang “ulo sang kongregasyon.”—Efeso 5:23.

Sang ang kongregasyon sang Corinto naghimo sing kahimusan nga lain sa iban nga kongregasyon, si Pablo nagsulat: “Ano? Gikan bala sa inyo ang pulong sang Dios, ukon tubtob sa inyo lamang bala nakalab-ot ini?” (1 Corinto 14:36) Gingamit ni Pablo ini nga pamangkot para tadlungon sila kag buligan nga indi dapat mangin independiente. Sang ginsunod nila ang ginsiling sang mga apostoles, nagdamo kag nag-uswag ang mga kongregasyon.—Binuhatan 16:4, 5.

Pamatuod sang Gugma sang Dios

Subong, ang iban wala nagapakigbahin sa isa ka relihioso nga organisasyon. Pero ginapakita sang Biblia nga ginagamit pirme sang Dios ang iya organisasyon sa pagtuman sang iya katuyuan. Gin-organisar niya ang iya mga sumilimba sa Israel sang una kag ang mga Cristiano sang unang siglo.

Kon amo, ginagiyahan bala gihapon ni Jehova nga Dios ang iya katawhan pareho sang una? Ang pagkaorganisado kag paghiusa sang iya mga sumilimba pamatuod sang iya mahigugmaon nga pag-atipan sa ila. Subong, ginagamit gihapon ni Jehova ang iya organisasyon sa pagtuman sang iya katuyuan sa katawhan. Paano makilala ang iya organisasyon? Binagbinaga ang mga masunod.

Ang matuod nga mga Cristiano naorganisar para himuon ang isa ka hilikuton. (Mateo 24:14; 1 Timoteo 2:3, 4) Ginsugo ni Jesus ang iya mga sumulunod nga iwali ang maayong balita sang Ginharian sa tanan nga pungsod. Indi ini magmadinalag-on kon wala sing isa ka organisasyon sa bilog nga kalibutan. Sa pag-ilustrar: Sarang mo mapakaon ang isa ka tawo, pero kon linibo ukon minilyon ang imo pakan-on, kinahanglan mo ang isa ka grupo nga naorganisar sing maayo kag nagabuligay. Para matuman ang ila hilikuton, ang matuod nga mga Cristiano ‘nagahilisugut,’ ukon ‘nagaalagad sing ulolupod sa Dios.’ (Sofonias 3:9; BKK) Magamadinalag-on ayhan ang isa ka hilikuton sa lainlain nga pungsod ukon lenguahe kon wala sing nahiusa nga organisasyon? Indi gid.

Ang matuod nga mga Cristiano naorganisar para buligan ang isa kag isa. Kon magtaklad ka sa bukid nga nagaisahanon, wala gid sing may mabulig sa imo kon maaksidente ka. Gani, indi gid maalamon nga magpain sang kaugalingon. (Hulubaton 18:1) Para matuman  sang mga Cristiano ang sugo ni Jesus, dapat sila magbuligay. (Mateo 28:19, 20) Ang Cristianong kongregasyon nagahatag sing base sa Biblia nga mga pagtudlo, paghanas, kag pagpalig-on para makapadayon ang tanan. Paano matudluan ang isa parte kay Jehova kon wala sing naorganisar nga Cristianong mga pagtilipon para sa pagtudlo kag pagsimba?—Hebreo 10:24, 25.

Ang matuod nga mga Cristiano naorganisar para alagaron ang Dios sing nahiusa. Ang mga karnero ni Jesus nagapamati sa iya tingog, gani nangin “isa [sila] ka panong” sa idalom sang iya pagpanguna. (Juan 10:16) Wala sila nabahinbahin sa lainlain nga relihion ukon mga panudlo. Sa baylo, tanan sila ‘nagahambal nga may paghilisugot.’ (1 Corinto 1:10) Para matigayon ang paghiusa, dapat mangin organisado kita, kag para mangin organisado, kinahanglan ang organisasyon. Ang nahiusa lamang nga paghiliutod ang pakamaayuhon sang Dios.—Salmo 133:1, 3.

Bangod sa matuod nga gugma sa Dios kag sa kamatuoran sang Biblia, minilyon ang nagbuylog sa isa ka organisasyon nga nagatuman sang mga ginasiling sang Biblia. Bilang organisado kag nahiusa nga katawhan, ang mga Saksi ni Jehova sa bilog nga kalibutan nagatinguha nga himuon ang kabubut-on sang Dios. Nagasalig sila sa iya promisa: “Magapuyo ako sa tunga nila kag magalakat ako sa tunga nila, kag ako mangin ila Dios, kag sila mangin akon katawhan.” (2 Corinto 6:16) Matigayon mo man ini nga pagpakamaayo kon simbahon mo si Jehova nga Dios upod sa iya organisasyon.

[Nota]

^ par. 6 Basaha ang libro nga Insight on the Scriptures, Tomo 2, pahina 214-220, nga ginhimo sang mga Saksi ni Jehova.

[Retrato sa pahina 13]

Ang pagkampo sang mga Israelinhon naorganisar sing maayo

[Mga Retrato sa pahina 14, 15]

Para magmadinalag-on ang pagwali nga hilikuton sa bilog nga kalibutan, kinahanglan ang organisasyon

Pagwali sa mga balay

Pagbulig sa tion sang kalamidad

Mga asembleya

Pagtukod sang mga tilipunan para sa pagsimba