Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN MAYO 2011

Ang Mahidaiton nga mga Tawo Nagdepensa sa Ila Maayo nga Ngalan

Ang Mahidaiton nga mga Tawo Nagdepensa sa Ila Maayo nga Ngalan

PARA SA MGA PUMULUYO SANG RUSYA: Paagi sa sini nga artikulo, mahibaluan sang minilyon ka tawo sa sobra sa 230 ka kadutaan ang indi makatarunganon nga pagkuha sang kahilwayan sa pagsimba sa Rusya. Ini nga magasin, nga Ang Lalantawan, may pinakamadamo nga translation kag ginapanagtag sa bilog nga kalibutan. Ini nga artikulo mabasa sa 188 ka lenguahe kag imprintahon sa sobra sa 40 milyones ka kopya. Mahimo nga indi gusto sang pila ka opisyal nga mahibaluan sang mga tawo sa bilog nga kalibutan ang nagakatabo sa mga Saksi ni Jehova sa Rusya. Pero mangin matuod gid ang ginsiling ni Jesus: “Wala sing bisan ano nga nalipdan sing maayo nga indi mabuyagyag, kag sekreto nga indi mahibaluan.”—LUCAS 12:2.

SANG Disiembre 2009 kag Enero 2010, gindeklarar sang duha sa pinakamataas nga korte sa Rusya nga batok sa gobierno ang mga Saksi ni Jehova. Daw nasulit ang natabo sang una. Sang gingamhan sang Sobyet ang Rusya, linibo ka Saksi ang gin-akusahan nga kaaway sang pungsod. Gintapok sila, ginpriso, kag ginpaobra sa mga kampo konsentrasyon. Sang nagbulos ang bag-o nga paggahom, ginhilway ang mga Saksi ni Jehova. Ginkilala sang bag-o nga gobierno ang ila maayo nga ngalan. * Pero subong, may pila ka tawo nga gusto naman magpakalain sa mga Saksi.

Sang maaga nga bahin sang 2009, ginsugdan sang mga awtoridad ang paghingabot sa mga Saksi ni Jehova. Sang Pebrero lamang, sobra sa 500 ka kaso sa bilog nga pungsod ang gin-imbestigahan sang mga piskal. Ngaa? Para hibaluon ang nalapas sang mga Saksi. Pagkadason nga mga bulan, gin-raid sang mga pulis ang ila mga pagtilipon sa Kingdom Hall kag mga puluy-an. Ginkompiskar ang ila mga literatura kag mga pagkabutang. Gin-deport ang mga abogado sang mga Saksi nga naghalin sa iban nga pungsod kag gindumilian sila nga makabalik.

 Sang Oktubre 5, 2009, ginpunggan sang mga opisyal ang pagpasulod sang mga literatura sa Biblia sa dulunan nga malapit sa St. Petersburg. Ini nga mga literatura gin-imprinta sa Germany kag para kuntani sa mga kongregasyon sa Rusya. Gin-usisa ini sang isa ka grupo sang mga ahente sang customs sa Rusya nga nagausisa man sang mga kontrabando. Ngaa? Suno sa isa ka opisyal nga dokumento, “mahimo nagaunod [ini] sang mga butang nga makatuga sang kinagamo sa relihion.”

Naglala pa gid ang kahimtangan. Gindeklarar sang Supreme Courts of the Russian Federation kag sang Altay Republic (bahin sang Rusya) nga batok sa gobierno ang pila ka publikasyon sang mga Saksi, lakip ini nga magasin. Nag-apelar ang mga Saksi ni Jehova, kag madamo nga pungsod ang nagpabutyag sang simpatiya. Pero wala nagbag-o ang desisyon sang korte! Ilegal gihapon ang pagpasulod ukon pagpanagtag sang mga literatura sa Biblia sa Rusya.

Paano gin-atubang sang mga Saksi ang pagpakalain sa ila kag pagdumili sa ila hilikuton? Kag ano ang ginapakita sang desisyon sang Korte parte sa kahilwayan sa relihion sang tanan nga pumuluyo sang Rusya?

Naghulag Sila Gilayon

Si Vladimir Litvin (81 anyos) gintapok sa Krasnoyarskiy Kray sang 14 anyos sia. Sa tion sang kampanya sang Biernes sang kaagahon, ginpangunahan niya ang isa ka grupo sang mga Saksi ni Jehova sa pagpanagtag sang tract

Sang Biernes, Pebrero 26, 2010, mga 160,000 ka Saksi ni Jehova sa Rusya ang nagsugod sa pagpanagtag sang 12 milyones ka kopya sang pinasahi nga tract nga Could It Happen Again? A Question for the Citizens of Russia. Halimbawa, sa Usol’ye-Sibirskoye nga isa ka siudad sa Siberia, ginatos ka Saksi ang nagtipon sa mga kalye sang 5:30 sa aga. Ang pila sa ila gintapok sa Siberia sang 1951 bangod sa ila pagtuluuhan. Ginbatas nila ang -40 degrees Celcius nga temperatura para ipanagtag ang ila parte nga 20,000 ka tract.

Si Nikolai Yasinski (73 anyos) nalipay gid sa pagpakigbahin sa kampanya. Namangkot sia, “Hingabuton naman bala kita kag kuhaon ang aton kinamatarong sa pagsimba kay Jehova?”

Para ipahibalo ang ila tatlo ka adlaw nga kampanya, nagpatawag sang press conference ang mga Saksi ni Jehova sa Moscow, ang kapital sang Rusya. Ang isa nga gin-imbitar nga maghambal amo si Mr. Lev Levinson, isa ka eksperto sang Human Rights Institute. Ginsugid niya ang pagpamintas kag paghingabot sang Nazi Germany kag Union Sobyet sa mga Saksi ni Jehova, nga sang ulihi gindeklarar nga wala sing sala. Nagsiling man sia: “Ang tanan nga relihion nga ginhingabot sang naggahom ang Sobyet gindeklarar ni Presidente Yeltsin nga hatagan sing kahilwayan. Kag ang tanan nga ginkuha sa ila dapat ibalik. Wala sing bisan ano nga propiedad ang mga Saksi ni Jehova nga ginkuha sang Union Sobyet, pero ginbalik sa ila ang ila maayo nga ngalan.”

 Nabutang liwat sa peligro ang ila maayo nga ngalan. “Sa sini mismo nga pungsod nga nagpabutyag sing kasubo,” siling ni Mr. Levinson, “ginahingabot ini nga mga tawo nga wala sing mabakod nga basihan.”

Ang Reaksion sang mga Tawo sa Kampanya

Ano ang epekto sang pagpanagtag sang tract? Si Mr. Levinson nagsiling: “Samtang nagapakadto ako sa [press] conference, nakita ko ang mga tawo sa higad sang dalan nga nagabasa sang balasahon nga ginapanagtag sang mga Saksi ni Jehova sa bilog nga Rusya subong nga adlaw. . . . Ginabasa nila ini sing maayo.” * Ari ang pila ka eksperiensia.

Sa isa ka lugar nga kalabanan Muslim, sa sentro nga bahin sang Rusya, ginbaton sang isa ka tigulang nga babayi ang tract kag namangkot kon parte sa ano ini. Sang ginsilingan sia nga parte ini sa mga kinamatarong kag kahilwayan sa Rusya, nagsiling sia: “Sa katapusan, may naghatag na gid man sing atension sa sini nga mga isyu! Kay subong, ang Rusya nagabalik naman sa tion sang Union Sobyet. Madamo gid nga salamat. Maayo gid ang inyo ginhimo!”

Ang isa ka babayi sa Chelyabinsk nga gintanyagan sang tract, nagsiling: “May ara na ako sini, nabasa ko na gani. Nagaapin ako sa inyo. Wala sing iban nga relihion nga nagdepensa sang ila pagtuluuhan sing amo sini ka organisado. Nanamian ako sa inyo pamayo, kag matinahuron gid kamo. Kumbinsido gid kamo sa inyo ginapatihan. Daw ara gid ang Dios sa inyo.”

Sa St. Petersburg, ang isa ka tawo nga nakabaton na sang tract ginpamangkot kon nagustuhan niya ang iya nabasahan.  “Huo,” sabat niya. “Samtang ginabasa ko ini, nagpalanindog ang akon balahibo, kag naghibi ako. Ang akon lola ginpriso [sang panahon sang Sobyet] kag madamo sia sing ginsugid sa akon parte sa mga upod niya nga ginpriso. Madamo sa ila ang mga kriminal, pero ang iban ginpriso bangod sa ila pagtuluuhan. Dapat ini mahibaluan sang tanan, kag husto gid ang inyo ginhimo.”

Ano nga Palaabuton ang Nagahulat sa Rusya?

Si Stepan Levitsky (85 anyos) kag ang iya asawa nga si Yelena. Napriso sia sing napulo ka tuig bangod sa isa ka kopya sang magasin nga Ang Lalantawan

Nalipay gid ang mga Saksi ni Jehova sa Rusya sa ila kahilwayan sang nagligad nga duha ka dekada. Pero nahibaluan nila nga mahapos lang kuhaon ini nga kahilwayan. Mahibaluan sa palaabuton kon bala ang paghingabot sa ila subong mangin tanda nga kuhaon liwat sang Rusya ang kinamatarong kag kahilwayan sang mga tawo.

Determinado gid ang mga Saksi ni Jehova nga padayon nga iwali ang mensahe sang Biblia parte sa paghidait kag paglaum, bisan ano man ang matabo. Ginapakita sang konklusion sang pinasahi nga tract ang ila determinasyon: “Ang pagdumili indi magmadinalag-on. Indi kami mag-untat sa pagsugid sing matinahuron parte kay Jehova nga Dios kag sa iya Pulong, ang Biblia. (1 Pedro 3:15) Wala kami nag-untat sang ginpintasan kami sang Nazi Germany, wala kami nag-untat sang ginkuha sadto sang aton pungsod ang amon kahilwayan, kag indi gid kami mag-untat subong.—Binuhatan 4:18-20.”

^ par. 13 Pila ka oras antes sang press conference, ang mga kongregasyon sang mga Saksi ni Jehova sa Moscow nagpanagtag sang tract.