Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan  |  Abril 2011

Si Jesus—Diin Sia Naghalin?

Si Jesus—Diin Sia Naghalin?

‘Nagsulod liwat si Pilato sa palasyo sang gobernador kag nagsiling kay Jesus: “Diin ka naghalin?” Apang wala magsabat si Jesus.’—JUAN 19:9.

AMO ini ang pamangkot sang Gobernador sang Roma nga si Poncio Pilato sang ginabista si Jesus. * Nahibal-an ni Pilato kon diin sa Israel naghalin si Jesus. (Lucas 23:6, 7) Nahibal-an man niya nga si Jesus indi kinaandan nga tawo. Ginpaligban ayhan ni Pilato kon bala nagkabuhi na sang una si Jesus? Handa gid man bala batunon sining pagano nga manuggahom ang kamatuoran kag sundon ini? Ano man ang iya rason, wala sia ginsabat ni Jesus, kag napamatud-an sang ulihi nga mas interesado si Pilato sa iya posisyon sangsa kamatuoran kag hustisya.—Mateo 27:11-26.

Mahapos mahibaluan sang sinsero nga mga tawo kon diin naghalin si Jesus. Maathag ini nga ginapakita sang Biblia. Binagbinaga ang mga masunod.

Diin sia natawo?

Sa moderno nga kalkulasyon, natawo si Jesus sang nagaumpisa ang tigragas sang 2 B.C.E., sa isa ka kubos nga kahimtangan sa Betlehem sa Judea. Bangod sa mando ni Cesar Augusto nga magparehistro, si Maria nga iloy ni Jesus nga “manugbata na” kag ang iya bana nga si Jose, naglakbay pa Betlehem nga lugar sang mga katigulangan ni Jose. Wala sila sing madayunan, amo nga nagtener na lang sila sa kuadra, kag didto natawo si Jesus kag ginbutang sa pasungan.—Lucas 2:1-7.

Ginatos ka tuig antes sini, gintagna sang Biblia kon diin matawo si Jesus: “Ikaw, Bet-lehem Efrata, nga diotay nga magpatunga sa mga linibo sang Juda, gikan sa imo magagowa sa akon ang isa nga manginmanugdumala sa Israel.” * (Miqueas 5:2) Gamay katama nga siudad ang Betlehem, gani wala ini nalista sa mga teritoryo sang Juda. Pero, pinasahi gid ang Betlehem kay magahalin diri ang ginsaad nga Mesias, ukon Cristo.—Mateo 2:3-6; Juan 7:40-42.

Diin sia nagdaku?

Sa tapos makatener sing makadali sa Egipto, nagsaylo ang pamilya ni Jesus sa Nazaret, isa ka siudad sa probinsia sang Galilea nga mga 96 kilometros sa aminhan sang Jerusalem. Manugtatlo ka tuig na si Jesus sadto. Sa sining matahom nga lugar, diin may mga mangunguma, manugpahalab, kag mga mangingisda, nagdaku si Jesus sa isa ka daku kag imol nga pamilya.—Mateo 13:55, 56.

Ginatos ka tuig antes sini, gintagna sang Biblia nga ang Mesias isa ka “Nazaretnon.” Ang manunulat sang Ebanghelyo nga si Mateo nagsiling nga ang pamilya ni Jesus maistar sa “Nazaret,  agod matuman ang pinamulong paagi sa mga manalagna: ‘Tawgon sia nga Nazaretnon.’” (Mateo 2:19-23) Mahimo nga ang ngalan nga Nazaretnon naangot sa Hebreo nga tinaga para sa “salingsing.” Ginapatuhuyan ni Mateo ang tagna ni Isaias nga nagtawag kay Jesus nga isa ka “salingsing” halin kay Jesse. Buot silingon, ang Mesias magahalin sa kaliwatan ni Jesse, ang amay ni Hari David. (Isaias 11:1, NW) Matuod gid ini kay si Jesus nangin kaliwat ni Jesse paagi kay David.—Mateo 1:6, 16; Lucas 3:23, 31, 32.

Diin gid sia naghalin?

Ginatudlo sang Biblia nga madugay na nga nagkabuhi si Jesus antes pa sia natawo sa kuadra sa Betlehem. Ang tagna ni Miqueas, nga ginsambit kaina, nagsiling man nga “ang iya mga gingikanan kutub pa sa dumaan, sa wala sing katapusan.” (Miqueas 5:2) Bilang panganay nga Anak sang Dios, si Jesus isa ka espiritu nga tinuga sa langit antes pa sia natawo sa duta. Si Jesus mismo nagsiling: “Nagpanaug ako gikan sa langit.” (Juan 6:38; 8:23) Paano ini nangin posible?

Paagi sa balaan nga espiritu, si Jehova nga Dios naghimo sing milagro sang ginsaylo niya ang kabuhi sang iya Anak sa langit sa tiyan sang Judiyo nga birhen nga si Maria para matawo ini nga perpekto. * Mahapos lang ini para sa Labing Gamhanan nga Dios. Subong sang ginpaathag sang anghel kay Maria, “wala sing kapahayagan sang Dios nga indi niya matuman.”—Lucas 1:30-35, 37.

Wala lamang ginasugid sang Biblia kon diin naghalin si Jesus. Ginasugid man sang apat ka Ebanghelyo—ang Mateo, Marcos, Lucas, kag Juan—kon paano sia nagkabuhi.

^ par. 3 Para sa dugang nga impormasyon parte sa pagdakop kag pagbista kay Jesus, basaha ang artikulo nga “Ang Indi Gid Makatarunganon nga Pagbista,” sa pahina 18-22 sini nga magasin.

^ par. 6 Ang Efrata (ukon Efrat) amo sang una ang ngalan sang Betlehem.—Genesis 35:19.

^ par. 10 Si Jehova ang ngalan sang Dios sa Biblia. Sa Maayong Balita nga Biblia, ang footnote sang Genesis 2:4 nagasiling: “Ang GINOO sa Hebreo nga teksto Yahweh. Sa iban nga pagbadbad ginagamit ang Jehova.”