Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN ABRIL 2011

Si Jesus—Ngaa Napatay Sia?

Si Jesus—Ngaa Napatay Sia?

 Si Jesus—Ngaa Napatay Sia?

“Ang Anak sang tawo nagkari, . . . agod . . . ihatag ang iya kalag [ukon, kabuhi] subong gawad nga kabaylo sang madamo.”—MARCOS 10:45.

NAKAHIBALO si Jesus sang matabo sa iya. Indi mangin malinong ang iya kabuhi kay maeksperiensiahan niya ang masakit nga kamatayon samtang treintahon pa lang sia. Pero handa si Jesus nga atubangon ini.

Ginpakita sang Biblia nga importante gid ang kamatayon ni Jesus. Suno sa isa ka reperensia, ang kamatayon ni Jesus ginsambit sing 175 ka beses sa Cristianong Griegong Kasulatan, ukon Bag-ong Katipan. Kon amo, ngaa kinahanglan mag-antos si Jesus kag mapatay? Dapat naton ini mahibaluan kay ang iya kamatayon may daku nga epekto sa aton kabuhi.

Kon ano ang ginapaabot ni Jesus Sa katapusan nga tuig sang kabuhi ni Jesus, pirme niya ginasugid sa iya mga disipulo nga magaantos sia kag mapatay. Sang nagapakadto sila sa Jerusalem para saulugon ang katapusan niya nga Paskua, ginsilingan niya ang iya 12 ka apostoles: “Ang Anak sang tawo itugyan sa puno nga mga saserdote kag mga escriba, kag pamatbatan nila sia sing kamatayon kag itugyan sia sa mga tawo sang mga pungsod, kag uligyaton nila sia kag duplaan kag lapdusan kag patyon.” * (Marcos 10:33, 34) Ngaa sigurado gid sia nga matabo ini?

Nahibaluan ni Jesus ang madamo nga tagna sa Hebreong Kasulatan parte sa kon paano sia mapatay. (Lucas 18:31-33) Binagbinaga ang pila ka tagna kag kon diin makita sa Biblia ang paathag parte sa katumanan sini.

Ang Mesias . . .

▪ Luiban kabaylo sang 30 ka bilog nga pilak.—ZACARIAS 11:12; MATEO 26:14-16.

▪ Hanuton kag duplaan.—ISAIAS 50:6; MATEO 26:67; 27:26, 30.

▪ Ilansang.—SALMO 22:16; MARCOS 15:24, 25.

▪ Yagutaon samtang ara sa usok.—SALMO 22:7, 8; MATEO 27:39-43.

▪ Mapatay nga wala sing bali ang iya mga tul-an.—SALMO 34:20; JUAN 19:33, 36.

Ini kag ang madamo pa nga tagna natuman kay Jesus. Indi ini matabo kon sa iya lang ikasarang. Nagapamatuod ini nga sia gid ang ginpadala sang Dios. *

Kon amo, ngaa kinahanglan mag-antos kag mapatay si Jesus?

Napatay si Jesus para masolbar ang importante nga mga isyu Nahibaluan ni Jesus ang isa ka isyu nga nagadalahig sa tanan nga nagsugod pa sa hardin sang Eden. Naimpluwensiahan sanday Adan kag Eva sang isa ka rebelyuso nga espiritu, gani ginsupak nila ang Dios. Ginhangkat sang ila pagrebelde ang pagkasoberano sang Dios, ukon ang iya kinamatarong sa paggahom. Bangod man sa ila sala, nag-utwas ang isyu kon bala mangin matutom gihapon sa Dios ang mga tawo bisan pa ginapabudlayan sila.—Genesis 3:1-6; Job 2:1-5.

Si Jesus lamang ang nakahatag sing pinakamabakod  nga sabat sa sining duha ka isyu—ang pagkasoberano ni Jehova kag ang katutom sang mga tawo sa Dios. Bangod nangin matinumanon sia “tubtob sa kamatayon . . . sa usok sang pag-antos,” ginbayaw ni Jesus ang pagkasoberano sang Dios. (Filipos 2:8) Ginpamatud-an man ni Jesus nga ang isa ka perpekto nga tawo makapabilin nga matutom kay Jehova bisan grabe ang mga kabudlayan.

Napatay si Jesus para tubson ang mga tawo Gintagna ni propeta Isaias nga ang pag-antos kag kamatayon sang Mesias magatubos sa mga sala sang mga tawo. (Isaias 53:5, 10) Maathag ini kay Jesus, kag kinabubut-on niya nga ginhatag “ang iya kalag subong gawad nga kabaylo sang madamo.” (Mateo 20:28) Bangod sa iya kamatayon, posible na nga mangin suod kay Jehova ang indi perpekto nga mga tawo kag mahilway sa sala kag kamatayon. May kahigayunan man kita nga matigayon ang nadula nanday Adan kag Eva—ang paglaum nga mabuhi sing walay katapusan sa duta diin perpekto na ang tanan. *Bugna 21:3, 4.

Ano ang puede mo himuon? Sa sini nga mga artikulo, nabinagbinag naton ang ginasiling sang Biblia parte kay Jesus—kon diin sia naghalin, paano sia nagkabuhi, kag kon ngaa napatay sia. Ini nga mga kamatuoran indi lamang makahatag sing kasanagan parte kay Jesus. Kon magkabuhi kita nahisuno sa aton natun-an, matigayon man naton ang maayo nga kabuhi subong kag ang kabuhi nga walay katapusan sa palaabuton. Ginasugiran kita sang Biblia kon ano ang aton himuon para mabaton ini.

▪ Magtuon pa parte kay Jesucristo kag sa iya papel sa katuyuan ni Jehova.—JUAN 17:3.

▪ Magtuo kay Jesus, kag ipakita sa imo pagkabuhi nga ginabaton mo sia bilang Manluluwas.—JUAN 3:36; BINUHATAN 5:31.

Malipay gid ang mga Saksi ni Jehova nga buligan ka nga matun-an pa ang parte kay Jesucristo, ang “bugtong nga Anak” sang Dios, nga paagi sa iya mabaton naton ang regalo nga “kabuhi nga walay katapusan.”—Juan 3:16.

[Mga Nota]

^ par. 5 Ginatawag pirme ni Jesus ang iya kaugalingon nga “Anak sang tawo.” (Mateo 8:20) Ginapakita sini nga matuod gid sia nga tawo kag sia ang “anak sang tawo” nga ginapatuhuyan sang tagna sa Biblia.—Daniel 7:13, 14.

^ par. 13 Para sa dugang nga impormasyon parte sa mga tagna nga natuman kay Jesus, basaha ang topiko nga “Si Jesucristo—Ang Ginsaad nga Mesias” sa apendise sang libro nga Ano Gid ang Ginatudlo Sang Biblia? nga ginhimo sang mga Saksi ni Jehova.

^ par. 17 Para sa dugang nga impormasyon parte sa balor sang kamatayon ni Jesus, basaha ang kapitulo 5 nga may tig-ulo, “Ang Gawad—Ang Labing Bilidhon nga Regalo Sang Dios” sa libro nga Ano Gid ang Ginatudlo Sang Biblia?

 

Magtuon sing Dugang Pa

Sin-o si Jesucristo?

Tun-i kon ngaa si Jesus ang ginsaad nga Mesias, kon diin sia naghalin, kag kon ngaa sia ang bugtong nga Anak ni Jehova.