Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN MARSO 2011

 Magtuon sa Pulong sang Dios

Sin-o si Jesucristo?

Sin-o si Jesucristo?

Makita sa sini nga artikulo ang mga pamangkot nga mahimo ginapaligban mo kag kon diin sa Biblia mabasa ang mga sabat. Nalipay gid ang mga Saksi ni Jehova nga buligan ka sa pagbinagbinag sini.

1. Sin-o si Jesucristo?

Indi pareho sa mga tawo, si Jesus nagkabuhi sa langit bilang espiritu nga persona antes sia natawo sa duta. (Juan 8:23) Sia ang una nga gintuga sang Dios, kag nagbulig sia sa pagtuga sang iban nga butang. Sia lang ang direkta nga gintuga ni Jehova, amo nga gintawag sia nga “bugtong” nga Anak sang Dios. Si Jesus amo ang Humalambal sang Dios, gani gintawag sia nga “ang Pulong.”—Juan 1:1-3, 14; basaha ang Hulubaton 8:22, 23, 30; Colosas 1:15, 16.

2. Ngaa nagkari si Jesus sa duta?

Ginpadala sang Dios ang iya Anak paagi sa pagsaylo sang kabuhi ni Jesus halin sa langit pakadto sa taguangkan sang Judiyo kag birhen nga si Maria. Gani indi tawo ang iya amay. (Lucas 1:30-35) Nagkari sia para (1) itudlo ang kamatuoran parte sa Dios, (2) mangin halimbawa sa paghimo sang kabubut-on sang Dios, kag (3) ihatag ang iya perpekto nga kabuhi bilang “gawad.”—Basaha ang Mateo 20:28; Juan 18:37.

3. Ngaa kinahanglan naton ang gawad?

Ang gawad amo ang ginabayad para mahilway ang isa ka tawo. Ang pagtigulang kag kamatayon wala sa orihinal nga katuyuan sang Dios para sa tawo. Paano naton ini nahibaluan? Ginsilingan sang Dios ang una nga tawo nga si Adan, nga kon maghimo sia sang ginatawag sa Biblia nga sala, mapatay sia. Kon wala sia magpakasala, indi gid tani sia mapatay. Bisan pila pa ka gatos ang gin-edad ni Adan, nagpadulong na sia sa kamatayon sang adlaw nga ginlapas niya ang Dios. (Genesis 2:16, 17; 5:5) Ginpapanubli niya sa iya kaanakan ang sala kag ang silot sini nga kamatayon. Sa amo, ang kamatayon “nagsulod” sa kalibutan paagi kay Adan. Gani, kinahanglan naton ang gawad.—Basaha ang Roma 5:12; 6:23.

 4. Ngaa napatay si Jesus?

Sin-o ang magawad sa aton sa kamatayon? Kon mapatay kita, nabayaran naton ang aton lamang sala. Wala sing indi perpekto nga tawo nga makabayad sang sala sang iban.—Basaha ang Salmo 49:7-9.

Wala sing napanubli nga sala si Jesus, gani napatay sia indi para sa iya sala, kundi para sa sala sang iban. Daku gid ang gugma sang Dios sa mga tawo amo nga ginpadala niya ang iya Anak agod mapatay para sa aton. Ginpakita man ni Jesus ang iya gugma paagi sa pagtuman sa iya Amay kag paghatag sang iya kabuhi para sa aton mga sala.—Basaha ang Juan 3:16; Roma 5:18, 19.

5. Ano ang ginahimo ni Jesus subong?

Paagi sa pagpang-ayo, pagbanhaw, kag pagbulig sa mga tawo, ginpakita ni Jesus kon ano ang himuon niya sa ulihi sa tanan nga matinumanon. (Lucas 18:35-42; Juan 5:28, 29) Sang napatay si Jesus, ginbanhaw sia sang Dios bilang espiritu nga persona. (1 Pedro 3:18) Dayon, naghulat sia sa tuo sang Dios asta nga ginhatag sa iya ni Jehova ang gahom bilang Hari sa bilog nga duta. (Hebreo 10:12, 13) Subong, nagahari na si Jesus sa langit, kag ang iya mga sumulunod sa duta nagapahayag sang maayong balita sa bilog nga kalibutan.—Basaha ang Daniel 7:13, 14; Mateo 24:14.

Sa indi madugay, gamiton ni Jesus ang iya gahom bilang Hari para tapuson ang tanan nga pag-antos kag ang kabangdanan sini. Ang minilyon nga nagatuo kay Jesus kag nagatuman sa iya magakabuhi sa paraiso sa duta.—Basaha ang Salmo 37:9-11.

Ang minilyon nga nagatuo kay Jesus kag nagatuman sa iya magakabuhi sa paraiso sa duta

Magtuon sing Dugang Pa

Sin-o si Jesucristo?

Tun-i kon ngaa si Jesus ang ginsaad nga Mesias, kon diin sia naghalin, kag kon ngaa sia ang bugtong nga Anak ni Jehova.