Makalilipay nga mga Kombension sa Rusya

KADA tingadlaw sa Rusya, ang pila ka Ruso nagahalin sa ila mga apartment kag nagakadto sa mga balay bakasyunan ukon dachas sa kaumhan. Tion ini nga makapalayo sila sa masako nga kabuhi sa siudad. Sang nagliligad nga tingadlaw, madamo man nga Saksi ni Jehova sa Rusya ang nagakadto sa kaumhan, pero sa lain nga rason.

Bisan pa ginadilian ang ila pagwali sa iban nga siudad, ang mga Saksi ni Jehova sa Rusya nagatipon gihapon para sa ila pagsimba, kag may kinamatarong sila nga himuon ini suno sa kasuguan. Pero kon kaisa, ginahingabot sila kag ginapabudlayan sang awtoridad ukon sang klero sang Ruso nga Ortodokso. Bangod sini, nabudlayan sila magkuha sing permit para makagamit sing mga pasilidad nga hiwatan sang ila mga kombension kada tuig. Gani ang mga Saksi nag-organisar sang mga kombension sa “kagulangan” ukon “wayang.” Halin sang 2007 asta sang 2009, ining daw piknik nga mga kombension ginhiwat sing mga 40 ka beses sa 25 ka lugar sa Rusya.

Ang isa ka Saksi nga nagatambong gid pirme sa mga kombension sa Rusya nagsiling: “Sang nagligad nga tinuig, sang nagaarkila pa kami sing mga istadyum kag mga bilding sa dalagku nga mga siudad, matalupangdan gid  sang madamo nga tawo kag sang awtoridad ang aton organisasyon bangod sa katinlo kag kahim-ong. Pero subong nga sa kagulangan na lang kami nagatipon, mga kasapatan na lang ang makakita sa amon. Kanugon nga indi makita sang publiko ang pagtilipon sang mga tawo nga sarisari ang ginhalinan, rasa, kag relihion.”

Bisan pa malipayon ini nga okasyon, ang isa ka Saksi nagsiling: “Kanami gid tan-awon sang pagsakripisyo kag katutom sang pareho ko nga mga Saksi sa pihak sang kabudlayan. Pero ang matuod, kon indi kami pagsugtan sang awtoridad nga maghiwat sing kombension, makakalapoy gid ini kag makapaluya sing buot. Ginalimitehan man sini ang amon kahilwayan nga masimba ang labing gamhanan nga Dios sa dungganon nga paagi.” Gani, ano ang ginhimo sang mga Saksi ni Jehova sa Rusya?

Mga Kombension sa Kagulangan

Pirme lang ginakanselar ang kasugtanan sa arkila bisan malapit na lang ang kombension, amo nga ang mga nagaorganisar mahimo naman sing lain nga kahimusan para sa linibo ka tumalambong. Halimbawa, sang 2008, ang mga Saksi sa Cheboksary, Chuvash Republic, naghiwat na lang sang ila tatlo ka adlaw nga kombension sa isa ka campsite nga napalibutan sang mga kahoy nga birch kag kitaon ang Volga River. Daku gid ang preparasyon sa sini. Sa 1,930 ka ginapaabot nga tumalambong, 1,700 gid ang dapat himuan sing tululugan sa campsite. Kinahanglan man nila ang koryente, kasilyas, kag palaliguan kag lababo nga may mainit kag mabugnaw nga tubig. Kag siempre pati ang ila pagkaon.

Gintinguhaan sang mga Saksi nga mahimo ini. Nangita sila sang mga panday, elektrisyan, kag mga tubero. May grupo sang 350 ka Saksi nga nagbulig, kag 14 sa ila ang nagtener sa site sing napulo ka adlaw. Nanglagari sila sang mga tapi, nanghakot sang uhot, kag naghimo sang mga tolda, palaliguan, kag mga kasilyas. May isa pa ka grupo nga amo ang nagapakadto-pakari para mamakal sang materyales. Bangod wala sing bulutangan para indi mapan-os ang pagkaon, nagdesisyon sila nga sa site na lang maluto sing tatlo ka beses kada adlaw para mainit pa ang pagkaon para sa tanan. Nangita man ang tagdumalahan sang campsite sing mga manugluto para sa tumalambong. Sa mga tumalambong, 500 ang may dala nga tent, 150 ang nagdayon sa mga balay sa malapit, 15 ang nagtulog sa uhot sa kuadra, kag ang iban sa ginhimo nga mga tolda.

Pag-abot sang mga tumalambong, nakita nila ang nagailidas nga mga plastik nga pulungkuan. Sa atubang may duha ka entablado nga gindekorasyunan sang mga bulak, ang isa para sa Chuvash nga lenguahe kag ang isa para sa Ruso. Nalipay gid ang tanan sa programa parte sa Biblia kag ginpasalamatan gid nila ang mga boluntaryo. Ang isa sa mga manugluto nagsiling, “Kon wala ko ini mismo makita, indi gid ako magpati nga may amo sini ka organisado kag disiplinado nga organisasyon!” Ginkomparar ini sang iban sa Piesta sang mga Payagpayag nga ginaselebrar sang mga Israelinhon sang panahon sang Biblia.

Sa iban nga siudad, masami nga may isa lang ka adlaw ang mga Saksi sa pagpangita kag pagpreparar sang lain naman nga site para sa kombension. Amo sini ang natabo sa Nizhniy Novgorod. Ang mga boluntaryo  bulosbulos sa paghanda sang isa ka pribado nga lote. Namulod sila sing mga kahoy, nanghilamon, kag ginpamatay ang mga bitik kag subay. Naghimo sila sing entablado, naghanda sing generator kag sound system, kag nagdala sing 2,000 ka plastik nga pulungkuan, pulo ka kasilyas, kag mga lababo. Natapos nila ini tanan antes mag-abot ang mga tumalambong sang Biernes sang aga. Ang isa ka Saksi nagsiling: “Kanami gid kay ang mga boluntaryo nga adlaw-gab-i nga nagtrabaho wala gid nagapabugal. Padayon sila nga nagbulig sing mapainubuson sa tion sang kombension. Ginhimo nila ang tanan nila nga masarangan para mangin komportable kag makapamati sing maayo ang ila mga kauturan.”

Ang isa pa ka Saksi nagsulat: “Nagabuligay gid ang tanan. Bisan pa una ini nga bes nga naghiwat sing kombension sa wayang kag subol na sa tion, ginhandaan gid nila ini sing maayo para wala gawa sing sablag. Wala kami kabatyag kapoy. Ginhatagan gid kami ni Jehova sing kusog!”

Bulig sang Espiritu sang Dios

Ang pag-atubang sa mga problema sa paghiwat sang mga kombension nagpasuod pa gid sa mga Saksi kag nagpamatuod nga nagabulig gid ang espiritu sang Dios. Sa Smolensk, madamo nga dalayunan ang nagkanselar sang gab-i antes ang kombension. Ang isa ka gulang nagsiling: “Pag-abot sang pila ka bus sang mga tumalambong sang ala una sang kaagahon, wala na sila sing dayunan. Naghibi ako kay wala ako sing mahimo. Nangamuyo ako kay Jehova kag nakitluoy nga buligan kami. Nalipay gid ako nga pagligad sang isa ka oras, nakakita na kami sing dalayunan para sa ila tanan! Daw indi mapatihan pero pamatuod ini nga indi gid pagpabay-an ni Jehova ang mga matarong!” Sa lain naman nga kombension sa kagulangan, nangita sing dalayunan ang mga Saksi sa mga balay sa palibot. Bangod sa maayo nga reputasyon sang mga Saksi sa sina nga lugar, ginpadayon sang mga pumuluyo ang 2,000 ka tumalambong sa tion sang kombension.

“Ang nahiwat nga mga kombension ebidensia gid nga importante ang pagsalig kay Jehova sa bisan ano nga sitwasyon,” siling sang isa ka Saksi. Kinahanglan gid ini ilabi na kon may indi imbitado nga “mga bisita” nga manggamo sa kombension. Sa Novoshakhtinsk, ang pari sang Ruso nga Ortodokso kag ang mga nagaprotesta nag-abot. Nagkinanta sila kag nagpinangadi sa mikropono para indi mabatian ang nagapamulongpulong sa kombension. Pero ginbalabagan sila sang pulis para indi madisturbo ang programa. Sang nalipong bangod sa init ang isa ka nagaprotesta nga babayi, nga isa ka Ortodokso, gindala sia sang mga Saksi sa First Aid Department sang kombension kag gin-atipan. Daw indi sia makapati sa sini.

Nagdayaw Sila sa Ila Nakita

Bangod sa paandam batok sa terorismo, ginabantayan gid sang mga pulis kag sang mga  pumuluyo ang dalagku nga mga pagtilipon sa Rusya. Halimbawa, ginbantayan gid sang mga pulis ang isa ka kombension sa Volzhskiy. Nadula ang cell phone sang isa ka pulis, kag ginbuligan sia sang mga Saksi nga pangitaon ini sa Lost and Found Department. Wala madugay, gintawgan sia sang iya superyor kag ginpamangkot kon bala may patimaan sang pagrebelde ukon gamo sa kombension. Ang pulis nagsabat: “Wala diri problema; 5,000 ang ari diri, pero wala sila sing bayolasyon. Wala sing nagarebelde diri. Pensara bala, sang nakita nila ang nadula ko nga cell phone, ginbalik nila ini sa akon!”

Nagdayaw gid ang isa ka guardia sa katinlo sang palibot kag natingala sia kay madamo ang bata nga nagtambong, pero wala sia sing nakita nga bisan isa lang ka putos sang dulse. Ang tag-iya sang campsite nga ginhiwatan sang isa pa ka kombension nag-istorya sa pulis kay may ginreport nga isa ka daku nga relihioso nga pagtilipon. Gindala niya ang tenyente sa ikatlo nga panalgan para makita ang campsite kag nagsiling: “Tan-awa bala sila! Organisado sila katama!” Nagdayaw gid ang tag-iya kay ang mga Saksi wala nagainom ukon nagapanigarilyo, kag daw wala lang sing naggamit sa campsite kay bisan ang ila basura ginadala nila. “Daw paraiso lang ba!” siling niya.

Makita ang Paghiusa sang Katawhan sang Dios

Pagkatapos sang isa ka kombension sa kagulangan, ang pangulo sang malapit nga komunidad, nagsiling: “Kabalo ko nga ordinaryo lang kamo nga mga tawo, pero dalayawon gid kamo. Kami diri nagapaiyaiya, pero kamo napahiusa ninyo ang mga tawo!” Halin sa Kaliningrad asta sa Kamchatka, ang mga pumuluyo sining daku nga pungsod nagdayaw gid sa paghiusa sang mga sumilimba sang Dios sa ila dalagku nga mga pagtilipon. Bisan pa kinahanglan nila pirme bag-uhon ang ila plano, wala gid nagabag-o ang ila pagrespeto sa awtoridad kag sa ila isigkatawo.

Bisan ano man ang ila kahimtangan, ang mga Saksi ni Jehova sa Rusya malipayon gihapon nga nagatipon para matudluan parte sa Biblia. Nagapangamuyo sila “para sa mga hari kag sa tanan nga may mataas nga palangakuan; agod magkabuhi [sila] sing matawhay kag malinong nga may bug-os nga diosnon nga debosyon kag pagkaserioso.”—1 Timoteo 2:2.

[Blurb sa pahina 27]

Isa sa mga boluntaryo nga nagabulig sa paghanda sa kombension

[Blurb sa pahina 29]

Ang mga Saksi ni Jehova sa Rusya padayon nga ‘nagakabuhi sing matawhay kag malinong nga may bug-os nga diosnon nga debosyon’

[Mga Retrato sa pahina 28]

Nagabuligay ang mga boluntaryo sa pagpaninlo kag pagluto para sa linibo ka tumalambong sa kombension

[Mga Retrato sa pahina 29]

Nalipay gid ang tanan sa programa parte sa Biblia kag ginpasalamatan gid nila ang mga boluntaryo