Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN MARSO 2011

“Magahandum Ka”

“Magahandum Ka”

 Mangin Suod sa Dios

“Magahandum Ka”

KASAKIT gid kon ang imo pinalangga nagaantos kag mapatay. Ginasubuan gid kita kon matabo ini. Pero, malugpayan kita kon mahibaluan naton nga naintiendihan sang aton Manunuga nga si Jehova nga Dios, ang aton kasubo. Isa pa, gusto gid niya nga gamiton ang iya wala sing tupong nga gahom para banhawon ang mga patay. Talupangda ang paglaum nga makita sa ginsiling ni Job sa Job 14:13-15.

Binagbinaga ang natabo kay Job. Isa sia ka matinuuhon nga tawo nga nakaeksperiensia sang grabe nga pagtilaw. Nadula ang iya pagkabutang, napatay ang tanan niya nga bata, kag nakaagi sia sang grabe nga balatian. Sa iya sobra nga pag-antos, nangamuyo sia sa Dios: “O kabay pa kuntani nga tagoon mo ako sa Sheol [kinaandan nga lulubngan sang mga tawo].” (Bersikulo 13) Nagapati si Job nga indi na sia mag-antos sa Sheol. Didto sia taguon sang Dios pareho sang isa ka bahandi, diin wala na sia sing kabudlayan ukon kasakit. *

Magapabilin na lang bala si Job sa Sheol? Indi amo sina ang iya ginapatihan. Ginpadayon niya ang iya pangamuyo: “O kabay pa . . . nga tangdoan mo ako kuntani sing pinat-ud nga tion, kag madumduman ako!” Nagalaum gid si Job nga temporaryo lang sia sa Sheol kag indi sia pagkalimtan ni Jehova. Ginpaanggid niya ang tion nga ara sia sa Sheol sa obligado nga pag-alagad, nga dapat sia maghulat asta nga hilwayon sia. Daw ano ini kadugay? “Tubtub nga mabuhian ako,” siling niya. (Bersikulo 14) Mahilway sia sa Sheol kon banhawon na sia!

Ngaa kumbinsido si Job nga mahilway sia sa ulihi? Kay nahibaluan niya ang ginabatyag sang aton mahigugmaon nga Manunuga kon mapatay ang Iya matutom nga mga sumilimba. Si Job nagsiling: “Magapanawag ka, kag ako magasabat sa imo; magahandum ka sa binuhatan sang imo mga kamut.” (Bersikulo 15) Nahibaluan niya nga ang Dios ang naghimo sa iya. Ang Manughatag sing Kabuhi nga naghimo kay Job halin pa sa taguangkan makasarang gid magbanhaw sa iya kon mapatay sia.—Job 10:8, 9; 31:15.

Sa pangamuyo ni Job, madamo kita sing matun-an parte kay Jehova: Importante sa iya ang mga pareho ni Job nga ginabutang ang ila kaugalingon sa iya mga kamot, para madihon niya sila kag mangin kalahamut-an sa iya. (Isaias 64:8) Ginapabaloran gid ni Jehova ang iya matutom nga mga sumilimba. ‘Ginahandum’ niya ang mga napatay nga matutom sa iya. Ang Hebreo nga tinaga nga gingamit sa sini “amo ang isa sa pinakamakusog nga tinaga para ipabutyag ang grabe gid nga paghandum,” suno sa isa ka iskolar. Gani, wala lamang ginadumdom ni Jehova ang iya mga sumilimba, kundi ginahandum gid niya nga banhawon sila.

Makalilipay nga sa tulun-an pa lang sang Job, nga isa sa una nga ginsulat nga mga tulun-an sa Biblia, ginpahayag na ni Jehova ang iya katuyuan nga banhawon ang mga patay. * Gusto niya nga mag-updanay kamo liwat sang imo napatay nga mga pinalangga. Ini nga paglaum makapahaganhagan sang kasubo. Gusto mo bala nga matun-an pa gid ang parte sa mahigugmaon nga Dios kag kon ano ang dapat mo himuon para mahamuot sia sa imo kag makita ang katumanan sang Iya katuyuan?

Bahin sang Biblia nga mahimo basahon sa Marso:

Ester 1Job 15

[Mga Nota]

^ par. 4 Suno sa isa ka libro, ang ginhambal ni Job nga “tagoon mo ako,” mahimo nagakahulugan sing “tipigi [ako] sing maayo pareho sa isa ka malahalon nga tinago.” Ang isa pa gid nagsiling nga buot silingon sini “tagua ako pareho sang isa ka bahandi.”

^ par. 8 Para sa dugang nga impormasyon parte sa promisa sang Biblia nga pagkabanhaw sa matarong nga bag-ong kalibutan, basaha ang kapitulo 7 sang libro nga Ano Gid ang Ginatudlo Sang Biblia? nga ginhimo sang mga Saksi ni Jehova.