Ano ang Maayong Balita?

“Ining maayong balita . . . ”—MATEO 24:14.

DAPAT iwali sang mga Cristiano ang “maayong balita sang ginharian” sa iban, kag ipaathag nga ang Ginharian amo sa ulihi ang gobierno nga magagahom nga may pagkamatarong sa bilog nga duta. Pero, ang ekspresyon nga “maayong balita” gingamit man sang Biblia sa iban nga paagi. Halimbawa, ginsambit sini ang “maayong balita nga sia nagluwas sa aton” (Salmo 96:2, Maayong Balita nga Biblia, MB); “maayong balita sang Dios” (Roma 15:16); kag “maayong balita tuhoy kay Jesucristo.”—Marcos 1:1.

Buot silingon, nalakip sa maayong balita ang tanan nga kamatuoran nga ginhambal ni Jesus kag ginsulat sang iya mga disipulo. Antes sia nagkayab, ginsilingan ni Jesus ang iya mga sumulunod: “Busa lakat kamo kag maghimo sang mga disipulo sa mga tawo sang tanan nga pungsod, nga nagabawtismo sa ila sa ngalan sang Amay kag sang Anak kag sang balaan nga espiritu, nga nagapanudlo sa ila nga tumanon ang tanan nga butang nga ginsugo ko sa inyo.” (Mateo 28:19, 20) Gani indi lamang pagsugid sa iban parte sa Ginharian ang dapat himuon sang matuod nga mga Cristiano, kundi dapat man sila maghimo sing mga disipulo.

Ginatuman bala ini sang mga relihion? Madamo ang wala makaintiende kon ano ang Ginharian, gani indi man nila ini matudlo sing husto sa iban. Sa baylo, ginawali nila ang manami pamatian nga mga sermon parte sa pagpatawad sang sala kag pagtuo kay Jesus. Nagapangumbertir man sila paagi sa pagbulig sa mga kubos ukon pagpatindog sang mga ospital, eskwelahan, kag mga balay para sa mga imol. Bangod sini, mahimo magdamo ang ila miembro. Pero ini nga mga miembro indi matuod nga mga Cristiano nga nagatinguha nga sundon ang panudlo ni Jesus.

Ang isa ka teologo nagsulat: “Nagaugyon ang kalabanan nga iskolar ukon lider sang mga Cristiano nga dapat kita maghimo sing mga disipulo ukon sumulunod ni Jesus kag tudluan sila sang tanan nga ginsiling ni Jesus. . . . Kay man maathag gid ang sugo ni Jesus parte sa sini. Wala lang naton ini ginatuman. Wala naton ini ginatinguhaan nga himuon. Kag indi kita kahibalo kon paano ini himuon.”

Ginpakita man sang isa ka surbe sa mga Katoliko sa Estados Unidos nga 95 porsiento sa ila ang nakahibalo nga ang pagwali sang maayong balita ginapatuman sa ila relihion. Pero, halos tanan sila nagapati nga indi pagwali ang pinakamaayo nga paagi sa paghimo sini, kundi ang mangin halimbawa sa iban paagi sa ila pagkabuhi. Ang isa sa mga ginpamangkot nagsiling: “Ang pag-ebanghelyo indi lang sa hambal, hambal, hambal. Dapat kita mismo ang Maayong Balita.” Suno sa U.S. Catholic, ang magasin nga nagsurbe, madamo ang wala nagawali sang ila pagtuo bangod sa “malain nga reputasyon sang simbahan parte sa pag-abuso sa sekso kag makalilibog nila nga mga panudlo.”

Sa lain naman nga lugar, ang obispo sang Metodista nagsiling nga ang iya mga simbahan nabahinbahin kag naligban, nahuya magwali, kag ang ila moral pareho man iban. Daw napaslawan sia nga namangkot: “Sin-o gid bala ang dapat magwali sang ebanghelyo sang Ginharian?”

Wala ginsabat sang obispo ang iya pamangkot. Pero may sabat sa sini. Mabasa mo ini sa masunod nga artikulo.

[Blurb sa pahina 6]

Ang maayong balita amo ang parte sa Ginharian sang Dios kag ang kaluwasan paagi sa pagtuo kay Jesucristo