Accessibility setting

Magpili sing lenguahe

Magdiretso sa segundaryo nga menu

Magdiretso sa listahan sang kaundan

Magdiretso sa kaundan

Mga Saksi ni Jehova

Hiligaynon

ANG LALANTAWAN PEBRERO 2011

  Pamangkot sang mga Bumalasa . . .

Nagapabulong Bala ang mga Saksi ni Jehova?

Nagapabulong Bala ang mga Saksi ni Jehova?

Si Jesus nagsiling nga “ang mga tawo nga mapagros wala nagakinahanglan sang manugbulong, kundi ang mga nagamasakit.” (Mateo 9:12) Ginapakita niya nga wala ginadilian sang Biblia ang pagpabulong ukon pagpadoktor. Gani, ang mga Saksi ni Jehova nagatomar sing bulong kag nagapabulong. Gusto nila ang maayo nga panglawas kag malawig nga kabuhi. Ang matuod, pareho sang Cristiano sang unang siglo nga si Lucas, ang pila ka Saksi ni Jehova mga doktor man.—Colosas 4:14.

Pero, wala ginabaton sang mga Saksi ni Jehova ang mga pagbulong nga supak sa mga prinsipio sang Biblia. Halimbawa, wala sila nagapatughong sing dugo, kay ginadilian sang Biblia ang pagpasulod sang dugo sa lawas. (Genesis 9:4; Levitico 17:1-14; Binuhatan 15:28, 29) Ginadilian man sini ang pagbulong ukon ang mga pamaagi nga nagagamit sing “madyik,” ukon espiritismo.—Isaias 1:13, NW; Galacia 5:19-21.

Madamo nga doktor ang nagagamit sing pagbulong nga indi supak sa Biblia. Sa masami, ini nga mga pamaagi, nga ginabaton sang madamo nga Saksi, mas epektibo sangsa mga pamaagi nga supak sa ginasiling sang Dios.

Siempre, sarisari ang opinyon parte sa pagpabulong. Ang epektibo sa isa mahimo nga indi puede sa iban. Gani, kon gusto mabal-an sang isa kon ano gid ang iya balatian kag ang epektibo nga pagbulong, mahimo sia magpakonsulta sa lainlain nga doktor.—Hulubaton 14:15.

Indi palareho ang ginapili sang mga Saksi nga paagi sa pagbulong. Ang tagsa ka Cristiano makadesisyon basta wala ini nagasupak sa sugo sang Biblia. (Roma 14:2-4) Gani, dapat usisaon anay sing maayo sang kada isa ang mga pagbulong kag siguraduhon nga indi ini supak sa iya konsiensia nga natudluan sang mga prinsipio sang Biblia.—Galacia 6:5; Hebreo 5:14.

Dapat kabigon sang isa ka Saksi nga sa iya pagdesisyon, pareho sia sang drayber nga nagapadulong sa isa ka krusing nga madamo sing nagaagi nga salakyan. Kon sundon niya ang mga salakyan sa iya unahan kag magdiretso lang, madisgrasya gid sia. Ang maayo nga drayber magabahar anay kag magatan-aw sa dalagan sang trapiko. Amo man sini ang mga Saksi. Wala sila nagapadasodaso sa pagdesisyon ukon nagasunod sa opinyon sang kalabanan kon nagapabulong. Sa baylo, ginabinagbinag nila anay ang mga pililian kag ang mga prinsipio sang Biblia.

Ginaapresyar gid sang mga Saksi ni Jehova ang panikasog kag dedikasyon sang mga doktor. Ginapasalamatan man nila ang ila epektibo nga pagbulong.