Pamangkot sang mga Bumalasa . . .

Ngaa Naggamit si Satanas sing Man-ug Para Makighambal kay Eva?

▪ Subong sang ginbinagbinag sa pahina 8, mahimo ugyon ka nga si Satanas ang sa likod sang man-ug nga nakighambal kay Eva. Ginatudlo gid ini sang Biblia. Pero, mahimo mamangkot ka, ‘Ngaa magamit pa sing man-ug ang isa ka gamhanan nga espiritu?’

Sa Biblia, ang mga taktika ni Satanas gintawag nga “mga pahito,” kag ginapamatud-an ini sang natabo sa Eden. (Efeso 6:11) Indi ini uluistorya lang parte sa sapat nga nagahambal kundi halimbawa ini sang tuso kag makatalagam nga estratehiya para mapatalikod ang mga tawo sa Dios. Paano?

Ginpili gid sing maayo ni Satanas ang iya biktimahon. Si Eva ang pinakaulihi nga tinuga sa uniberso. Gingamit ni Satanas ang iya pagkainosente para matiplang kag magganyat sia. Paagi sa man-ug, nga isa ka mainandamon nga sapat, gintago ni Satanas ang iya pagkawalay-huya kag pagkaambisyuso. (Genesis 3:1) Pensara man ang resulta sang ginpahambal niya ang man-ug, pareho sang puppet nga daw nagahambal kon tan-awon.

Una, nakuha ni Satanas ang atension ni Eva. Bal-an ni Eva nga ang mga man-ug wala nagahambal, kay lakip ini sa mga sapat nga gintun-an sing maayo kag ginngalanan sang iya bana. (Genesis 2:19) Mahimo gid nga nakita na ini ni Eva. Gani ang pahito ni Satanas nagganyat gid sa iya, kag nangin interesado sia sa butang nga ginadili sa iya sa sina nga hardin. Ikaduha, kon ang man-ug nagapulupanago sa sanga sang ginadilian nga kahoy, ano ayhan ang ginpensar ni Eva? Nagpensar ayhan sia nga nakahambal ining daw indi salapakon nga sapat kay nagkaon ini sang bunga? Kon nakahambal ang man-ug, ano ayhan ang matabo sa iya kon magkaon man sia? Wala kita kabalo kon ano ang ginapensar ni Eva ukon kon bala nagkaon gid man sing prutas ang man-ug. Pero nabal-an naton nga sang nagsiling ang man-ug kay Eva nga ‘manginkaangay sia sang Dios’ kon magkaon sia sang prutas, nagpati sia dayon.

Ginpili man sing maayo ni Satanas ang iya inughambal. Gingamo niya ang pensar ni Eva, kag ginpagua nga ginpit-an sang Dios si Eva kag may ginadingot ini nga maayo. Magamadinalag-on ang pahito ni Satanas kon pilion ni Eva ang iya handum sangsa iya gugma sa Dios nga naghatag sa iya sang tanan. (Genesis 3:4, 5) Makapasubo nga manabaw lang ang gugma kag apresasyon nanday Adan kag Eva kay Jehova, gani nagmadinalag-on si Satanas. Indi bala nga amo man sini ang ginahimo ni Satanas subong?

Ano naman ang motibo ni Satanas? Ano gid ang gusto niya nga matabo? Sa Eden, gintinguhaan niya nga taguon kon sin-o sia kag kon ano ang iya motibo. Pero sang ulihi, nagpakilala sia. Sang ginsulay niya si Jesus, kabalo sia nga indi niya ini matuntuhan. Gani, direkta niya nga ginsugo si Jesus: “Magyaub ka kag maghimo sang isa ka buhat sang pagsimba sa akon.” (Mateo 4:9) Ginapakita sini nga madugay na nga nahisa si Satanas sa pagsimba nga para kay Jehova nga Dios. Himuon niya ang tanan para punggan ukon agawon ini nga pagsimba. Nanamian gid sia kon mapatalikod niya kita sa Dios.

Ginapakita sang Biblia nga nagapahito si Satanas para halitan ang iya mabiktima. Pero indi kita dapat magpatunto pareho ni Eva, “kay nahibaloan ta ang iya mga pahito.”—2 Corinto 2:11, Ang Biblia, PBS.