Sin-o ang mga Espiritu?

Sa Europa, ang tigulang nga babayi nga may rosarito nagaluhod sa imahen ni Maria sa simbahan. Sa Aprika, ginabubo sang isa ka pamilya ang gin sa lulubngan sang ila ginatahod nga paryente. Sa Amerika, nagapuasa kag nagapamalandong ang isa ka lalaki kay gusto niya makig-angot sa iya anghel de la guardia. Sa Asia, ginasunog sang pari ang de kolor nga mga papel bilang halad sa espiritu sang mga katigulangan.

SA ANO nagpareho ini nga mga tawo? Tanan sila nagapati nga may intelihente nga mga espiritu nga puede maistorya ukon pakig-angutan kag may daku nga impluwensia sa mga tawo. Pero, indi na bag-o ini nga pagpati. Ang makalilibog lang kay madamo sing lainlain nga pagpati kon sin-o ang mga espiritu.

Ang mga Muslim nagasimba sa isa ka Dios, kay Allah. * Ang nagapangangkon nga mga Cristiano nagasiling nga ang Dios isa ka Trinidad—ang Dios nga Amay, Dios nga Anak, kag Dios nga Espiritu Santo. Ang mga Hindu nagapati nga may linibo ka dios kag diosa. Siling sang iban, may mga espiritu nga ara sa mga sapat, kahoy, bato, kag mga sapa. Ang iban naman naimpluwensiahan sang mga libro, pelikula, kag mga programa sa telebisyon parte sa mga anghel kag mga demonyo, mga murto kag mga duwende, kag mga dios kag mga diosa.

Kon madamo sing lainlain nga pagpati parte sa mga diosdios, madamo man sing lainlain nga pagpati kon paano makapakig-angot sa ila. Pero indi tanan nga paagi eksakto. Pensara bala: Antes kita magtawag sa telepono, dapat kabalo kita kon sin-o ang aton tawgan kag sigurado kita nga tuodtuod sia nga tawo kag sabton niya ang aton tawag. Wala sing pulos ang pagtawag sa tawo nga ginaimadyin lang naton. Ang malain pa, basi impostor ang aton matawgan.

Kon amo, sin-o gid ang mga espiritu? Ginasabat sang Biblia ini nga pamangkot kag ginapaathag man sini kon kay sin-o kita makig-angot kag kon ano ang aton mapaabot. Padayuna lang ang pagbasa. Mahimo nga makibot ka sa ginasiling sang Biblia.

[Nota]

^ par. 4 Ang “Allah” indi ngalan, kundi nagakahulugan lamang sing “Dios.”