Ang Matun-an Naton kay Jesus

Kon Ano ang Papel sang mga Anghel sa Aton Kabuhi

Si Jesus nagaistar na sa langit upod sa iya Amay “sang wala pa ang kalibutan.” (Juan 17:5) Gani masabat gid niya ang masunod nga mga pamangkot.

Interesado bala sa aton ang mga anghel?

▪ Ginasugiran kita ni Jesus nga interesado gid ang mga anghel sa mga tawo. Nagsiling sia: “Nagakalipay ang mga anghel sang Dios tungod sa isa ka makasasala nga nagahinulsol.”—Lucas 15:10.

Nagsiling si Jesus nga may responsibilidad ang mga anghel nga buligan ang mga nagasimba sa Dios. Gani, sang ginpaandaman ni Jesus ang iya mga disipulo batok sa pagpasandad sa iban, nagsiling sia: “Pat-ura nga indi ninyo pagtamayon ang isa sining mga kubos; kay nagasiling ako sa inyo nga makita pirme sang ila mga anghel sa langit ang nawong sang akon Amay nga yara sa langit.” (Mateo 18:10) Indi buot silingon ni Jesus nga may anghel de la guardia ang kada isa niya ka sumulunod, kundi nga ang mga anghel sang Dios interesado sa matuod nga mga Cristiano.

 Mahalitan bala kita sang Yawa?

▪ Ginpaandam ni Jesus ang iya mga sumulunod nga balabagan ni Satanas ang pagtuon sing kamatuoran parte sa Dios. “Kon ang bisan sin-o nagapamati sa pulong sang ginharian apang wala makahangop sini,” siling ni Jesus, “ang isa nga malauton magaabot kag magaagaw sang nasab-ug sa iya tagipusuon.”—Mateo 13:19.

Ginbuyagyag ni Jesus ang isa ka paagi sang pagpangdaya ni Satanas sang ginsugid niya ang ilustrasyon parte sa tawo nga nagsab-ug sang trigo. Ang tawo nagarepresentar kay Jesus, kag ang trigo sa hinaplas nga mga Cristiano nga magagahom upod kay Jesus sa langit. Pero, suno kay Jesus, ang kaaway nag-abot kag “nagsab-ug sang mga gamhon sa tunga sang mga trigo.” Ang mga gamhon amo ang indi matuod nga mga Cristiano. “Ang kaaway nga nagsab-ug sa ila amo ang Yawa.” (Mateo 13:25, 39) Kon magtubo ang gamhon, daw trigo man ini. Pareho sini ang nagapangangkon nga mga Cristiano kay daw matuod man sila nga mga sumilimba. Ginadayaan sang mga relihion nga nagatudlo sing butig nga mga doktrina ang mga tawo nga maglapas sa Dios. Ginagamit ini ni Satanas para mapalayo ang mga tawo kay Jehova nga Dios.

Ano ang himuon naton para indi kita mahalitan ni Satanas?

▪ Gintawag ni Jesus si Satanas nga “manuggahom sang kalibutan.” (Juan 14:30) Ginpakita sang pangamuyo ni Jesus kon ano ang aton himuon para indi kita mahalitan ni Satanas. Para sa iya mga disipulo, nangamuyo sia sa iya Amay: “Bantayan mo sila bangod sa isa nga malauton. Indi sila bahin sang kalibutan, subong nga ako indi bahin sang kalibutan. Pakabalaana sila paagi sa kamatuoran; ang imo pulong kamatuoran.” (Juan 17:15-17) Ang ihibalo sa Pulong sang Dios makaproteksion sa aton batok sa sining kalibutan nga ginagamhan ni Satanas.

Ano ang papel sang mga anghel sa aton kabuhi subong?

▪ “Sa katapusan sang sistema sang mga butang,” siling ni Jesus, “magagua ang mga anghel kag magapain sang mga malauton gikan sa mga matarong.” (Mateo 13:49) Nagakabuhi kita subong sa “katapusan sang sistema sang mga butang,” kag minilyon ang nagabaton sang maayong balita sang Ginharian sang Dios.—Mateo 24:3, 14.

Pero indi tanan nga nagatuon sa Pulong sang Dios nahamut-an niya. Ginagiyahan sang mga anghel ang mga sumilimba ni Jehova, kag ang mga tawo nga may matuod nga gugma sa Dios ginaseparar sa mga wala nagasunod sa ila natun-an. Si Jesus nagsiling parte sa mga tawo nga nahamut-an sang Dios: “Amo ini ang mga nakabati sang pulong nga may maminatud-on kag maayo nga tagipusuon, nga nagahupot sini kag nagapamunga nga may pagbatas.”—Lucas 8:15.

Para sa dugang nga impormasyon, basaha ang kapitulo 10 sini nga libro, Ano gid ang Ginatudlo sang Biblia? nga ginhimo sang mga Saksi ni Jehova.

[Retrato sa pahina 16]

Nagabulig ang mga anghel para makita sang mga sinsero ang kamatuoran