Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

ANG LALANTAWAN OKTUBRE 2010

Mangamuyo—Kay Sin-o?

Mangamuyo—Kay Sin-o?

ISA lang bala ka Dios ang ginakadtuan sang tanan nga pangamuyo bisan sin-o man ang ginapangamuyuan? Amo ini ang pagpati sang kalabanan labi na sang mga nagasuporta sa interfaith kag nagapati nga ang tanan nga relihion ginabaton sang Dios. Pero posible ayhan nga indi ini matuod?

Siling sang Biblia, madamo ang nagapangamuyo sa indi matuod nga dios. Sang panahon nga ginsulat ini, ang kalabanan nagapangamuyo sa gintigib nga mga diosdios. Pero, sulitsulit nga nagpaandam ang Dios nga indi nila ini paghimuon. Halimbawa, ang Salmo 115:4-6 nagsiling parte sa mga diosdios: “May mga dulunggan sila, apang indi makabati.” Gani, ano ang pulos sang pagpangamuyo sa dios nga indi makabati sa imo?

Ginasuportahan ini sang isa pa ka rekord sang Biblia. Ginhangkat sang isa ka matuod nga propeta nga si Elias ang mga propeta ni Baal nga mangamuyo sa ila dios, kag dayon mangamuyo man sia sa iya Dios. Ang magasabat sa pangamuyo amo ang matuod nga Dios. Nagsugot ang mga propeta ni Baal. Nangamuyo sila sing malawig, tudotudo, kag nagsinggit pa gani sing mabaskog—pero wala ini sing epekto! Aton mabasa: “Wala sing . . . bisan sin-o nga nagsabat, ukon bisan sin-o nga nagsapak.” (1 Hari 18:29) Ano ang natabo sang turno na ni Elias?

Sang makapangamuyo si Elias, ang Dios nagsabat dayon kag nagpadala sing kalayo halin sa langit nga nagsunog sang iya halad. Ano ang kinalain sang pangamuyo ni Elias? Ang sabat ara mismo sa iya pangamuyo sa 1 Hari 18:36, 37. * Malip-ot lang ini, kay mga 30 lang ini ka tinaga sa Hebreo. Pero tatlo ka beses diri nga gintawag ni Elias ang personal nga ngalan sang Dios, nga Jehova.

Ang Baal, nga nagakahulugan sing “tag-iya” ukon “agalon,” amo ang dios sang mga Canaanhon, kag madamo ini sing bersion. Pero, ang Jehova pinasahi nga ngalan, kay isa lamang ka Persona sa bug-os nga uniberso ang may amo sini nga ngalan. Ini nga Dios nagsiling sa iya katawhan: “Ako si Yahweh [“Jehova,” NW]—ini ang akon Ngalan! Indi ko pag-ihatag ang akon himaya sa iban.”—Isaias 42:8, Biblia sang Katilingban sang mga Kristiano.

Isa lang bala ang ginkadtuan sang pangamuyo ni Elias kag sang mga propeta ni Baal? Ang pagsimba kay Baal nagapakanubo sa mga tawo bangod sa ritwal nga prostitusyon kag paghalad pa gani sing tawo. Pero, ang pagsimba kay Jehova nagapadungog sa iya katawhan nga mga Israelinhon, kay ginahilway sila sa sining makahuluya nga mga buhat. Sa pag-ilustrar: Kon mapadala ka sing sulat sa imo respetado nga abyan, butangan mo bala ini sang ngalan sang lain nga tawo nga ang reputasyon baliskad gid sa batasan sang imo abyan? Siempre indi!

Ang hangkat ni Elias sa mga propeta ni Baal nagapamatuod nga indi tanan nga pangamuyo nagakadto sa isa lang ka Dios

 Kon mangamuyo ka kay Jehova, nagapangamuyo ka sa Manunuga, ang Amay sang tanan nga tawo. * “Ikaw ang amon Amay, O Jehova,” pangamuyo ni propeta Isaias. (Isaias 63:16, NW) Sia ang ginapatuhuyan ni Jesus sang ginsilingan niya ang iya mga sumulunod: “Magakayab ako sa akon Amay kag inyo Amay kag sa akon Dios kag inyo Dios.” (Juan 20:17) Si Jehova amo ang Amay ni Jesus kag ang Dios nga ginpangamuyuan niya. Gintudluan niya ang iya mga sumulunod nga mangamuyo man sa sini nga Dios.—Mateo 6:9.

Ginatudlo bala sang Biblia nga mangamuyo kita kay Jesus, kay Maria, sa mga santos, ukon sa mga anghel? Wala—kundi kay Jehova lamang. Binagbinaga ang duha ka rason. Una, ang pangamuyo isa ka paagi sang pagsimba, kag siling sang Biblia, si Jehova lamang ang simbahon. (Exodo 20:5) Ikaduha, suno sa Biblia, sia ang “nagapamati sang pangamuyo.” (Salmo 65:2) May mga responsibilidad nga ginahatag si Jehova sa iban, pero wala gid niya ginhatag ang responsibilidad nga magpamati sang pangamuyo. Sia ang Dios nga nagpromisa nga mamati sa aton mga pangamuyo.

Gani, kon gusto mo nga pamatian sang Dios ang imo pangamuyo, dumduma ang siling sang Biblia: “Ang tagsatagsa nga nagatawag sa ngalan ni Jehova maluwas.” (Binuhatan 2:21) Pero ang tanan bala nga pangamuyo ginapamatian ni Jehova? Ukon may dapat pa bala kita himuon para pamatian niya ang aton mga pangamuyo?

^ par. 6 Sa Maayong Balita nga Biblia, ang footnote sang Genesis 2:4 nagasiling: “Ang GINOO sa Hebreo nga teksto Yahweh. Sa iban nga pagbadbad ginagamit ang Jehova.

^ par. 9 Para sa iban nga relihion, sala ang paggamit sang personal nga ngalan sang Dios, bisan sa pangamuyo. Pero, ina nga ngalan mabasa sing mga 7,000 ka beses sa orihinal nga lenguahe sang Biblia. Ang kalabanan sini makita sa mga pangamuyo kag mga salmo sang matutom nga mga sumilimba ni Jehova.