Speaking in Tongues—Halin Bala sa Dios?

“WALA ako sing naintiendihan,” siling ni Devon. “Kada semana sa amon simbahan, madamo ang daw ginasudlan sang espiritu santo kag naga-speaking in tongues sila. Ang iban sa ila mga imoral. Samtang ako, nagatinguha nga sundon ang ginasiling sang Biblia kag pirme nagapangamuyo nga tagaan ako sini nga espiritu. Pero ngaa wala ko gid ini mabaton?”

Si Gabriel nagatambong man sa relihion nga ang mga tawo daw nakabaton sing balaan nga espiritu kag naga-speaking in tongues. “Ang naindian ko lang,” siling niya, “kay nagakadisturbo ang akon pangamuyo sa katunog sang ila ginahambal nga bisan sila indi kaintiende. Wala sing pulos ang ila ginawakal. Kon ara gid man sa ila ang espiritu sang Dios, indi bala dapat may pulos ini?”

Ang eksperiensia nanday Devon kag Gabriel nagabangon sang importante nga pamangkot, Ang speaking in tongues (paghambal sing lainlain nga hambal) bala sa pila ka relihion subong halin gid man sa Dios? Para masabat ini, usisaon naton ang milagruso nga ikasarang sa paghambal sang mga Cristiano sang unang siglo.

“Nagsugod Sila sa Paghambal sa Lainlain nga Hambal”

Sa Biblia, mabasa naton ang parte sa mga lalaki kag babayi nga ginhatagan sing ikasarang sa paghambal sing mga lenguahe nga wala nila matun-an. Una ini nga natabo sang Pentecostes 33 C.E.,mga pila ka semana nga napatay si Jesucristo. Sina nga adlaw sa Jerusalem, ang mga 120 ka disipulo ni Jesus napuno “sing balaan nga espiritu kag nagsugod sila sa paghambal sa lainlain nga hambal.” Ang mga bisita halin sa iban nga lugar naligban “bangod nabatian sang kada isa nga nagahambal ang mga disipulo sa iya kaugalingon nga lenguahe.”—Binuhatan 1:15; 2:1-6.

Mabasa man sa Biblia nga may iban pa nga sumulunod si Jesus nga may amo sini nga ikasarang. Halimbawa, paagi sa balaan nga espiritu, si apostol Pablo milagruso nga nakahambal sang madamo nga lenguahe. (Binuhatan 19:6; 1 Corinto 12:10, 28; 14:18) Pero ang pagbaton nila sang balaan nga espiritu sang Dios may katuyuan gid. Kon amo, para sa ano ang paghambal sing lainlain nga hambal sadto?

Pamatuod nga Ginasuportahan Sila sang Dios

Ang iban nga Cristiano sa siudad sang Corinto makahambal sing lainlain nga hambal. Sang ginsulatan sila ni Pablo, nagsiling sia nga “ang  paghambal sing lainlain nga hambal isa ka tanda . . . para sa mga di-tumuluo.” (1 Corinto 14:22) Gani, pareho sa iban nga milagruso nga ikasarang, ang paghambal sing lainlain nga hambal pamatuod nga ang bag-o nga Cristianong kongregasyon ginakahamut-an kag ginasuportahan sang Dios. Ining mga ikasarang daw karatula sa dalan nga nagatudlo sa mga nagapangita sing kamatuoran kon diin ang pinili nga katawhan sang Dios.

Wala nagsiling ang Biblia nga si Jesus ukon ang bisan sin-o antes sang panahon sang mga Cristiano milagruso nga naghambal sing lainlain nga hambal nga wala nila matun-an. Kon amo, ang ikasarang sa paghambal nga ginhatag sa mga disipulo ni Jesus may iban pa nga katuyuan.

Para Mapalapnag ang Maayong Balita

Sang magsugod sa pagwali si Jesus, ginsugo niya ang iya mga disipulo nga iwali ang maayong balita sang Ginharian sang Dios sa mga Judiyo lamang. (Mateo 10:6; 15:24) Gani, talagsa lang nila mawalihan ang mga lugar sang mga indi Judiyo. Pero may pagbag-o.

Pagkatapos sang iya kamatayon sang 33 C.E., ginsugo sang nabanhaw nga si Jesus ang iya mga sumulunod nga “maghimo sang mga disipulo sa mga tawo sang tanan nga pungsod.” Nagsiling man sia nga mangin mga saksi niya sila “tubtob sa ukbong sang duta.” (Mateo 28:19; Binuhatan 1:8) Para mahimo ini, dapat kabalo sila sang iban nga lenguahe magluwas sa Hebreo.

Pero, ang kalabanan nga disipulo sadto “wala sing tinun-an kag kinaandan lamang.” (Binuhatan 4:13) Gani, paano sila makawali sa mga lugar nga ang mga lenguahe wala pa gid nila mabatian kag indi nila mahambal? Paagi sa balaan nga espiritu, ining mapisan nga mga manugwali nakabaton sing ikasarang nga makahambal sang mga lenguahe nga wala gid nila matun-an.

Gani, may duha ka importante nga katuyuan ang ikasarang sa paghambal sing lainlain nga hambal. Una, pamatuod ini sang pagsuporta sang Dios. Ikaduha, nakabulig ini sa mga Cristiano sang unang siglo nga matuman ang sugo sa ila nga magwali sa mga tawo sa madamo nga lenguahe. Natuman bala ini sang madamo nga relihion subong nga naga-speaking in tongues?

Ang Speaking in Tongues Subong—Ginasuportahan Bala sang Dios?

Sa diin mo ibutang ang karatula para makita ini sang madamo nga tawo sa inyo lugar? Sa sulod bala sang gamay nga bilding? Siempre indi! Mabasa naton nga sang Pentecostes, ang “kadam-an” sa kalye nakasaksi sang milagruso nga paghambal sang mga disipulo. Bilang resulta, “mga tatlo ka libo ka kalag ang gindugang” sa Cristianong kongregasyon sadto nga adlaw! (Binuhatan 2:5, 6, 41) Kon may nagasiling subong nga naga-speaking in tongues sila pero ara sila sa sulod sang simbahan, paano ini makita sang mga di-tumuluo?

Siling sang Biblia, ang pagpakighilawas kag ang iban pa nga “mga buhat sang unod” batok sa balaan nga espiritu. Nagsiling pa ini nga “ang mga nagabuhat sini nga mga butang indi makapanubli sang ginharian sang Dios.” (Galacia 5:17-21) Kon may makita ka nga imoral nga mga tawo nga naga-speaking in tongues, mahimo magapalibog ka, ‘Daw indi man husto nga hatagan sang Dios sing balaan nga espiritu ang mga tawo nga padayon nga nagahimo sing supak sa Pulong sang Dios?’ Pareho lang ina sa pagbutang sing karatula nga nagapatalang sa mga nagaagi.

Speaking in Tongues Subong—Ginagamit Bala sa Pagpalapnag sang Maayong Balita?

Ang ikaduha nga katuyuan sang speaking in tongues sang unang siglo amo ang pagpalapnag sang maayong balita sa mga tawo nga may lainlain nga lenguahe. Natuman man bala ini sang mga naga-speaking in tongues subong? Dumdumon naton nga ang mga nakasaksi sa Jerusalem sang Pentecostes 33 C.E. halin sa lainlain nga lugar, kag naintiendihan nila ang  mga lenguahe nga milagruso nga nahambal sang mga disipulo. Pero, ang ginawakal sang mga naga-speaking in tongues subong indi maintiendihan.

Ang mga naga-speaking in tongues subong lain gid sa mga sumulunod ni Jesus sang una nga ginhatagan sang balaan nga espiritu. Wala man sing pamatuod nga may ginhatagan pa sing amo sini nga ikasarang sang napatay na ang mga apostoles. Nahibaluan ini sang mga nagabasa sing Biblia. Parte sa milagruso nga mga ikasarang, lakip ang speaking in tongues, si apostol Pablo nagtagna: “Magauntat ini.” (1 Corinto 13:8) Gani, paano mabal-an kon sin-o ang may balaan nga espiritu subong?

Sin-o ang May Pamatuod nga Ara sa Ila ang Balaan nga Espiritu?

Nahibaluan ni Jesus nga magauntat ang speaking in tongues kon maporma na ang Cristianong kongregasyon. Antes sia mapatay, ginsugid ni Jesus ang palatandaan sang iya matuod nga mga sumulunod. “Paagi sa sini ang tanan makahibalo nga kamo mga disipulo ko, kon nagahigugmaanay kamo.” (Juan 13:35) Sa bersikulo sa Biblia nga nagasiling nga magauntat ang milagruso nga ikasarang, mabasa man: “Ang gugma wala gid nagauntat.”—1 Corinto 13:8.

Ang gugma amo ang una sa listahan sang siam ka aspekto sang “bunga,” ukon produkto sang balaan nga espiritu sang Dios. (Galacia 5:22, 23) Gani, ang matuod nga nakabaton sang espiritu sang Dios kag ginasuportahan niya, may matuod nga gugma sa isa kag isa. Ang ikatlo nga aspekto sang balaan nga espiritu amo ang paghidait. Gani, ang mga tawo subong nga may balaan nga espiritu mahidaiton. Wala sila sing ginapasulabi kag ginalikawan nila ang kapintas.

Dumduma man ang tagna ni Jesus sa Binuhatan 1:8. Nagsiling sia nga ang iya mga disipulo makabaton sing gahom para mangin mga saksi niya “tubtob sa ukbong sang duta.” Ginsiling man niya nga ini nga hilikuton magapadayon “hasta sa katapusan sang kalibutan.” (Mateo 28:20, APD) Gani, ang pagwali sa bilog nga kalibutan amo gihapon ang pamatuod sang mga tawo nga may balaan nga espiritu.

Kon ikaw ang pamangkuton, ano nga grupo subong ang may pamatuod nga ara sa ila ang balaan nga espiritu? Sin-o ang nagapakita sang bunga sang espiritu, labi na sang gugma kag paghidait, bisan pa paantuson sila sang gobierno bangod indi sila mag-entra sa inaway? (Isaias 2:4) Sin-o ang nagatinguha nga maglikaw sa mga buhat sang unod, pareho sang pagpakighilawas, kag ginasikway pa sa ila kongregasyon ang mga nagahimo sini nga wala nagahinulsol? (1 Corinto 5:11-13) Sin-o ang nagawali sa bilog nga kalibutan sang maayong balita nga ang Ginharian sang Dios amo lamang ang paglaum sang mga tawo?—Mateo 24:14.

Ang manugbalhag sini nga magasin wala nagaduhaduha sa pagsiling nga makita sa mga Saksi ni Jehova ang mga palatandaan suno sa Biblia sang mga tawo nga may balaan nga espiritu. Ngaa indi mo sila pagkilalahon sing maayo para mapamatud-an mo mismo kon ginasuportahan gid man sila sang Dios?