Iluga ang Ila Pagtuo

Nagdaku Sia nga May Kahamuot ni Jehova

GINATAN-AW ni Samuel ang iya katawhan. Nagtipon ang pungsod sa lugar sang Gilgal bangod ginpatawag sila sining matutom nga propeta kag hukom nga dinekada na nga nag-alagad. Kon ibase sa aton kalendaryo, mga Mayo ukon Hunyo sadto kag nagsugod na ang tingadlaw. Ang mga trigo sa palibot mapulapula na kag puede na anihon. Nangibabaw ang kalinong. Paano malab-ot ni Samuel ang ila tagipusuon?

Wala maintiendihan sang katawhan kon daw ano ka serioso ang ila ginhimo. Namilit sila nga hatagan sang isa ka tawo nga magahari sa ila. Daku ini nga pagpakanubo sa ila Dios nga si Jehova, kag sa iya propeta. Pareho lang nga ginasikway nila si Jehova subong ila Hari! Paano sila mabuligan ni Samuel nga maghinulsol?

Naghambal si Samuel. “Ako tigulang na kag ubanon,” siling niya sa mga tawo. Mas may awtoridad sia sa paghambal kay ubanon na sia. Dayon nagsiling sia: “Ako naglakat sa atubangan ninyo kutub sang akon pagkapamatan-on tubtub sini nga adlaw.” (1 Samuel 11:14, 15; 12:2) Bisan tigulang na sia, maathag pa sa iya ang nagligad. Ang iya mga desisyon samtang nagadaku sia amo ang nagpabakod sang iya pagtuo kag debosyon sa iya Dios nga si Jehova.

Ginpabakod kag ginproteksionan pirme ni Samuel ang iya pagtuo, bisan pa kaupod niya ang mga wala sing pagtuo kag indi matutom. Subong, mabudlay ini himuon kay ari kita sa sining wala sing pagtuo kag garuk nga kalibutan. Tan-awon naton kon ano ang aton matun-an kay Samuel halin sang bata pa sia.

“Nag-alagad sa Atubangan sang GINOO nga Bata Pa”

Lain gid sa iban ang kabuhi ni Samuel. Paglutas sa iya sang mga apat ukon lima sia ka tuig, nag-alagad na sia sa tabernakulo ni Jehova sa Shilo, nga mga 30 kilometros halin sa ila balay sa Rama. Ginhatag sia sang iya mga ginikanan nga sanday Elcana kag Ana para sa pinasahi nga pag-alagad kay Jehova subong Nazareo sa bilog niya nga kabuhi. * Ginpanghataghatag lang bala nila si Samuel kay indi nila sia palangga?

Indi. Kabalo sila nga atipanon ang ila bata sa Shilo. Sigurado gid ini kay ang Mataas nga Saserdote nga si Eli amo ang upod pirme ni Samuel. May mga babayi man nga nakaiskedyul nga mag-alagad sa tabernakulo.—Exodo 38:8.

Nangayo sing anak si Ana sa Dios, kag ginpromisa niya nga ihatag ini sa Dios para sa sagrado nga pag-alagad. Gani, indi gid malipatan nanday Ana kag Elcana ang ila pinalangga nga panganay, kay sia ang sabat sa ila pangamuyo. Kon magbisita sila kada tuig, ginadala ni Ana kay Samuel ang iya ginhimo nga bag-o nga bayo nga wala sing pako para sa iya pag-alagad sa tabernakulo. Sigurado nga nalipay gid ang bata kon mag-abot sila. Daku gid ang nabulig sang pagpalangga kag pagpabakod sang iya mga ginikanan. Ginatudluan nila sia nga pribilehiyo gid  ang pag-alagad kay Jehova sa sinang pinasahi nga lugar.

Ang mga ginikanan subong madamo man sing matun-an kanday Ana kag Elcana. Napabay-an sang kalabanan sa ila ang espirituwal nga kinahanglanon sang ila kabataan bangod mas gusto nila ihatag ang materyal nga mga butang. Pero gin-una sang mga ginikanan ni Samuel ang espirituwal nga mga butang, kag daku ang impluwensia sini sa pagdaku sang ila bata.—Hulubaton 22:6.

Maimadyin naton nga nagadaku na ang bata kag nagalagawlagaw sa mga pukatod sa palibot sang Shilo. Samtang ginatan-aw niya ang siudad sa ubos kag ang patag nga mga lugar, mahimo nga nalipay gid sia sang makita niya ang tabernakulo ni Jehova. Ang tabernakulo sagrado gid nga lugar. * Ginpatindog ini mga 400 ka tuig antes sang panahon ni Samuel sa pagpanguna mismo ni Moises, kag amo ini sadto ang sentro sang pagsimba kay Jehova sa bilog nga kalibutan.

Samtang nagadaku si Samuel, ginhigugma pa gid niya ang tabernakulo. Sa rekord nga iya ginsulat sang ulihi, nagsiling sia: “Si Samuel nag-alagad sa atubangan sang GINOO nga bata pa, nga natakdan sang efod nga lino.” (1 Samuel 2:18) Ining simple nga bayo nga wala sing pako pamatuod nga nagabulig si Samuel sa mga saserdote sa tabernakulo. Bisan pa indi sia halin sa pamilya sang mga saserdote, nalakip sa asaynment ni Samuel ang pagbukas kada aga sang mga puertahan pasulod sa ugsaran sang tabernakulo kag ang pag-atipan sa tigulang na nga si Eli. Nanamian sia sa iya pribilehiyo. Pero samtang nagadugay, ining inosente nga bata nagakatublag sang malain nga nagakatabo sa balay ni Jehova.

Nagpabilin nga Matinlo

Bisan bata pa si Samuel, nakita niya ang grabe nga kalainan sang duha ka anak ni Eli nga sanday Hofni kag Finehas. Aton mabasa: “Ang mga anak ni Eli mga lalaki nga huroshuros; wala sila makakilala sa GINOO.” (1 Samuel 2:12) Ang duha ka punto sini nga bersikulo nagaugyunay. Sanday Hofni kag Finehas mga “huroshuros,” ukon “wala sing pulos nga mga anak,” kay wala nila ginatahod si Jehova. Ginabalewala nila ang iya matarong nga mga prinsipio kag mga kasuguan. Amo ini ang gamot sang tanan nila nga sala.

Sa Kasuguan sang Dios, ginsambit gid ang obligasyon sang mga saserdote kag kon paano nila himuon ang paghalad sa tabernakulo. Ngaa? Kay ang mga halad nagarepresentar sa pagpatawad sang Dios sa mga sala para mangin matinlo ang mga tawo sa iya atubangan, kag mabaton ang iya pagpakamaayo kag paggiya. Pero wala gintahod nanday Hofni kag Finehas ang mga halad, kag gin-ilog man ini sang iban nga saserdote. *

Imadyina ang katingala ni Samuel sang makita niya nga ginapabay-an lang ini nga mga kalainan. Pila ayhan ka imol, ordinaryo, kag ginapigos ang nakita niya nga nagakadto sa sagrado nga tabernakulo para malugpayan kag mapabakod, pero nagpuli sila nga napaslawan, naglain ang buot, ukon nahuy-an? Kag ano ayhan ang iya nabatyagan sang ginsupak nanday Hofni kag Finehas ang kasuguan ni Jehova parte sa moral sang nakigrelasyon sila sa pila ka babayi sa tabernakulo? (1 Samuel 2:22) Siguro nagalaum gid sia nga aksionan ini ni Eli.

May awtoridad si Eli nga tadlungon ining nagalala nga problema. Bilang mataas nga  saserdote, responsibilidad niya ang mga nagakatabo sa tabernakulo. Bilang amay, obligasyon man niya nga disiplinahon ang iya kabataan. Kay man, ginahalitan nila ang ila kaugalingon kag ang madamo nga tawo. Pero, wala mahimo ni Eli ang iya obligasyon bilang amay kag mataas nga saserdote. Wala sing puersa ang iya pagsaway sa iya mga anak. (1 Samuel 2:23-25) Kinahanglan kuntani sang iya mga anak ang mabug-at nga disiplina, kay ang ila ginahimo bagay silutan sang kamatayon!

Malala na gid ang kahimtangan amo nga nagpadala si Jehova sing propeta nga wala makilal-an. Ining “tawo sang Dios” may mabaskog nga mensahe sang paghukom para kay Eli. Si Jehova nagsiling kay Eli: “Ginpadunggan mo ang imo mga anak nga lalaki labaw pa sa akon.” Siling sang Dios, ang malain nga mga anak Eli mapatay sa isa lang ka adlaw kag ang iya pamilya magaantos. Madula man sa ila pamilya ang pribilehiyo sang pagkasaserdote. May epekto bala ini nga paandam sa ila pamilya? Suno sa rekord, wala.—1 Samuel 2:27–3:1.

Ano ang epekto sining tanan nga kagarukan sa bata nga si Samuel? Mabasa naton nga may maayo gihapon nga nagakatabo. Parte ini sa pagdaku kag pag-uswag ni Samuel. Sa 1 Samuel 2:18, mabasa naton nga si Samuel “nag-alagad sa atubangan sang GINOO nga bata pa.” Gani, bisan bata pa si Samuel, importante gid sa iya ang pag-alagad sa Dios. Ang bersikulo 21 nagsiling pa: “Ang bata nga si Samuel nagtubo sa atubangan sang GINOO.” Samtang nagadaku sia, nagasuod pa gid sia sa iya Amay sa langit. Ining suod nga relasyon kay Jehova amo ang pinakamabakod nga proteksion sa bisan ano nga kalainan.

Puede niya marason nga makapagusto sia kay ang mataas nga saserdote gani kag ang iya mga anak nagahimo man sing sala. Pero ang kalainan sang iban pati sang mga ara sa posisyon indi balibad para magpakasala. Madamo man nga pamatan-on nga Cristiano ang nag-ilog kay Samuel kag padayon sila nga “nagtubo sa atubangan sang GINOO” bisan pa indi maayo ang ila makita sa palibot.

Ano ang kaayuhan sini para kay Samuel? Mabasa naton: “Karon ang bata nga si Samuel nagdayon sa pagtubo kag nagdugang sa kahamuut sa GINOO kag sa mga tawo.” (1 Samuel 2:26) Madamo ang nanamian kay Samuel labi na ang mga tawo nga matutom man. Palangga man ni Jehova ining matutom nga bata. Kag kabalo si Samuel nga tapuson sang Dios ang tanan nga kalainan sa Shilo, pero mahimo ginapaligban niya kon san-o ini matabo.

“Hambal Ka, kay ang Imo Alagad Nagapamati”

Sang ulihi, nasabat ang iya ginapaligban. Kaagahon na sadto pero madulom pa kag nagasiga gihapon ang suga sang tolda. Tama kalinong kag gulpi lang may nabatian si Samuel nga tingog nga nagatawag sa iya. Abi niya si Eli ato nga tigulang na kag haluson makakita. Nagbangon si Samuel kag “nagdalagan” pakadto sa tigulang. Maimadyin mo bala ang hitsura sang bata nga nagatiniil kag nagadalagan para tan-awon kon ano ang kinahanglan ni Eli? Ginatahod kag palangga gid ni Samuel si Eli. Bisan pa may mga sala si Eli, sia gihapon ang mataas nga saserdote ni Jehova.—1 Samuel 3:2-5.

Ginpukaw ni Samuel si Eli, nga nagasiling: “Yari ako, kay gintawag mo ako.” Nagsiling si Eli nga wala sia nagtawag kag ginpatulog niya liwat ang bata. Pero, nasulit pa ini sing pila ka beses. Sang ulihi, narealisar ni Eli ang nagakatabo. Kis-a na lang sadto nagapadala si Jehova sa iya katawhan sing palanan-awon ukon mensahe paagi sa mga propeta, kag bal-an na naton kon ngaa. Pero bal-an ni Eli nga nagapakig-angot liwat si Jehova, kag sa sini nga tion sa isa ka bata! Ginpabalik ni Eli si Samuel sa iya hiligdaan kag gintudluan sang iya himuon. Nagpati si Samuel. Dayon nabatian niya liwat ang tingog: “Samuel! Samuel!” Kag ang bata nagsiling: “Hambal ka, kay ang imo alagad nagapamati.”—1 Samuel 3:1, 5-10.

May alagad na gid man si Jehova sa Shilo nga nagapamati sa iya. Kag padayon ini nga ginhimo  ni Samuel sa bilog niya nga kabuhi. Ikaw man bala? Indi kinahanglan nga mahulat pa kita sing tingog kon gab-i nga magatawag sa aton. Subong, daw pareho lang nga mabatian naton ang tingog sang Dios paagi sa iya Pulong, ang Biblia. Kon pirme kita nagapamati kag nagatuman sa Dios, magabakod man ang aton pagtuo. Amo gid sini ang ginhimo ni Samuel.

Ato nga hitabo sa Shilo importante gid sa kabuhi ni Samuel, kay didto niya nakilala si Jehova sa pinasahi nga paagi. Nangin propeta sia kag humalambal sang Dios. Sa umpisa, nahadlok ang bata nga isugid kay Eli ang mensahe ni Jehova. Amo na ato ang katapusan nga pagpahayag nga ang tagna batok sa pamilya ni Eli madali na lang matuman. Pero nagpakaisog si Samuel kag mapainubuson nga ginbaton ni Eli ang paghukom sang Dios. Wala madugay, natuman ang tanan nga ginsiling ni Jehova. Ang Israel nakig-away sa mga Filistinhon, kag sanday Hofni kag Finehas napatay sa isa lang ka adlaw. Napatay man si Eli sang nabal-an niya nga ang sagrado nga Kaban ni Jehova naagaw.—1 Samuel 3:10-18; 4:1-18.

Nakilala pa gid si Samuel subong matutom nga propeta. “Ang GINOO kaupud niya,” siling sang rekord, kag gintuman ni Jehova ang tanan nga tagna ni Samuel.—1 Samuel 3:19.

“Si Samuel Nagtawag sa GINOO”

Gintuman bala sang mga Israelinhon si Samuel kag nangin matutom sa Dios? Wala. Sang ulihi, gusto nila nga indi lang propeta ang magahukom sa ila. Gusto nila nga ilugon ang iban nga pungsod nga ginagamhan sang isa ka hari. Sa sugo ni Jehova, ginhatag ni Samuel ang ila gusto. Pero dapat niya ipakita sa mga Israelinhon kon daw ano ka bug-at ang ila sala. Indi lang tawo ang ila ginasikway kundi si Jehova mismo! Gani ginpatipon niya ang mga tawo sa Gilgal.

Kululbaan gid ang natabo sang nag-atubang si Samuel sa mga Israelinhon sa Gilgal.  Ginpahanumdom sa ila ni Samuel ang iya katutom sa sulod sang malawig nga panahon. Mabasa naton: “Si Samuel nagtawag sa GINOO.” Nagpangabay sia kay Jehova nga magpadala sing daguob.—1 Samuel 12:17, 18.

Daw imposible nga madaguob sa tingadlaw! Kon nagduhaduha man ukon nagkadlaw ang mga tawo, wala ini magdugay. Gulpi lang naggal-um, kag naghuyop ang hangin amo nga nahapay ang mga trigo. Nagsigabong ang makabulungol nga daguob kag nagtupa ang ulan. Ano ang reaksion sang mga tawo? “Ang bug-os nga katawohan nahadluk sing daku sa GINOO kag kay Samuel.” Narealisar gid man nila kon daw ano kadaku ang ila sala.—1 Samuel 12:18, 19.

Pero indi si Samuel, kundi ang iya Dios nga si Jehova ang nagtandog sa tagipusuon sining mga rebelde. Halin sang bata pa asta magtigulang si Samuel, may pagtuo sia kay Jehova nga Dios kag ginpakamaayo sia. Amo man sa karon. Ginapakamaayo gihapon ni Jehova ang mga nagailog sa pagtuo ni Samuel.

[Mga Nota]

^ par. 8 Ang mga Nazareo may panumpa nga indi gid mag-inom sing alak ukon magpautod sing buhok. Ang iban may gintalana nga tion kon asta lang san-o ang ila panumpa. Pero ang iban pareho nanday Samson, Samuel, kag Juan Bautista mga Nazareo sa bilog nila nga kabuhi.

^ par. 12 Ang santuaryo isa ka rektanggulo nga tinukod. Daku ini nga tolda nga kahoy ang balayan. Pero human ini sa pinakamaayo nga mga materyales—sealskin, tela nga may matahom nga mga burda, kag malahalon nga mga tapi nga ginkulapan sang pilak kag bulawan. Ang santuaryo ara sa sulod sang rektanggulo nga ugsaran nga may matahom nga altar nga ginahalaran. Sang ulihi, may mga kuarto na sa kilid sang tabernakulo para sa mga saserdote. Mahimo nga sa isa sini nga mga kuarto nagatulog si Samuel.

^ par. 16 Aton mabasa ang duha ka halimbawa sang ila indi pagtahod. Una, ginhambal sang Kasuguan kon ano nga bahin sang halad ang ihatag sa mga saserdote para ila kaunon. (Deuteronomio 18:3) Pero sa tabernakulo, wala ini ginasunod sang malain nga mga saserdote. Ginasugo nila ang ila mga suluguon nga kaw-iton ang karne nga ginalaga sa kaldero kag kuhaon ang bisan ano nga pataw nga madala! Ikaduha, kon may magdala sang halad para sunugon sa altar, ginasugo man nila ang ila suluguon nga pahugon ang nagahalad para ihatag ang hilaw nga karne antes pa mahalad kay Jehova ang tambok sini.—Levitico 3:3-5; 1 Samuel 2:13-17.

[Retrato sa pahina 17]

Bisan pa nahadlok si Samuel, ginsugid gihapon niya ang mensahe sang paghukom ni Jehova kay Eli

[Retrato sa pahina 18]

Nangamuyo si Samuel nga may pagtuo, kag ginsabat sia ni Jehova paagi sa pagpadala sing daguob