Magdiretso sa kaundan

Magdiretso sa listahan sang kaundan

Ano ang Gintudlo ni Jesus Parte sa Dios?

Ano ang Gintudlo ni Jesus Parte sa Dios?

 Ano ang Gintudlo ni Jesus Parte sa Dios?

“Ang nakakilala sa Amay ako gid lang nga iya Anak kag ang mga tawo nga buot ko nga ipakilala sa Amay.”—LUCAS 10:22, Ang Pulong sang Dios.

ANTES magkadto sa duta ang panganay nga Anak sang Dios, nakaupod na niya sa malawig nga tion ang iya Amay. (Colosas 1:15) Gani, nahibaluan gid niya ang panghunahuna, balatyagon, kag personalidad sang iya Amay. Ining Anak sang Dios amo si Jesus. Sang nagkadto sia sa duta, nalipay gid sia nga isugid sa iban ang kamatuoran parte sa iya Amay. Madamo kita sing matun-an parte sa Dios kon pamatian naton ang ginasiling ni Jesus.

Ang ngalan sang Dios Importante gid kay Jesus ang balaan nga ngalan sang Dios nga Jehova. Ang iya mismo ngalan nagakahulugan “si Jehova ang Kaluwasan.” Gusto gid niya nga makilala kag gamiton sang iban ang ngalan sang iya Amay, amo nga sang gab-i antes sia mapatay, nakasiling sia kay Jehova: “Ginpakilala ko ang imo ngalan.” (Juan 17:26) Gingamit gid kag ginpakilala ni Jesus ang ngalan sang Dios. Importante gid ini kay paano maintiendihan sang mga tagpalamati ni Jesus ang kamatuoran parte kay Jehova kon indi nila kilala ang Iya ngalan kag ang kahulugan sini? *

Ang daku nga gugma sang Dios Nagsiling anay si Jesus sa iya pangamuyo sa Dios: “Amay, . . . ginhigugma mo ako sa wala pa matukod ang kalibutan.” (Juan 17:24) Nabatyagan ni Jesus ang gugma sang Dios sang didto sia sa langit. Amo nga sang ari sia sa duta, ginpakita man niya ini nga gugma sa lainlain nga paagi.

Ginpakita ni Jesus nga ang gugma ni Jehova para sa tanan nga tawo. Nagsiling sia: “Ginhigugma gid sang Dios ang kalibutan amo nga ginhatag niya ang iya bugtong nga Anak, agod ang tagsatagsa nga nagatuo sa iya indi malaglag kundi makatigayon sang kabuhi nga walay katapusan.” (Juan 3:16) Ang Griegong tinaga nga gin-translate nga “kalibutan” wala nagakahulugan nga “duta” kundi nagapatuhoy sa tanan nga tawo sa duta. Ginahigugma gid sang Dios ang mga tawo amo nga ginhatag niya ang iya pinakapalangga nga Anak para maluwas ang matutom nga mga tawo sa sala kag kamatayon kag mabuhi sing walay katapusan. Indi gid naton matungkad kon daw ano kita ka palangga sang Dios.—Roma 8:38, 39.

Nagpasalig si Jesus: Palangga gid ni Jehova ang kada isa sa iya mga sumilimba. Nagsiling si Jesus nga ang iya Amay pareho sa isa ka manugbantay sang karnero. Para kay Jehova, pinasahi gid kag importante ang kada isa sa iya karnero. (Mateo 18:12-14) Nagsiling si Jesus nga nahibaluan gid ni Jehova kon ang isa ka maya mahulog sa duta. Nagdugang pa sia: “Bisan ang mga buhok mismo sa inyo ulo naisip na tanan.” (Mateo 10:29-31) Kon ginaulikdan gani ni Jehova ang isa ka maya nga nadula sa pugaran, ano pa gid ayhan ang iya mga sumilimba diri sa duta? Kon ang aton buhok maisip niya tanan, may ara pa bala kita mga kinahanglanon, problema, kag mga ginakabalak-an nga wala niya nahibaluan?

Ang Amay sa langit Suno sa nagligad nga artikulo, si Jesus ang bugtong nga Anak sang Dios. Gani, nagakaigo lang nga pirme ginatawag  ni Jesus si Jehova nga iya “Amay.” Sang 12 anyos sia, gintawag niya si Jehova nga “akon Amay.” Amo ini ang una niya nga pinamulong nga ginrekord sa Biblia sang didto sia sa templo. (Lucas 2:49) Ang tinaga nga “Amay” mabasa sing halos 190 ka beses sa mga Ebanghelyo. Pila ka beses nga ginpatuhuyan ni Jesus si Jehova subong “inyo Amay,” “Amay namon,” kag “akon Amay.” (Mateo 5:16; 6:9; 7:21) Ginapakita lamang sini nga puede gid mangin suod ang makasasala nga mga tawo kay Jehova.

Maluluy-on kag mapinatawaron Nahibaluan ni Jesus nga kinahanglan gid sang makasasala nga mga tawo ang kaluoy ni Jehova. Sa iya parabola parte sa buhaha nga anak, ginkomparar ni Jesus si Jehova sa isa ka maluluy-on kag mapinatawaron nga amay nga handa magbaton sa iya mahinulsulon nga anak. (Lucas 15:11-32) Ining mga pinamulong ni Jesus nagapasalig sa aton nga kon ang isa ka makasasala handa magbag-o, kaluuyan sia ni Jehova. Handa si Jehova magpatawad sa makasasala nga nagahinulsol. Nagsiling si Jesus: “Mas daku ang kalipay tungod sa isa ka makasasala nga naghinulsol sang sa 99 nga mga matarong nga indi kinahanglan nga maghinulsol.” (Lucas 15:7, APD) Indi ka bala gusto magsuod sa amo sina ka maluluy-on nga Dios?

Manugpamati sang mga pangamuyo Antes si Jesus magkadto sa duta, nahibaluan niya nga si Jehova amo ang ‘Manugpamati sang mga pangamuyo’ kag nalipay Sia sa mga pangamuyo sang iya matutom nga mga sumilimba. (Salmo 65:2) Gani sang ari si Jesus sa duta, gintudluan niya ang iya mga tagpalamati kon paano mangamuyo kag kon ano ang ila ipangamuyo. “Indi pagsulitsulita ang amo gihapon nga mga butang,” siling niya. Ginsilingan niya sila nga ipangamuyo nga matuman ang kabubut-on sang Dios “sa duta, subong sang sa langit.” Mahimo man naton ipangamuyo nga hatagan kita sing pagkaon adlaw-adlaw, patawaron sa aton mga sala, kag ipahilayo sa mga pagsulay. (Mateo 6:5-13) Nagsiling si Jesus nga pareho sa isa ka mahigugmaon nga amay, si Jehova nagapamati sa sinsero nga mga pangamuyo sang Iya mga alagad.—Mateo 7:7-11.

Gintudlo ni Jesus ang kamatuoran parte kay Jehova kag kon ano sia nga sahi sang Dios. Ginsugid man niya kon paano bag-uhon ni Jehova ang mga kahimtangan diri sa duta para matuman ang Iya katuyuan. Amo ini ang tema sang mensahe nga ginwali ni Jesus.

[Nota]

^ par. 4 Ang ngalan nga Jehova mabasa sing mga 7,000 ka beses sa orihinal nga Biblia. May isa ini ka kahulugan nga “Mangin amo ako sa kon ano nga mangin amo ako.” (Exodo 3:14, NW) Mahimo sang Dios ang bisan ano nga gusto niya para matuman ang iya katuyuan. Gani, ang iya ngalan nagapamatuod nga tumanon gid niya ang tanan niya nga promisa.