Magdiretso sa kaundan

Magdiretso sa segundaryo nga menu

Magdiretso sa listahan sang kaundan

Mga Saksi ni Jehova

Hiligaynon

Ang Lalantawan  |  Marso 2010

Ang Pagsulat sa Biblia Gingiyahan Gid sang Dios

Ang Pagsulat sa Biblia Gingiyahan Gid sang Dios

 Ang Pagsulat sa Biblia Gingiyahan Gid sang Dios

ANO gid ang buot silingon ni apostol Pablo sang nagsiling sia nga ang pagsulat sa Biblia gingiyahan ukon “gintuytuyan sang Dios”? (2 Timoteo 3:16) Sang ginsulat ini ni Pablo sa Griego, ang tinaga nga gingamit niya literal nga nagakahulugan, “ginhuypan sang Dios.” Buot niya silingon nga gingiyahan sang balaan nga espiritu sang Dios ang mga manunulat sang Biblia nga isulat kon ano lang ang gusto sang Dios nga ipasulat sa ila.

Nagsiling si apostol Pedro nga ang mga manunulat  sang Biblia “nagpamulong gikan sa Dios samtang ginatuytuyan sila sang balaan nga espiritu.” (2 Pedro 1:21) Gani, nakasiling si apostol Pablo nga ang mga tulun-an sang Biblia “balaan nga mga sinulatan, nga makapaalam sa imo para sa kaluwasan paagi sa pagtuo may kaangtanan kay Cristo Jesus.”—2 Timoteo 3:15.

Madamo ang indi gid magpati nga ang Dios amo ang awtor sang Biblia. Ang iban nagasiling nga “himuhimo lang ini nga mga istorya.” Pirme gani ini ginapakalain sang mga kritiko amo nga nakasiling ang arkeologo nga si Sir Charles Marston nga “wala gid [sila] sing pagtahod sa Biblia.”

Binagbinaga ang mga Ebidensia

Masaligan gid man bala naton ang Biblia? Importante gid nga binagbinagon mo ini sing maayo. Ngaa? Kay kon ang Biblia Pulong gid man sang Dios, delikado gid kon indi naton ini pagsundon kay mahimo mabutang sa katalagman ang aton kabuhi. Kon magsiling ka nga ang Biblia sinulatan lang sang tawo, mangin wala pulos ang mga prinsipio sini nga makabulig tani sa imo.—1 Tesalonica 2:13.

Ano ang dapat mo nga himuon? Halimbawa, paano mo masiling nga ang isa ka tawo masaligan ukon indi? Makasiling ka lang nga ina nga tawo masaligan kon dugay mo na sia nga kilala kag napamatud-an mo na nga masaligan gid man sia. Amo man sini sa Biblia. Indi ka lang dayon magpati sa mga ispekulasyon kag mga teoriya nga nagapakalain sa Biblia. Usisaa sing maayo ang mga pamatuod nga ang Biblia “gintuytuyan sang Dios.”

Ginapakalain Bisan sang “Mga Abyan” Sini

Indi ka dapat maluyahan kon ang nagapangangkon nga mga “abyan” sang Biblia amo man mismo ang nagapakalain kag nagaduhaduha sa sini. Suno sa New Dictionary of Theology, ang kalabanan nga komentarista sang Biblia subong, bisan ang nagapangangkon nga mga Cristiano, “nagasiling nga ang Kasulatan sinulatan lang sang tawo.”

 Madamo nga teologo ang nagapangduhaduha sa mga manunulat sang Biblia. Halimbawa, ang iban nagasiling nga indi si propeta Isaias ang nagsulat sang tulun-an nga Isaias. Nagasiling sila nga ginsulat ini pagligad pa sang malawig nga tion pagkatapos nga napatay si Isaias. Ang libro nga Concise Bible Commentary, ni Lowther Clarke, nagsiling nga “ginsulat [ini] sang pila ka tawo sa sulod sang pila ka henerasyon.” Pero, ginapakita sang ila mga komento nga wala sila nagapati sa mga pamatuod nga sulit-sulit nga ginpakita ni Jesucristo kag sang iya mga disipulo nga si Isaias ang nagsulat sini nga tulun-an.—Mateo 3:3; 15:7; Lucas 4:17; Juan 12:38-41; Roma 9:27, 29.

Mas malain pa gid kay ang mga kritiko sang Biblia pareho sang komentarista nga si J. R. Dummelow nagsiling nga ang mga tagna sa tulun-an sang Daniel “mga hitabo sang una [nga natabo na antes pa sang panahon ni Daniel] nga ginpagua lang nga tagna sang manunulat.” Ginapakita sini nga wala sila nagapati sa ginsiling mismo ni Jesus sang sia nagpaandam parte sa “makangilil-ad nga butang nga ginabangdan sang pagkahapay, nga ginsiling paagi kay Daniel nga manalagna, nga nagatindog sa duog nga balaan.” (Mateo 24:15) Kon Cristiano ka, mapati ka bala nga si Jesus nagabinutig? Suportahan bala niya ang pagbinutig sang mga propeta nga ipagua nga tagna ang mga hitabo sang una? Indi gid.

Importante Gid Bala Kon Sin-o ang Nagsulat?

Mahimo mamangkot ka: “Importante gid bala kon sin-o ang nagsulat sa mga tulun-an sang Biblia?” Huo, importante gid. Ibutang ta nga ang imo abyan nagbilin sang isa ka dokumento antes sia mapatay. Masaligan mo bala ini kon mabal-an mo nga indi gali sia ang nagsulat sini? Ano abi kon ginsilingan ka sang mga eksperto nga peke ini ukon gindoktor lang? Ano abi kon mahibaluan mo nga ginhimuhimo lang ini sang iya mga abyan kay nagapati sila nga amo ini ang iya luyag? Masaligan bala ini nga dokumento? Paano mo masiguro nga amo gid sini ang luyag sang imo abyan?

Amo man sini sa Biblia. Amo gani nga nagasiling ang madamo nga tawo, bisan ang nagapangangkon nga mga Cristiano, nga wala sing problema kon indi nila pagsundon ang mga sugo sang Biblia parte sa pagkatampad, seksuwal nga moralidad, kag iban pa. Masami gani naton mabatian ang mga tawo nga nagasiling, “Sa Daan pa na ya nga Testamento!” Daw subong bala nga indi na mapuslan karon ang mga prinsipio sini. Ginapakita sang ila mga komento nga wala sila nagaugyon sa ginsiling ni apostol Pablo nga ang Daan nga Testamento “balaan nga mga sinulatan” nga “gintuytuyan sang Dios.”

Pero mahimo magsiling ka, “Buot bala silingon nga indi na naton pagsaligan ang bisan ano nga ebidensia nga ginpakita sang mga eksperto kag mga iskolar?” Siempre indi! Daku ang nabulig sang sinsero nga mga iskolar para maintiendihan naton subong ang kahulugan sang orihinal nga mga manuskrito. Matuod, may ginagmay nga mga sala samtang sulit-sulit nga ginakopya ang Biblia sa sulod sang malawig nga tion. Pero dumduma ini: Indi buot silingon nga kon may ginagmay nga sala sa pagkopya sa mga teksto  sang Biblia masiling dayon kita nga ang bug-os nga Biblia ginhimuhimo lang sang tawo.

Padayon nga Magtuo sa “Balaan nga mga Sinulatan”

Antes magsiling si Pablo nga ang Biblia gingiyahan sang Dios, ginsilingan niya si Timoteo kon ngaa importante gid nga may inspirado nga sinulatan. “Sa katapusan nga mga adlaw,” siling niya, “ang malaut nga mga tawo kag mga impostor magalain kag magalain pa, nga nagapatalang kag ginapatalang.” (2 Timoteo 3:1, 13) Bisan sang panahon ni Pablo, ang ginakabig nga ‘maalam kag intelihente nga mga tawo’ nagagamit sing makapakumbinsi ukon “makabuluyok nga mga argumento” para patalangon kag paluyahon ang pagtuo sang mga tawo kay Jesucristo. (1 Corinto 1:18, 19; Colosas 2:4, 8) Gani para indi maimpluwensiahan si Timoteo, ginpalig-on sia ni apostol Pablo nga ‘magpadayon sa mga butang nga iya natun-an halin sa pagkalapsag paagi sa balaan nga mga sinulatan’ nga ginhatag sang Dios.—2 Timoteo 3:14, 15.

Dapat amo man sini ang himuon mo sa sining “katapusan nga mga adlaw.” Ngaa? Kay mahimo ka man patalangon sang “makabuluyok nga mga argumento” sang maalam nga mga tawo. Gani, dapat mo proteksionan ang imo kaugalingon pareho sang unang siglo nga mga Cristiano. Mahimo mo ini kon magsalig ka sing bug-os sa imo natun-an sa Biblia, kay ang Biblia, gingiyahan gid sang Dios.

Malipay ang mga Saksi ni Jehova nga buligan ka nga magbakod ang imo pagtuo sa Biblia. Halimbawa, ipakita nila sa imo nga ang mga prinsipio sa Biblia masaligan gid halin pa sang una. Pamatud-an nila sa imo nga nagahisantuanay ang bug-os nga Biblia. Buligan ka man nila nga makita nga ang Biblia nagahisanto sa siensia kag nagakatuman gid ang mga tagna sini. Madamo pa sila sing puede isugid sa imo. Kon gusto mo ini mahibaluan, puede mo sulatan ang manughimo sini nga magasin para mahibaluan mo kon paano napamatud-an sang madamo nga tawo nga ang Biblia Pulong gid sang Dios.

[Blurb sa pahina 5]

Paano mo masiling nga ang isa ka tawo masaligan ukon indi?

[Blurb sa pahina 6]

Daku ang nabulig sang sinsero nga mga iskolar para mabal-an naton ang orihinal nga mga sinulatan sang Biblia