Ano ang Kamatuoran Parte sa Langit?

MADAMO gid ang gusto magpalangit! Ang mga Muslim, Hindu, kag Budhista may lainlain nga pagpati parte sa kabuhi sa tapos sang kamatayon. Amo man ang mga relihion sang Cristiandad kag bisan ang mga tawo nga indi interesado sa relihion. Ang kalabanan nga tawo nagapati nga ang langit isa ka matahom kag makalilipay nga lugar. Nagapati man sila nga wala na didto sing pag-antos kag makaupod na nila ang ila “napatay nga mga pinalangga.” Pero, matuod gid ang ginasiling sini nga hambalanon: Ang tanan gusto magpalangit, pero wala sing gusto nga mapatay para makakadto didto. Ngaa?

Kon tuyo sang Dios nga ang tawo mapatay kag mapalangit, indi bala nga dapat gustuhon ini sang mga tawo, pareho sang bata nga gusto magdaku kag sang pamatan-on nga gusto mangasawa? Pero, ngaa ang kalabanan nga tawo indi gusto mapatay?

Ang iban nga ministro nagapati nga sa tapos nga mabuhi kita sing makadali diri sa duta, sa langit gid kita gusto paistaron sang Dios. Halimbawa, si Theodore Edgar Cardinal McCarrick nga arsobispo anay sang Washington, D.C., nagsiling: “Wala kita gintuga para mabuhi sa duta kundi sa langit.” Ang presidente anay sang U.S. National Association of Evangelicals nagsiling man: “Gintuga kita para maghimaya sa Dios kag magpalangit . . . kay ang langit amo ang aton puluy-an.”

Ang mga nagapati nga may kabuhi sa langit sa tapos sang kamatayon masami nga wala sing masaligan nga basihan sa ila ginapatihan. Si George Barna amo ang presidente sang isa ka kompanya nga naga-research parte sa mga ginapatihan sang mga relihion. Nagsiling sia nga amo sini ang pagpati sang madamo parte sa “kabuhi kag sa pihak nga kinabuhi kay pirme ini ginapakita sa mga pelikula, mga musika, kag mga nobela.” Ang isa ka Episcopalian nga pastor nga taga-Florida nagsiling: “Wala kita sing nahibaluan parte sa langit magluwas nga ilistaran ini sang Dios.”

Pero ang langit isa ka importante nga topiko sa Biblia. Ano gid bala ang langit suno sa Pulong sang Dios? Ginhimo bala sang Dios ang tawo para magkabuhi sa langit? Kon mapalangit ang mga tawo, ano ang ila himuon didto?

[Blurb sa pahina 3]

Kon madamo ang gusto magpalangit, ngaa wala sing gusto mapatay para makakadto didto?