Magdiretso sa kaundan

Magdiretso sa listahan sang kaundan

Ngaa Ginhatagan Kita sang Dios sing Regalo nga Kabuhi nga Walay Katapusan?

Ngaa Ginhatagan Kita sang Dios sing Regalo nga Kabuhi nga Walay Katapusan?

 Pamangkot sang mga Bumalasa

Ngaa Ginhatagan Kita sang Dios sing Regalo nga Kabuhi nga Walay Katapusan?

▪ Ang Biblia nagsiling nga ginhatagan kita sang Dios sing tsansa nga ‘mabuhi sing walay katapusan.’ (Juan 6:40) Pero ngaa ginhimo niya ini? Bangod lang bala ini sa iya hustisya?

Kon ang isa may hustisya, ginapakig-angutan niya ang tanan suno sa kon ano ang nagakadapat kag nagakaigo para sa ila. Nagakadapat gid bala kita nga hatagan sing kabuhi nga walay katapusan? Indi. Ang Biblia nagsiling: “Walay tawo nga matarung sa duta nga nagahimo sing maayo kag wala nagapakasala.” (Manugwali 7:20) Kon ang isa makasala, dapat sia silutan. Ginpaandaman sang Dios ang una nga tawo nga si Adan nga kon magpakasala sia, sigurado gid nga mapatay sia. (Genesis 2:17) Sang ulihi, si apostol Pablo nagsulat: “Ang bayad nga ginabayad sang sala kamatayon.” (Roma 6:23) Gani, kon dapat silutan sing kamatayon ang mga kaliwat ni Adan, ngaa ginhatagan pa sila sang Dios sing tsansa nga mabuhi sing walay katapusan?

Ang kabuhi nga walay katapusan isa ka regalo nga ‘wala sing bayad.’ Ngaa? Ginhatag ini sang Dios kay wala tupong ang iya kaayo kag gugma. Ang Biblia nagsiling: “Ang tanan nakasala kag wala makalab-ot sa himaya sang Dios, kag ini wala bayad nga dulot nga ginpahayag sila nga matarong sang iya wala tupong nga kaayo paagi sa paghilway paagi sa gawad nga ginbayad ni Cristo Jesus.”—Roma 3:23, 24.

Bisan pa nagakadapat kita tanan nga mapatay, ginpili sang Dios nga hatagan sing kabuhi nga walay katapusan ang mga nagahigugma sa iya. Husto bala ini? Ang Biblia nagsiling: “Kon amo, ano ang aton isiling? May inhustisya bala sa Dios? Indi gid mangin amo sina! Kay nagsiling sia kay Moises: ‘Magakaluoy ako bisan kay sin-o nga ginakaluy-an ko, kag magapakita ako sang kaawa bisan kay sin-o nga ginapakitaan ko sing kaawa.’ . . . Sin-o gid ikaw agod magsabat sa Dios?”—Roma 9:14-20.

Sa pila ka bahin sang kalibutan, ang presidente ukon hukom puede makahatag sing pardon sa isa ka kriminal nga nakahimo sing grabe nga sala. Kon makita nila nga nagbag-o ang kriminal kag nagasunod sa mga sugo, mahimo nga hatagan nila sia sing pardon para buhinan ang iya sentensia ukon hilwayon na gid sia. Dapat gid tani sentensiahan ang kriminal, pero ginkaluuyan sia.

Sing kaanggid, mahimo nga magdesisyon si Jehova nga hatagan sing pardon ang mga makasasala. Bangod sa iya gugma, mahimo niya hatagan sing kabuhi nga walay katapusan ang mga nagahigugma sa iya kag nagasunod sa iya mga sugo. Ang Biblia nagsiling: “Ang Dios wala sing ginapasulabi, apang sa tagsa ka pungsod ang tawo nga nagakahadlok sa iya kag nagahimo sang pagkamatarong kalahamut-an sa iya.”—Binuhatan 10:34, 35.

Ginpakita ni Jehova nga palangga gid niya kita kay ginpadala niya ang iya Anak nga mag-antos kag mapatay para sa aton. Si Jesus nagsiling parte sa iya Amay: “Ginhigugma gid sang Dios ang kalibutan amo nga ginhatag niya ang iya bugtong nga Anak, agod ang tagsatagsa nga nagatuo sa iya indi malaglag kundi makatigayon sang kabuhi nga walay katapusan.”—Juan 3:16.

Ang tanan nga nagahigugma kay Jehova kag nagatuman sa iya kabubut-on batunon niya, ano man ang ila nahimo sang una. Gani, ang paglaum nga mabuhi sing walay katapusan pamatuod sang walay tupong nga kaayo kag daku nga gugma sang Dios sa aton.

[Blurb sa pahina 29]

Pamatuod ini sang walay tupong nga kaayo kag daku nga gugma sang Dios sa aton