Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

ANG LALANTAWAN DISIEMBRE 2009

 Tudlui ang Inyo Kabataan

Wala Nag-untat si Jeremias

Wala Nag-untat si Jeremias

NAKABATYAG ka na bala nga daw nagalalain ka kag daw mauntat na?— * Madamo ang nakabatyag sini, kag amo man ang pamatan-on nga si Jeremias. Istoryahan naton kon ngaa bisan pa palangga sia sang Dios, may tion nga daw gusto na niya mag-untat.

Antes pa matawo si Jeremias, ginpili na sia sang matuod nga Dios nga si Jehova nga mangin propeta, para paandaman ang mga tawo nga wala nagasunod sa Dios. Nakahibalo ka bala kon ano ang ginsiling ni Jeremias kay Jehova pila ka tuig sang ulihi?— ‘Indi ako makahibalo kon ano ang akon ihambal kay bata pa ako.’

Ano sa banta mo ang ginsabat ni Jehova kay Jeremias?— Mainayuhon pero malig-on sia nga ginsilingan ni Jehova: ‘Indi ka maghambal nga bata ka pa. Kinahanglan nga maglakat ka bisan diin ko ikaw ipadala, kag maghambal ka sang bisan ano nga ipahambal ko sa imo. Indi ka magkahadlok.’ Ngaa? “Kay kaupod mo ako kag buligan ko ikaw,” siling ni Jehova.—Jeremias 1:4-8, APD.

Pero subong sang ginsiling na, may tion nga daw mauntat na si Jeremias. Ngaa? Ginsuyaan sia sang mga tawo kay nagasimba sia sa Dios. ‘Ginakadlawan nila ako bug-os nga adlaw; ang tanan nagauligyat sa akon,’ siling niya. Gani gusto na niya mag-untat. ‘Indi na gid ako maghambal parte kay Jehova, ukon magsugid pa sa iya ngalan,’ siling niya. Pero nag-untat gid man bala sia?

‘Sa akon tagiposoon,’ siling ni Jeremias, ang pulong ni Jehova daw ‘pareho sang kalayo nga nagadabdab nga natakpan sa akon mga tul-an, kag ginakapoy na ako pagpugong sini.’ (Jeremias 20:7-9) Bisan kon kaisa nahadlok si Jeremias, wala gid sia nag-untat kay palangga niya si Jehova. Tan-awon naton kon paano naproteksionan si Jeremias kay wala sia nag-untat.

Ginsilingan ni Jehova si Jeremias nga paandaman ang mga tawo nga laglagon ang Jerusalem kon indi sila magbag-o sa ila malain nga ginahimo. Sang ginpaandaman sila ni Jeremias, naakig ang mga tawo kag nagsiling: ‘Ini nga tawo dapat patyon.’ Pero nakitluoy si Jeremias sa ila: ‘Sunda ninyo ang tingug  sang GINOO.’ Dayon nagsiling sia: ‘Tandaan ninyo nga kon patyon ninyo ako, nagpatay kamo sing tawo nga wala sing sala, kay ginpadala ako sang GINOO sa paghambal sa inyo.’ Kabalo ka bala kon ano dayon ang natabo?—

Ang Biblia nagsiling: ‘Ang mga principe kag ang bug-os nga katawohan nagsiling sa mga sacerdote kag sa mga manalagna, “Ini nga tawo indi dapat patyon, kay nagahambal sia sa aton sa ngalan sang GINOO nga aton Dios.”’ Ginproteksionan gid ni Jehova si Jeremias kay wala sia mag-untat bisan pa nahadlok sia. Tan-awon naman naton kon ano ang natabo sa isa pa ka propeta ni Jehova nga si Urias.

‘Si Urias nagtagna man batok sa Jerusalem sono sa tanan nga ginsiling ni Jeremias,’ siling sang Biblia. Pero sang naakig si Hari Joaquim sa iya, kabalo ka bala kon ano ang ginhimo ni Urias?— Hinadlukan sia, nag-untat sa pagsunod sa Dios, kag nalagyo sa Egipto. Gani ginpadakop sia sang hari kag ginpabalik. Kabalo ka bala kon ano dayon ang ginhimo sang malain nga hari?— Ginpatay niya si Urias paagi sa espada!—Jeremias 26:8-24.

Sa banta mo, ngaa ginproteksionan ni Jehova si Jeremias pero si Urias ya wala?— Kay bisan pa nahadlok si Jeremias, wala sia nalagyo kag padayon niya nga ginsunod si Jehova. Wala gid sia nag-untat. Sa banta mo ano ang matun-an naton kay Jeremias?— Bisan pa kon kaisa mabudlay sundon ang ginasugo sang Dios, dapat magsalig kita pirme sa iya kag sundon sia.

^ par. 3 Kon ginabasa mo ini sa isa ka bata, ang dash isa ka palatandaan nga dapat ka magdulog kag pasabton ang bata.