Magdiretso sa kaundan

Magdiretso sa listahan sang kaundan

Nagaulikid ang Dios—Paano Naton Nahibaluan?

Nagaulikid ang Dios—Paano Naton Nahibaluan?

 Nagaulikid ang Dios—Paano Naton Nahibaluan?

KON palangga kita sang Dios, ngaa grabe subong ang aton pag-antos? Ini nga pamangkot madugay na nga ginapalibugan sang mga tawo. Mahimo magaugyon ka nga kon palangga mo ang isa, indi mo gusto nga mag-antos sia. Kon may ara sia problema, ginabuligan mo gid sia. Bangod grabe subong ang aton pag-antos, madamo ang nagasiling nga ang Dios wala nagaulikid sa aton. Gani, importante nga binagbinagon anay naton ang mga pamatuod nga ginahigugma kita sang Dios kag nagaulikid sia sa aton.

Ang Pagpanuga Pamatuod sang Iya Gugma

Si Jehova nga Dios amo “ang Isa nga naghimo sang langit kag sang duta kag sang dagat kag sang tanan nga yara sa sini.” (Binuhatan 4:24) Kon pamensaron naton ang mga hinimuan ni Jehova, makasiling gid kita nga nagaulikid sia sa aton. Halimbawa, hunahunaa ang mga butang nga nagapahalipay sa imo. Nalipay ka bala kon may manamit nga pagkaon? Mabuhi kita bisan isa lang ka sahi sang pagkaon ang ihatag ni Jehova sa aton. Pero, ginhatagan niya kita sing lainlain nga pagkaon para matilawan ang  sarisari nga sabor. Para mangin makawiwili pa gid ang aton kabuhi, ginbutangan ni Jehova ang duta sing lainlain nga mga kahoy, mga bulak, kag matahom nga mga talan-awon.

Binagbinaga man kon paano kita ginhimo. Ang aton ikasarang nga magpakadlaw, mag-apresyar sa musika kag sa matahom nga mga butang, indi gid man naton kinahanglan para mabuhi. Pero ini tanan ginhatag sang Dios para malipay kita. Ang aton relasyon sa iban nagapahalipay man sa aton. Indi bala nga nanamian ka nga makaupod ang imo mga abyan ukon mahakos ang imo pinalangga? Ang pagpakita sang gugma isa ka regalo halin sa mahigugmaon nga Dios. Gintuga niya ang tawo nga may ikasarang nga maghigugma. Gani ini nga kinaiya ara mismo sa Dios.

Ang Biblia Nagapasalig sang Iya Gugma

Ang Biblia nagasiling nga ang Dios gugma. (1 Juan 4:8) Ang gugma sang Dios makita indi lamang sa iya mga tinuga kundi sa iya man Pulong, ang Biblia. Halimbawa, ang Biblia nagahatag sing giya para sa ikaayong lawas. Nagapalig-on ini sa aton nga mangin haganhagan sa tanan nga butang kag nagapaandam batok sa pagpahubog kag sobra nga pagkaon.—1 Corinto 6:9, 10.

Ang Biblia nagalaygay man sa aton nga higugmaon, respetuhon, kag pakitaan sing kaayo ang aton isigkatawo. (Mateo 7:12) Ginapakamalaut sini ang mga buhat nga makahalit sa iban, pareho sang kadalok, kahisa, pagkutsokutso, pagpakighilawas, kag pagpatay. Kon sundon lang sang tanan ang laygay sang Biblia, sigurado gid nga mabuhinbuhinan ang pag-antos sa bug-os nga kalibutan.

Pero ginpakita sang Dios ang iya pinakadaku nga gugma sang ginpadala niya ang iya Anak nga si Jesus para luwason ang katawhan. Ang Juan 3:16 nagsiling: “Ginhigugma gid sang Dios ang kalibutan amo nga ginhatag niya ang iya bugtong nga Anak, agod ang tagsatagsa nga nagatuo sa iya indi malaglag kundi makatigayon sang kabuhi nga walay katapusan.” Gani naghimo na nga daan si Jehova sing solusyon para dulaon sing permanente ang kamatayon kag ang tanan nga sahi sang pag-antos.—1 Juan 3:8.

Madamo sing pamatuod nga ginahigugma kita ni Jehova. Wala sia nalipay nga makita kita nga nagaantos. Gani, makasiguro gid kita nga dulaon niya ini. Ginasugid sang Biblia kon paano dulaon sang Dios ang pag-antos.

[Retrato sa pahina 4]

Ang pagpakita sang gugma isa ka regalo sang mahigugmaon nga Dios